Azərbaycanda tibbi maska istehsal edən müəssisə fəaliyyətə başlayıb. Ötən gün  prezident İlham Əliyev və birinci xanım Mehriban Əliyev Sumqayıt Kimya Sənaye Parkında “Bakı Tekstil Fabriki” MMC tərəfindən yaradılan tibbi maska istehsalı müəssisəsinin açılışında iştirak ediblər. İqtisadiyyat naziri Mikayıl Cabbarov və “Bakı Tekstil Fabriki” MMC-nin rəhbəri Səkinə Babayeva dövlətimizin başçısına və birinci xanıma müəssisə haqqında məlumat verdilər.

Qeyd edək ki, koronavirus pandemiyası ilə əlaqədar tələbatın kəskin artması səbəbindən bütün ölkələrdə tibbi ləvazimat və qoruyucu vasitələrin, o cümlədən maskanın böyük qıtlığı yaşanır. İstehsalçı ölkələr isə tibbi maska ixracını dayandırmaqla yanaşı, istehsal avadanlığı və xammalın ixracını da saxlayıblar. Koronavirus pandemiyasının qarşısının alınması ilə bağlı Azərbaycanda həyata keçirilən bütün işlər dövlət rəhbərliyinin  diqqət mərkəzindədir. Bu istiqamətdə verilən tapşırıqlardan biri də, maska istehsalı oldu. Aidiyyəti dövlət qurumları tərəfindən qısa müddətdə tibbi maska istehsalı avadanlığının və xammalın Azərbaycana gətirilməsinə nail olunub.

Məlumat verildi ki, “Bakı Tekstil Fabriki” MMC tərəfindən yaradılan tibbi maska istehsalı müəssisəsi Sumqayıt Kimya Sənaye Parkının ərazisində müvafiq yerlə təmin edilib və ona Sənaye Parkının rezidenti statusu verilib. Bu status müəssisəyə sənaye parklarına tətbiq edilən güzəştlərdən faydalanmağa imkan yaradır. İstehsalçıya İqtisadiyyat Nazirliyinin Sahibkarlığın İnkişafı Fondu vasitəsilə 1,2 milyon manat güzəştli kredit verilib. Müəssisənin yaradılması üçün investisiya xərcləri 3,9 milyon manat təşkil edir. Tibbi maskaların qablaşdırılması üçün xüsusi qutular da yerli istehsaldır. Tibbi maska istehsalı üçün Türkiyədən gətirilmiş müasir avadanlıq qısa müddətdə quraşdırılıb. Müəssisədə İSO beynəlxalq standartlarına uyğun xammaldan istifadə olunmaqla birinci mərhələdə hər gün 120 min tibbi maska istehsal ediləcək. Maskalar qablaşdırıldıqdan sonra xüsusi avadanlıqla əlavə olaraq sterilləşdiriləcək. Yaxın günlərdə daha bir istehsal xətti qurulacaq və ikinci mərhələdə istehsal həcmi 2 dəfə artırılaraq gündəlik istehsal 200-250 min tibbi maskaya çatdırılacaq. Müəssisənin məhsulları ilkin olaraq, daxili bazarda tələbatı ödəməyə yönəldiləcək. 

Hazırda dünyada yaşanan böhran və onun Azərbaycana təsirləri fonunda bu müəssisənin fəaliyyətə başlaması, insanların tibbi maska  ilə təmin olunması koronavirus və onun iqtisadiyyata təsirlərinin minimum endirilməsi baxımından da müsbət addım sayıla bilər.

Bu məsələni dəyərləndirən iqtisadçı ekspert Pərviz Heydərov musavat.com-a açıqlamasında bildirdi ki, bu yeni açılan istehsal sahəsi bilavasitə koronavirus böhranının ölkə daxilində üzə çıxartdığı bir problemin həlli məqsədilə həyata keçirilən addımdır: “Bu müəssisənin açılması mövcud böhranla bağlı qabaqlayıcı tədbirlər məqsədilə, cəmiyyətin tələbatını ödəmək zərurətindən belə bir istehsal müəssisəsi açıldı. Bu inqtisadi inkişafa, ölkənin maliyyə imkanlarına bağlı məsələdir və hazırki durumda Azərbaycanın kifayət qədər maliyyə imkanı var ki, ölkə əhalisini tibbi maska və digər zəruri vasitələrlə təmin edən müəssisələr açılsın. Böhrana qədərki vəziyyətimiz kifayət qədər yaxşı idi. Bu yeni açılan istehsal sahəsi bilavasitə koronavirus böhranının ölkə daxilində üzə çıxartdığı bir problemin həlli məqsədilə həyata keçirilən addımdır. Tibbi maska istehsalı xaricdən bu sahədəki asılılığı da azaldacaq. İstər dərman preparatlarının istehsalı, birdəfəlik şprislərin istehsalı ilə bağlı müəssisələrin yaradılması nəzərdə tutulurdu, bəziləri işə başlamışdı. Yaxın gələcəkdə dərman istehsalı ilə bağlı müəssisələrin işə düşməsi də gözlənilir. Bunlar zəruri addımlardır və həyata keçirilən işləri ancaq alqışlamaq olar.