İyirmi il bundan əvvəl yaratdığı və əsas fəaliyyət məkanı qardaş Türkiyə olan “Palmali” Şirkətlər Qrupunun təsisçisi və sahibi Mübariz Qurban oğlu Mənsimovun 15 mart 2020-ci il tarixində FETÖ istintaqı çərçivəsində günahlandırılaraq, məhkəmə qərarı ilə həbs olunmasını heç cür qəbul edə bilmirəm. Eyni zamanda, Türkiyə kimi demokratik və hüquqi bir dövlətdə iş adamına yönələn ittihamların əsassız olduğunun üzə çıxarılacağına, onunla bağlı araşdırmaların ədalətlə aparılacağına inanıram. Ona görə də bu əminliyin qaynaqlandığı məqamları diqqətə yönəltmək istərdim.    

Əvvəla onu deyim ki, şərəfli bir türkçü ömrü yaşayan, qardaş Türkiyəyə dərindən bağlanan, bu ölkəyə olan sevgi-məhəbbətini  hər zaman dilə gətirən, əməlləri ilə milyonların rəğbətini qazanan bir iş adamı VƏTƏNƏ xəyanət edə bilərmi? Doğulduğu ailədə daim Atatürkdən danışılan, aldığı tərbiyə ilə Atatürk sevdalısı olan bir şəxs özünə ikinci VƏTƏN sandığı Türkiyədən necə üz çevirib, ona düşmən ola bilər? Şəxsən mən inanmıram ki, Türkiyənin milli maraqlarını fəaliyyət prinsiplərinin alisi hesab edən bu şərəfli iş adamı birdən-birə “…kimçi, …nəçi”yə çevrilər…Özünün dediyi kimi Mübariz bəy İslamın şiə məzhəbinin daşıyıcısıdır və  "FETO"ya qarşı ciddi mübarizə aparan aydınlardan olub. Ağlamalı olduğu qədər də gülməlidir. Yəni, kos-koca qardaş Türkiyə istintaqı bu qədər qeyri-ciddi və qeyri-peşəkar?  

“Palmali” fəaliyyət göstərdiyi 20 il ərzində 20 mindən çox tələbəyə təqaüd verən, məktəb binaları inşa etdirən, saysız sosial layihələr gerçəkləşdirən, Türkiyənin dənizçilik sənayesinə böyük gəlir və fayda gətirən, qardaş ölkənin iqtisadiyyatına milyardlarla dollar yatırım qoyan sözügedən şirkətlər qrupunun rəhbəri adları çəkilən hər iki ölkədə vətənsevər, milliyətçi iş adamı kimi tanınıb, insanlara maddi və mənəvi dəstək göstərən xeyriyyəçi kimi böyük nüfuz və hörmət sahibinə çevrilib.  

Bir daha deyirəm, belə olan təqdirdə Türkiyə və Azərbaycan cəmiyyətlərində sevilən Mübariz Qurban oğlu özünün “bir millət, iki dövlət”inə, xüsusilə vətəndaşlığını qəbul etdiyi ölkəyə heç vədə xor baxmaz! Türkiyə, Azərbaycan bayraqları olmayan mərasimlərə bir kərə olsun belə qatılmayan, bunu özünə təhqir hesab edən, Türkiyəyə, Azərbaycana zaman-zaman qənim kəsilən ermənilərə sonsuz nifrətini vaxtaşırı dilə gətirən, ailəsində 7 şəhidin ağrı-acısını yaşadan, Qarabağın işğalı ilə heç cür barışmayaraq,– ”şirkətimdə üçüncü nəsil erməninin olduğunu eşitsəm, dərhal qovaram… Heç vaxt onlarla ticarət etmərəm. Ermənilərə həmişə antipatiyam olub. Onları sevmək məcburiyyətində deyiləm, onlar da məni sevməsin”,– deyən, “Ali Baş Komandan cənab İlham Əliyev hansı gün əmr versə, ehtiyatda olan əsgər kimi çıxış edərək, dolabımdan hərbi paltarımı çıxarıb müharibəyə gedər, Qarabağımızın xilası yolunda döyüşərəm…”, – söyləyən, hər cümləbaşı “Türkiyə”, “Azərbaycan” adlarını fəxrlə dünyaya çatdıran biri “bir millət, iki dövlətin etimadını, inamını itirməz, fikirində, düşüncəsində bu qardaş ölkələrə zərrəcə yanlışlığa, səhvə yol verməz…      

Mübariz Mənsimov “Erməni terroru” sənədli filminin Türkiyə TV-lərində yayınlanmasını, “Bir insanlıq utancı - Xocalı soyqırımı” adlı sənədli ekran əsərinin Türkiyənin tanınan film salonlarında nümayişini gerçəkləşdirməklə, Bodrumun mərkəzində “Qız qalası” inşa etdirməklə, İstanbulun mərkəzi yerlərində Azərbaycan parkları saldırmaqla qanı-canı, əməli ilə vətənpərvər, insanpərlər, haqqpərvər olduğunu dəfələrlə təsdiqləyib. Məhəmməd Əmin Rəsulzadə, Heydər Əliyev, Əbülfəz Elçibəy, Həzi Aslanov, Mir Cəlal Paşayev, Mübariz İbrahimov kimi xalq, millət sevimlilərinin adlarını dünya sularında hərəkət edən gəmilərə verməklə onların xatirəsini əbədiləşdirib.

Mübariz Mənsimov qardaş Türkiyədə yaşamasından asılı olmayaraq, hər zaman “Azərbaycan mənim evimdir”,– söyləyib,  daim Azərbaycanla nəfəs alıb, onun uğurları ilə fərəhlənib, qələbələrindən ilhamlanıb, Azərbaycan dövlətçiliyinin təəssübünü çəkib, Azərbaycan dövlətçiliyini ulu öndərimiz Heydər Əliyevin müdrik tövsiyələri, uzaqgörən strategiyası əsasında inkişaf etdirən, respublikamıza beynəlxalq aləmdə böyük nüfuz qazandıran möhtərəm Prezidentimiz İlham Əliyevin daim yanında olduğunu, onun siyasətini dəstəklədiyini, idarəetmə dəst-xəttini, demokratiyasını  bəyəndiyini vurğulayıb, bütün bunları müxtəlif mərasimlərdəki çıxışlarında, sosial şəbəkələrdəki statuslarında, müsahibələrində diqqətə çatdırıb.

Cənab İlham Əliyevin 2018-ci il aprelin 11-də keçirilən prezident seçkilərindəki parlaq qələbəsi münasibətilə möhtərəm dövlət başçımıza göndərdiyi təbrik məktubundan da bu, aydın görünür: “Prezident seçkilərində möhtəşəm qələbəniz münasibətilə Sizi “Palmali” Şirkətlər Qrupunun çoxminli kollektivi adından və şəxsən öz adımdan ürəkdən təbrik edirəm. Bu şəksiz qələbə bütün Azərbaycan xalqının qələbəsidir. Bu təmiz və şəffaf qələbə Azərbaycan xalqının Sizə olan inamının qələbəsidir. Bu qədirbilən xalqımızın Sizə olan etimadının qələbəsidir. Bu böyük qələbə ulu öndər Heydər Əliyev fəlsəfəsinin təntənəsidir.

Dəfələrlə bəyan etdiyim kimi, mən və mənim komandam, “Palmali”də çalışanların hamısı hər zaman, hər an Sizin yanınızdayıq, bütün tapşırıq və tövsiyələrinizi yerinə yetirməyə hazırıq. Güclü və firavan Azərbaycan, xoşbəxt sabahımız, Qarabağımız naminə Sizə cansağlığı, uzun ömür arzulayırıq. Ali dövləti vəzifənizdə Sizə uğurlar diləyirik”.

Cənab İlham Əliyevin səmərəli fəaliyyətinə belə bir düşüncə tərzi, belə bir yanaşma fəlsəfəsi ilə yanaşan Mübariz Mənsimov, eyni dərəcədə Türkiyə Prezidenti Rəcəb Tayyib Ərdoğana da münasibət sərgiləyib, onun siyasətinə, dövlətçilik strategiyasına sayğı ilə yanaşıb. Qardaş ölkədə gəmiçiliyi inkişaf etdirmək, bu yöndə ardıcıl uğurlar əldə etmək Mübariz Mənsimovun başlıca məramı, məqsədi olub.

Mən burada bir məqamı xüsusilə xatırlatmaq istərdim. Etiraf edək ki, Azərbaycandan kənarda onlarla tanınan iş adamı var ki, onların heç biri Mübariz Qurban oğlu qədər Azərbaycana bağlı deyil. Bu şəxs indiyədək neçə-neçə sənət nümayəndəsinin, o cümlədən imkanı olmayan sadə adamların müalicə xərclərini reallaşdırıb, Türkiyənin ali təhsil ocaqlarında təhsil alan 18 min tələbənin təhsil haqqının ödənilməsini gerçəkləşdirib, şəhid ailələrinə, əlillərə, yaradıcı adamlara yardım göstərib, Vətən qarşısında xidmətləri ilə diqqətçəkən şəxslərin övladlarını mənzillə təmin edib.  

Bu gün məndə dərin bir inam, əminlik var: iş fəaliyyəti Azərbaycana və Türkiyəyə səmərəli xidmət, sədaqət və sevgi üzərində qurulan, hər addımında milyonlarla azərbaycanlının qəlbində Türkiyə sevgisıni daha da gücləndirən Mübariz Mənsimov tezliklə azadlığa qovuşacaq, günahsızlığı təsdiqlənəcək, bir sözlə, ədalət zəfər çalacaq. Türkiyənin hüquqi dövlət olduğu, bu ölkədə ədalətli ədliyyə sisteminin mövcudluğu isə bu qənaətimi daha da möhkəmləndirir.