Məlum olduğu kimi, “Əsir və itkin düşmüş, girov götürülmüş vətəndaşlarla əlaqədar Dövlət Komissiyasının yeni tərkibinin təsdiq edilməsi barədə” 2004-cü il 15 noyabr tarixli 519 nömrəli sərəncamında dəyişiklik edilməsi haqqında” sərəncamında dəyişiklik edilib. Ölkə başçısınıən sərəncamına əsasən Dövlət Təhlükəsizlik Xidmətinin rəisi Əli Nağıyev bu Komissiyanın sədri təyin olunub. Hansı ki, Əli Nağıyevin bu vəzifəyə təyinatı heç də sıradan bir olay olmayıb, bəzi mətləblərdən xəbər verir.
Peşəkarlar məhz bunun üçündür: Çətin tapşırıqlar, ağır missiyalar üçün...
Əli Nağıyevin uzun illər dövlət təhlükəsizlik sistemində çalışdığını, bu sahənin əsl peşəkarı və Azərbaycanın milli maraqlarına bağlı bir insan kimi tanındığını nəzərə alsaq, əminliklə söyləmək olar ki, bu təyinat əsir və itkin düşmüş, girov götürülmüş vətəndaşlarımızla bağlı yeni bir dönəmin başlanmasını tətikləyəcək. Əsir düşmüş və girov götürülmüş vətəndaşlarımız haqqında dəqiq məlumatların əldə edilməsi, onların ölkəmizə qaytarılmasının təmin edilməsi uzun illərdir ki, Azərbaycan dövləti və cəmiyyətini düşündürən əsas problemlərdən biridir. Odur ki, bu sahəyə Dövlət Təhlükəsizlik Xidmətinin rəhbərliyində təmsil olunan, əldə edilməsi heç də asan olmayan bilgi və məlumatlara sahiblənmək, çətin əməliyyat-axtarış tədbirlərinin həyata keçirilməsində böyük təcrübəyə malik bir şəxsin cəlb edilməsi, heç şübhəsiz ki, itkin və əsir düşmüş vətəndaşlarımız aqibəti baxımından təsirsiz ötüşməyəcək. Ümid etmək olar ki, yaxın gələcəkdə bu istiqmaətdə daha ciddi hərəkətliliyə şahid olacaq, düşmən əsirliyindəki vətəndaşlarımızın geri qaytarılması prosesinin sürətlənməsini müşahidə edəcəyik. Çünki peşəkarlar məhz bunun üçündür: çətin tapşırıqlar, ağır missiyalar üçün...
Müharibə qazisi müharibə qurbanlarının izində...
Əsir və itkin düşmüş, girov götürülmüş vətəndaşlarla əlaqədar Dövlət Komissiyasının rəhbərliyinə general Əli Nağıyevin gətirilməsi, həm də yeni Dövlət Komissiyasının yeni sədrinin Qarabağ müharibəsinin aktiv iştirakçısı, veteranı olması gerçəyini də yada salmış olur.
Xatırladaq ki, general Əli Nağıyev Qarabağ müharibəsində erməni işğalçılarına qarşı xüsusi əməliyyatların təşkilində iştirak edib, düşmənə məxsus mühüm obyektlərin konkret əməliyyatlar vasitəsi ilə məhv edilməsini həyata keçirib. Başqa sözlə desək, general Əli Nağıyevin erməni işğalçılarının təbiətinə, onların psixologiyasına, mübarizə və davranış xüsusiyyətlərinə kifayət qədər yaxşı bələd olduğu söylənilə bilər. Hansı ki, bütün bu bilgilər erməni əsirliyindəki vətəndaşlarımızın düşmən əsirliyindən azad edilməsi, girov götürülən vətəndaşlarımızın yenidən öz azadlıqlarına qovuşmasını təmin etmək baxımından olduqca vacibdir. Əli Nağıyev vətəndaşlarımızı o düşmənin əsirliyindən azad etmək istiqamətində fəaliyyət göstərəcək ki, onunla Qarabağ cəbhəsində dəfələrlə üz-üzə gəlib, ona yetərincə bələddir. Düşməni tanımaq isə onunla mübarizədə uğur qazanmaq baxımından olduqca önəmlidir. Odur ki, DTX rəisinə yeni vəzifəsində uğurlar arzulayır, əsir və girov vətəndaşlarımızın yaxın gələcəkdə öz doğmalarına qovuşacağına ümid edirik.
Məlumat üçün qeyd edək ki, Qarabağ münaqişəsi nəticəsində Azərbaycanın 3889 vətəndaşı itkin düşüb ki, bunların 3622 nəfəri kişi, 267 nəfəri qadındır. Onu da vurğulayaq ki, bu, sadəcə, Dövlət Komissiyasının qeydiyyatına düşən vətəndaşlarımızdır. Bu günə qədər əsir və girovluqdan azad edələn vətəndaşlarımız isə 1480 nəfərdir. Hansı ki, onların 1123 nəfərini kişilər, 357 nəfərini isə qadınlar təşkil edir.
Seymur ƏLİYEV
