Fəaliyyəti qadağan olunan Azərbaycan Beynəlxalq Universitetinin (ABU) rektoru Elşad Abdullayevin şikayəti əsasında həbs edilən iş adamı Arzu Kazımov “Bizim Yol” qəzetinin suallarını cavablandırıb. Moderator.az həmin müsahibəni təqdim edir:   

- Mən açıq şəkildə deyim ki, istintaq prosesindən razı qalmadıq. Çünki, vəkilim tərəfindən barəmdə həbs-qətimkan tədbirinin dəyişdirilməsi ilə bağlı verilən vəsatətlər rədd edildi. Mən heç yerə qaçası deyildim. Elşad bu iddialarla çıxış edəndə də ona öz cavabımı media vasitəsi ilə verirdim. İstintaq orqanının da suallarına cavab vermişəm və verməyə hazır idim. Bir sözlə həbsim qanunsuz olduğu üçün aparılan istintaq prosesində də hüquqlarım pozuldu. Məhkəmə prosesinə gəlincə, hələlik bu barədə danışmaq tezdir. Çünki, cəmi iki proses olub. Bunlardan biri hazırlıq iclasıdır. Digəri isə mənim ifadəm olub. Hələ qarşıda şahidlərin dindirilməsi məsələləri var. Həmçinin, məhkəmə araşdırmaları olacaq. Bir neçə prosesdən sonra məhkəmə ilə bağlı fikir söyləmək olar. Ancaq mən bir şeyi demək istəyirəm. Elşad Abdullayevi Azərbaycanda hər kəs dələduz, şantajçı bir adam kimi tanıyır. Bu şəxs ortalığa çıxandan bəri ölkədə elə bir adam qalmadı ki, ona böhtan atmasın. Mən də Elşad Abdullayevin böhtanlarının qurbanıyam. Bir neçə aydır ki, həbs edilmişəm. Amma həbsdə olduğum zaman ərzində onun mənə irəli sürdüyü ittihamların heç biri təsdiqini tapmayıb. Elşadın böhtanı ilə məni həbs ediblər. Mən onun böhtançı olduğunu istintaqa ifadələrimlə isbatlamışam. Bu gün də məhkəmə prosesi keçirilir. Məhkəmə də bunu sübut edirəm. İnanıram ki, gec tez-tez haqq ədalət öz yerini tapacaq.  

- Tikinti fəaliyyəti ilə məşğul olan hər kəs bilir ki, Elşadla mənim münasibətim olub və bu münasibət ancaq sırf biznes fəaliyyəti ilə bağlı olub. Biz birlikdə biznes fəaliyyəti ilə məşğul olmuşuq. Mən yaxşı xatırlayıram, bir gün gəlib dedi ki, “Avropa bankında olan türk mənə kömək etdi, mən isə ona bu puldan 10% verdim, ona görə də o mənə uşaq bağçası və məktəb tikintisi üçün pul ayırıb”. Universitetində işləyən Şulan Şirəliyevi göndərib Küveytə, oradan pul gətirib məscid tikməyə. Və o məndən xahiş etdi ki, bu obyektləri birlikdə tikək. O mənə dedi ki, məscidi institutun həyətində, baxça və məktəbi Yasamaldakı yerimizdə tikəcəyik. Sual olunur: Əgər sən bunları mənə deməmisənsə, mən bunları haradan bilirdim? Digər tərəfdən, sən mənə yalvarıb-yaxarırdın ki, “qardaşım nəyimiz varsa, götürüb qaçıb, bu işlərdə kömək elə, bir az pul qazanım”. Elşad mənə pul verib. Amma bunu qardaşının tapılması üçün verməyib. Mən ondan pul alarkən bunu rəsmiləşdirdik. Bir dəfə mənə dedi ki, “ABU-nun lisenziyası ilə bağlı nazirlikdə bir nəfərə bahalı ev alıb hədiyyə etməliyəm”. Bildirdi ki, 500 minlik mənzil olsun. Elşad mənə pul gətirdi. Amma mən dedim ki, gəl bunu rəsmiləşdirək. Həyatdır, birdən yolda gedəndə məni maşın vurar, başıma bir iş gələr. Niyə məndə pulun batmalıdır? Mənim təkidimlə Elşadın qohumu ilə aramda müqavilə bağlandı.  

- Əlbəttə, soruşurdum. Münasibətlərimiz çox yaxın olanda mən ondan soruşdum ki, qardaşın niyə qaçıb? Cavab verdi ki, o, stadionda böyük siyasi səhvə yol verib. O vaxta qədər mən sənin qardaşın haqqında heç nə bilmirdim və onu heç tanımırdım. Həmişə mənə deyirdi ki, “Mahir adlı qardaşım yoxdur, bütün var-dövlətimizi yığıb aradan çıxıb”. Elşad mənə verdiyi bütün pulları rəsmiləşdirmişəm. İddia edir ki, bu pulu guya qardaşının tapılması üçün mənə verib. Mən yenə də ortaya sübut qoyuram. Elşadın «ERA» ATSC adlı firması ilə mənə məxsus «İnşaat 2002» arasında müqavilə var. Müqavilənin sürətləri istintaq materiallarında var. Həmin müqavilədə Elşad Abdullayev yazıb ki, “«ERA» ATSC - «İnşaat 2002» şirkətinin Bakı şəhəri Nərimanov rayonunda inşa etdiyi, ümumi dəyəri 1 milyon ABŞ dolları olan 50 ədəd mənzilin alınması üçün «İnşaat 2002» şirkətinin rəhbəri Kazımov Arzu Firudin oğluna, şirkət üzvlərinin şəxsi vəsaiti olan, bir milyon ABŞ dolları məbləğində pul verdim”. Mən isə yazmışam ki, «İnşaat 2002» şirkətinin rəhbəri, Kazımov Arzu Firudun oğlu, müqavilənin ikinci bəndində göstərilən məqsəd üçün, «Era ATSC»nin rəhbəri Abdullaev Elşad İslam oğlundan bir milyon ABŞ dolları pul aldım. Müqavilədə o da qeyd olunub ki, əgər bir il yarım müddətində həmin mənzillər “ERA” ATSC-yə verilməzsə, ödənilmiş bir milyon pul və əlavə 30 faiz geri qaytarılmalıdır. Aramızdakı müqavilənin bitməsinə 5-6 ay qalmış Elşadın qardaşları mənim yanıma gəldilər ki, o, sənə pul verib. Elşad bunu bilib, zəng edib, yalvardı ki, deyim ki, Mahirə görə almışam. Mən təbii ki, razılaşmadım. Dərhal müqaviləni çıxarıb, onlara göstərdim. Onlar susub bir- birinə baxdılar və 2-3 saatdan sonra gələcəklərini xahiş etdilər. 2 saatdan sonra Elşadla birlikdə gəldilər və xahiş etdilər ki, 10 gün gözləyə bilmirlər, pulu və ya onun müqabilində mənzil , torpaq sahəsi götürə bilərlər. Mən onlara mənzil və torpaq sahəsi təklif etdim. Onlar sabah yerlərə baxıb, cavab verəcəklərini dedilər. Səhərisi gün onlar gəldilər və torpaq sahəsini götürmək istədiklərini bildirdilər. Biz onlarla birlikdə notariusa getdik və özünün tərtib etdiyi notarial qaydada bütün məsələləri hüquq çərçivəsində həll etdik və özü də bildi ki, biz ona 2.000 000 dollar dəyərində yer verdik. Mən orada hamının yanında ondan soruşdum ki, mənim sənə heç bir borcum qalmadı ki? Özü, qayınatası, qardaşları da dedilər ki, “yox”. Biz notariusdan yüksək əhval-ruhiyyədə dağılışdıq. Biz onunla halallıqla ayrıldıq. Mən bir məsələni də vurğulayım ki, Elşad Abdullayev məndən xahiş edirdi ki, qardaşları və qohumları bu pulları mənə 30 %-lə verməsini bilməsinlər. Yadımdadır, bir dəfə mənə dedi ki, “Mahirin qayınatası var, bir həftəyə öləcək, gedək onun yanına, ona bir az ürək- dirək verək”. Razılaşdım və getdik. İçəri girən kimi kişi mənim üstümə çığırdı ki, Mahirin pulunu almısan, onu niyə gətirmirsən?. Mən yerimdə donub qalmışdım, Elşad da mənə göz eyləyirdi ki, cavab verməyim. Bir müddət susandan sonra kişi mənim üstümə bir də çığırdı ki, “mən bilirəm sən kimsən, nəçisən, gör, sənə nələr edəcəm”. Bunlardan sonra mən ona cavab verdim ki, mən hüquq mühafizə orqanlarında işləmirəm, qoy onlar sənin kürəkənini tapsınlar. Və ona dedim ki, Elşad bu pulu 30 %-lə mənə iş görmək üçün verib, istəyirsiz müqaviləni gətirib göstərim. Bundan sonra Elşad artistcəsinə ortaya girdi və bizi sakitləşdirdi. İndi başa düşürəm ki, niyə o məndən susmağı xahiş edirdi, yəqin lentə alırdı və bu epizodlar kişinin yadında qalar.  

- Mənim daxili işlər nazirinin sabiq müavini, dünyasını dəyişmiş Zahid Dünyamalıyevlə yaxın münasibətim olub. Mahirin işi ilə bağlı dəfələrlə ondan və digər vəzifəli şəxslərdən xahiş etmişəm. Ancaq bu xahişlər üçün Elşaddan pul almamışam. Elşad deyir ki, guya mən onu qardaşı Mahirlə danışdırmışam və Mahir ona işgəncə verildiyini deyəndən sonra mənə pul verib ki, qardaşını qurtarım. Hansı videoda mən demişəm ki, Elşad mənə pul verib qardaşı üçün? Bizim pul söhbətlərimiz yalnız biznes sahəsində olub. Elşad Abdullayev oturub xaricdə ağzına gələni yazır, buna görə mən neçə vaxtdır içəridəyəm. Qoy bir özü gəlsin burada desin ki, nə baş verib. Mən bircə şeyi bilirəm ki, haqq-ədalət öz yerini tapacaq. Elşad Abdullayevin böhtan atmadığı adam qalmayıb. Maraqlıdır ki, heç kəs də ona cavab vermir. Bir gün ondan hesab soracaqlar.