Bu gün istedadlı və bir o qədər də maraqlı dünyagörüşünə, fərqli düşüncəyə sahib olan gənclərlə tanış olmaq, yeni bir baxış bucağına, təfəkkürə malik insanlarla ünsiyyət qurmaq nə qədər xoşdursa, bir o qədər də əyləncəlidir. Belə ki, hamının bir rəng tonunda gördüyünü fərqli rənglərlə təsvir etmək, həyata, yaşamağa başqa bir yanaşma metodu ilə açıqlama vermək, məhz bizim monotonluq adlanan anlayışımızın üstündən xətt çəkmiş olur. Öz işi və fəaliyyəti ilə seçilən, maraq oyadan və haqqında söz etdirənlər isə diqqəti özünə cəlb etməklə, həm də özləri haqqında maraqlı məlumatların əldə olunmasına bilavasitə kömək etmiş olurlar.

Müsahibimiz də belə gənclərdən biridir. Bloger Aydan Cəfərova öz işi və zövqlə peşəkarlığın vəhdət şəklində qurduğu fəaliyyət prinsipləri ilə seçilənlərdəndir. Sosial mediada aktivdir. Blogerin İnstagram hesabında kifayət qədər izləyici var və maraqlı paylaşımları ilə faydalı olur. İşinin kəmiyyəti keyfiyyəti ilə düz mütənasibdir desək, yanılmarıq.

16 avqust 1990-cı ildə anadan olub Aydan Cəfərova. 1996-cı ildə daxil olduğu orta məktəbdən 2007-ci ildə məzun olan bu gənc xanım elə həmin il Qafqaz Universitetinin (indiki Bakı Mühəndislik Universiteti) tələbəsi adını qazanıb. Universitetdə Biznesin təşkili və idarəedilməsi ixtisası üzrə təhsil alan A.Cəfərova işgüzar fəaliyyətinə hələ tələbə ikən (2010-cu il) Azərbaycan Dillər Universitetinin Mətbuat xidməti nəzdindəki Protokol xidmətinin mütəxəssisi kimi başlayıb. İş prosesindəki fəallığı, səriştəli və məhsuldar fəaliyyəti nəticəsində bir müddət sonra baş mütəxəssis vəzifəsinə yüksəlib. Yeniliklərə və inkişafa meyilliliyi, daim uğur axtarışında olması A.Cəfərovanı bu dəfə ona tamamilə yad olan bir sektorda çalışmağına əsas verib. Belə ki, o, 2018-ci ildən Universal PRO MMC-nin Satış və Marketinq departamentində Satış Koordinatoru vəzifəsində, 2019-cu ilin iyun ayından etibarən şirkətin Satınalma və Logistika Departametində Sifarişlərin idarə olunması üzrə qrup rəhbəri vəzifəsində çalışır. Deyiblər “min eşitməkdən bir görmək yaxşıdır”. Gəlin müsahibimizi qiyabi olaraq tanıyaq.

- Düşünürəm ki, insan hər hansısa bir məsələ ilə bağlı qərar verərkən ətraflı düşünməli, bütün detalları ayrı-ayrılıqda götür-qoy etməlidir. Fərqi yoxdur bu qərar mühüm əhəmiyyət kəsb edir, ya yox. Bəzən əhəmiyyət vermədiyimiz məsələlər var ki, onların nəticəsi həyatımızda lüzumsuz xatirələrlə qalır. Məhz buna görə də, məncə, qərar verərkən diqqətli olmaq lazımdır. Məsələn, mən bloger kimi fəaliyyətə başlamazdan öncə çox düşündüm. Çünki cəmiyyətimizdə sosial şəbəkələrə yanaşma birmənalı deyil. Buna görə də, 2015-ci ildən qərar versəm də məni saxlayan bəzi səbəblər var idi. Ətrafımdakıların, ən əsası da ailəmin reaksiyasına görə narahat olurdum. Amma bir il öncə artıq nə olursa olsun səhifəni açmağa və bir yerdən başlamağa qərar verdim. Ailəm artıq məni dəstləkləyir. Ətrafımdakı tanışlarım isə “boş işlərlə məşğul olma” desələr də, məni öz hədəflərimdən döndərə bilmirlər. Nəticədə isə 13 min izləyicim var və inanıram ki, bu say artacaq.

“Bir işlə kifayətlənməyi, boş oturmağı sevmədiyim üçün mən bir neçə işlə paralel şəkildə məşğul oluram”

- Blogerlikdən əlavə hansı işlərlə məşğul olursunuz?

- Mən təkcə blogerliklə məşğul olmuram. Mənim əsas işim tikinti və sənaye sektoru ilə bağlıdır. Yəqin ki, bir xanımın tikinti sektorunda çalışması sizə də qəribə gəldi. Etiraf edim ki, bu sahədə çalışacağımı mən də heç vaxt düşünməzdim. Amma deyim ki, həqiqətən də maraqlı sahədir. Bu sahəyə aid heç bir anlayışı olmayan biri kimi artıq müəyyən qədər baza yığmışam. Bundan əlavə, mənim blogumla eyni adı daşıyan satış səhifəm də var. Uşaq paltarlarının və müxtəlif aksessuarların satışını həyata keçirirəm. Bir işlə kifayətlənməyi, boş oturmağı sevmədiyim üçün mən bir neçə işlə paralel şəkildə məşğul oluram.

- Blogum gözəllik və gündəlik həyat tərzinə aiddir. Mən mənə maraqlı olan müxtəlif məlumatları (kosmetika, maska, müxtəlif maraqlı məlumatlar) izləyicilərimlə bölüşürəm. Bəzən paylaşımlara həddən çox maraq olur, bəzən də mənə maraqlı gələn izləyicilərim üçün ciddi maraq doğurmur. Amma bu, məni həvəsdən salmır, əksinə daha çox araşdırma edir və maraqlı məlumatlar toplayaraq səhifəmdə paylaşıram. Bilirəm ki, uğur qazanacağam. Hər sahədə olduğu kimi bu sahədə də özümə inanıram.

- İdeal iş mühiti yoxdur. Bunu özünüz yaradırsınız, məncə. Hər işdə stress, əsəb, həyəcan mütləqdir ki var. Amma bütün bunları müsbət dəyərləndirərək həll etmək və dəf etmək olar. Son bir aya qədər hər şeyi xırda detalına kimi fikirləşirdim. Hətta özümə dərd edir, günlərlə təsirində qalırdım. İndi isə müsbət tərəfdən baxaraq günümü daha da maraqlı etməyə çalışıram. Həqiqətən də, hər mənfi hadisənin tez unudulub getdiyinin şahidi oluram. Eyni zamanda, deyə bilərəm ki, səni anlayan həmkarların və rəhbərliyin varsa, iş mühiti daha yaxşı olur. Bütün bunları ümumiləşdirərək deyə bilərəm ki, işi sevməsən mühit ideal olsa belə, sən məmnun olmayacaqsan. Çünki sevmədiyin işdə mühit ideal olsa da, səni heç vaxt xoşbəxt edə bilmir. Buna görə də, öz potensialını göstərə bilmirsən. Nəticədə, yarıtmaz, perspektivsiz bir kadr olursan. Bu mənada hər kəsə sevdiyi işlə məşğul olmağı tövsiyə edirəm.

- Vaxtımın böyük hissəsi qeyd etdiyim kimi əsasən iş yerimdə keçir. Bu işimdən mən hər gün yeni nə isə öyrənirəm. Blogla bağlı fəaliyyətim isə günün sonuna qalır. Hərdən işdə nahar vaxtından istifadə edib “hekayə” bölməsinə nələrsə əlavə edirəm. Post üçün isə bir neçə gün araşdırma aparıram və nəhayət onu ümumiləşdirərək bir post halına gətirib paylaşıram. Gün ərzində izləyicilərimdən müxtəlif suallarla bağlı mesajlar alıram, çalışıram tez cavablandırım. Hörmətsizlik etməyi sevmirəm. Həftə sonları isə foto-sessiyalar üçün ayrılır.

- Uğursuzluq sayılmaz bəlkə də, amma hazırda çalışdığım iş yerində yeni idim və adaptasiya müddəti çox çətin idi mənim üçün. Mühitə uyğunlaşa bilmirdim. İş mənə qəribə gəlirdi. Bir gün işi sevirdim, o biri gün işdən çıxmaq fikrinə düşürdüm. Və nəhayət həmin gün müdirimin iradından sonra sanki yuxudan ayıldım. Həmin gündən etibarən qarşıma bir neçə məqsəd qoydum. Bəlkə də, o irad olmasaydı, mən indi qrup rəhbəri olmazdım. Çünki həmin gündən sonra mən bütün potensialımı işimə yönləndirdim, daha məsuliyyətlə və həvəslə yanaşdım. Qarşıma məqsədlər qoydum və onlara doğru irəliləməyə başladım. Hələ məqsədlərimə tam çatmasam da, yolun az hissəsini qət etmişəm deyə bilərəm.

- Ən əsası bütün məsələlərdə özümə güvənir, qarşıma qoyduğum məqsədin arxasınca gedərkən bu işin öhdəsindən layiqincə gələcəyimə inanıram. Kimsə sənə inanmasa da, sən mütləq özünə inanmalısan. Axı səndə olan potensialı heç kim sənin kimi bilə bilməz. Sadaladığım bu fikirlər artıq mənim kiçik sloqanıma çevrilib. Hər hansı işə başlayanda bu sloqanı xatırlayır və o əhval-ruhiyyə ilə addım atıram. Əldə olunan nailiyyət məni sevindirir və gələcək planlarım barədə daha pozitiv düşünməyə şərait yaradır. Amma bəzən ola bilər ki, uğurla həyata keçirə biləcəyinizə əmin olduğunuz hansısa planınız sizdən asılı olmayan səbəblərə görə baş tutmasın. Bu zaman da ruhdan düşmək lazım deyil. Məsələn, dünya şöhrətli amerikalı ixtiraçı Tomas Alva Edison elektrik lampasını kəşf etmək üçün, səhv etmirənsə, 2000-ə yaxın təcrübə aparıb. Dəfələrlə uğursuzluqla qarşılaşmasına rəğmən o, özünə inamını itirməyib və sonunda məqsədinə nail olub. Əslində həmişə pozitiv düşünmək lazımdır. O zaman yavaş-yavaş hər şey öz yoluna düşür. Qısaca onu deyə bilərəm ki, mən özgüvənim sayəsində özümü motivasiya edirəm.

- Bəzən səhifənin formatına uyğun uzun və maarifləndirici məlumat paylaşıram. Bəzi izləyicilərim mesaj bölümünə həmin material barədə sual ünvanlayırlar. Halbuki sualın cavabı paylaşılan materialda tam əksini tapıb. Bax, bu zaman suala cavab verirəm, amma eyni zamanda məyus oluram ki, bu post oxumaq üçün yazılıb. Niyə əziyyətə dəyər verilmir? Sualın ikinci hissəsinə gəldikdə isə deyə bilərəm ki, xüsusi narahatedici məsələlər əlbəttə olur. Məsələn, öz səhifəsini reklam etməyi xahiş edənlər kifayət qədərdir. Bir də hər hansısa məsələnin mahiyyətini tam bilmədən, fərqinə varmadan fikir bildirənlər var. Doğrusu, bu faktor məni narahat edir, amma məni öz marağımdan uzaqlaşdırmaq iqtidarında deyil. Başa düşürəm hər kəsin həyata baxış bucağı müxtəlifdir, hər kəs fərqli düşünür, birinə maraqlı, digərinə mənasız gələ bilər. Amma bütün hallarda hər kəsin fikrinə hörmətlə yanaşmaq lazımdır.