(Əvvəli bu linkdə://www.moderator.az/news/282481.html)

Tədbirlər planını hazırlayıb Polyaniçkoya təqdim etdim. O, bəzi əlavələr etmək şərti ilə planı bəyəndi. Əməliyyatın keçirilməsi fikri ilə razılaşdı. Lakin onun vaxtını dəqiq müəyyənləşdirmədi...

1991-ci il aprelin 21-də Füzulidən telefonla mənə dedilər ki, təcili ora gəlim. Xüsusi təyinatlı hərbi hissənin iki əsgərini mənə cangüdən təyin etmişdilər. Onlar avtomat və qumbaraatanlarla silahlanmışdı. Xidməti “UAZ” markalı avtomaşını Bakıdan Daxili İşlər Nazirliyindən göndərmişdilər...

Ağdam rayonunun komendant postuna çatanda maşını saxladıb bildirdilər ki, Ağdamdan Martuni(Xocavənd-S.L.) rayonuna gedən avtomobil yolu bağlanıb, gediş-gəliş dayandırılıb. Məlum oldu ki, taksidə gedən 4 azərbaycanlını Mərzili  kəndinin yaxınlığından keçərkən ermənilər atəşə tutaraq qətlə yetiriblər...

Füzuliyə Ağcabədi və Beyləqan rayonlarından getməyi məsləhət gördülər. Günortadan sonra yola çıxmışdıq. Hərbçilərin təklif etdiyi yol  uzaq idi və çox vaxt aparırdı. Dedim ki, Martuni yolu ilə getməliyik. Postdan bir qədər aralanandan sonra sürücüm İlhama göstəriş verdim ki, maşının nömrə nişanlarını açsın. Cangüdən əsgərlərə isə tapşırdım ki, döyüşə hazır vəziyyətədə olsunlar, yol ətrafını daim izləsinlər. Azacıq təhlükə hiss etsələr,  xəbərdarlıq etmədən atəş açsınlar...

Yolun ətrafı, dağlar, dərələr, yamaclar sanki yaşıl libasa bürünmüşdü. Təbiət nə qədər gözəl və cazibədar görünsə də, qara və qorxulu bir sükut hökm sürürdü. İlham var gücü ilə sürəti artırırdı. Martuni rayonunun ətrafınadək heç bir maşına, insana, canlıya rast gəlmədik. Rayon mərkəzinə yaxınlaşanda körpünün girəcəyində və çıxacağında minik avtomaşınları və bir neçə adamın dayandığını görüb maşının sürətini azaltdıq. Yola mişar daşları düzmüşdülər ki, maşın sürətlə keçə bilməsin və içərisindəki adamlara baxa bilsinlər. Hamımız hərbi formada, gülləkeçirməz jilet və dəbilqədə idik.  Maşın yavaş-yavaş körpüdən keçib təxminən 150-200 metr aralanandan sonra güzgüdən baxıb gördüm ki, həmin adamlar tələsik “Jiquli” markalı maşınlara minib  bizim ardımızca gəldilər. Bunu İlham da görmüşdü. Dedim bərk sür ki, şəhərdən çıxa bilək. İlham maşını var gücü ilə sürüb şəhərdən çıxandan sonra güllə səsləri eşitdik. Şəhərin mərkəzi qurtaranda yol enişə enirdi. Enişə  girən kimi maşını saxlayıb tez düşərək əlverişli mövqe tutmaq və döyüşə hazır olmaq barədə əmr verdim. Erməniləri maşından düşməyə imkan vermədən gülləbaran etməyə başladıq. Əsgərlərdən biri qumbaraatanla maşınlardan birini yandırdı. Bundan sonra maşınlardan heç çıxan da olmadı... 

Beləcə Füzuli rayonuna sağ-salamat çatdıq. Ertəsi gün komendantlığın məlumatında deyilirdi ki,  yandırılmış maşında üç erməni ölüb...

Füzuli Rayon Partiya Komitəsinin qonaq otağında V.Polyaniçko ilə görüşəndə o bildirdi ki, əməliyyatın keçirilməsi üçün  mənim təklif etdiyim sayda milis, prokurorluq və  dövlət təhlükəsizlik orqanlarının əməliyyat işçilərinin və müstəntiqlərin  buraya gəlmələri barədə göstəriş verib. 

Artıq hərbi hissələrin komandirləri Füzuli şəhərinə gəlmişdilər...

(Davamı var)

Təqdim etdi: Sultan Laçın