"Rüşvətxorluqla faşistlik arasında bağlılıq varmı?.."

"Gürcüstanda xarici agentlər haqqında qanunun qəbulu Qərbə sərfəli deyil" - "Yunge Welt"

"Məsləhətiniz üçün sağ olun, amma qərarları biz özümüz qəbul edirik" - Netanyahu

Budanov Rusiya üçün yaxın aylarda "sürprizlər" vəd edib

AŞPA Rusiya prezidenti Vladimir Putini qeyri-legitim elan edib

"Ermənistan Qərbin əlində Rusiyanın Cənubi Qafqazdan sıxışdırılıb çıxarılması alətinə çevrilib" - Zaxarova

Rusiya İsrailə qarşı dərhal sanksiyalar tətbiq edilməsini tələb edir

Plazmanın köməyi ilə qırılan sümükləri tez bərpa edə biləcək üsul kəşf edildi...

"Bayden Rusiyanın neft emalı zavodlarını müdafiə etməklə Putinin situativ müttəfiqinə çevrilib" - "Bloomberg"

"Rüşvətxorluqla faşistlik arasında bağlılıq varmı?.."

Köşə

Oxunub: 4009

02 Jul 2019 | 12:26

Son günlər filan korrupsioner məmurun övladının 2 milyonluq saatının oğurlanması, filan başçının xaricdəki mülkləri barədə və xüsusən Azərbaycan xəstəxanalarından birində Aprel qazisinin həkimlərin övladına laqeyd, bisavad münasibətinə görə özünü yandırması haqda xəbəri eşidəndə neçə onilliklərdir beynimdə fırlanan bu sualı sosioloqlara, psixoloqlara, nə bilim, tarixçilərə, filosoflara ünvanlayası oldum: “Sizcə, rüşvətxorluqla, korrupsionerliklə faşistlik arasında əlaqə, bağlılıq varmı?..”

***

Zənnimcə var. Şəxsi təcrübəmdə də dəfələrlə rastlaşmışam və rastlaşıram. Bunlar özləri kimi rüşvət alıb-verməyənlərə, bu rəzalətə qarşı mübarizə aparanlara, onların üzlərinə gerçəyi söyləyib “oyunları”na qoşulmayanlara sanki başqa ölkədən, planetdən gəlmə, özgə, alçaq bir irq, millət nümayəndəsi kimi baxırlar. Bunlar gördükləri işə görə “haqlarını” vermək istəməyənləri nəinki şərləməyə, həbs etdirməyə, hətta qanını içməyə, belələri üçün məmləkətdə xüsusi işgəncə mərkəzləri, konslagerlər qurmağa hazırdırlar… Ləğv olunmuş yalnız bir nazirliyin məmləkət boyu törətdiyi əməllər ortalığa çıxanda məlum oldu ki, belə gizli türmələr qurulmuşdu da, orada vicdanlı vətəndaşlara, sahibkarlara olmazın işgəncələr verilirdi də…

***

İnsan puldan, var-dövlətdən, hakimiyyətdən, kürsüdən ötrü nə qədər azğınlaşar, heyvanlaşar, iblisləşər ki, öz xalqına, öz soydaşına, öz vətəndaşına qənim kəsilər?..

***

Bir insanın, müsəlmanın, Azərbaycan vətəndaşının sənin baş həkim kimi yuxarıdakı həmkorlarının razılığıyla müəyyən etdiyin “haqqı” verməyə imkanı yoxdur deyə, müalicə olunmamasına, həlak olmasına göz yumursansa, sənin Xocalıda hamilə ananı, südəmər körpəni, azyaşlı qızı minbir işgəncələrlə amansızlıqla qətlə yetirən Balayan ilə, Köçəryan ilə, Sərkisyan, Melkonyan ilə heç bir fərqin yoxdur.... Hələ bu xalq üçün onlarddan da təhlükəlisən. Çünki içimizdə oturmusan...

***

Sən nazir, icra başçısı, təhsil şöbəsinin müdiri kimi 20 Yanvar, Xocalı soyqırımı, yaxud hansısa rayonun işğalı günündə telekameralar önündə özünü guya bir vətənpərvər kimi nümayiş etdirmək üçün Şəhidlər Xiyabanını ziyarət edib şəhidlərin məzarlarına gül qoyursansa, amma kabinetinə qayıdıb torpağı işğal altında olan bölgələrin şöbələrindən, yaxud elə həmin şəhidlərin adlarını daşıyan məktəblərdən və ya xəstəxanalardan, həkimlərdən, tibb baxcılarından, süpürgəçilərdən “hesab” umursansa, alırsansa, sən o şəhidin daşnak qatilindən də betərsən... Çünki o erməni şəhidimizə bir dəfə güllə atıbsa, sən hər gün onun ruhunu güllələyirsən, sən onun adını daşıyan təhsil ocağını rüşvətxorluğa bələməklə, rüşvət hesabına savadsız kadrları o məktəblərə, təhsil şöbələrinə yerləşdirməklə orada təhsil alan Azərbaycan balalarının, Azərbaycan xalqının gələcəyini qətlə yetirirsən... Sən rüşvət hesabına savadsız, rüşvətxor həkimlərin xəstəxanalara yerləşməsinə şərait yaradırsansa, yüzlərlə nəsilə, tayfaya zərbə vurursan, yüzlərlə xəstə, şikəst körpənin doğulmasına səbəb olursan və nəticədə bu xalqın genefondunu böyük zərbə altında qoyursan...

Öz vicdanın qarşısında cavab ver, alçaq: sən daşnak deyilsən, faşist deyilsən, bəs nəsən?...

***

“Maaşımız azdır, dolana bilmirik”, “gələn qonaq-qaranı yola salmalıyıq...”, “yuxarıdan hesab istəyirlər” kimi cavabların hamısı öz nəfsinin acgözlüyünə bəraət qazandırmağa xidmət edən bəhanələrdir. Maaşın azdır; tələb et, mübarizə apar, səndən yuxarıdakı rəhbərlər rüşvət tələb edirsə, vermə. Mümkün qədər halal, düzgün işlə ki, yuxarıların yanında gözükölgəli olmayasan. Bunları da etmək alınmırsa, tutduğun postda işləmə, istefa ver, get fəhləlik et, daş qaldır, yük daşı, küçə süpür, amma harama bulaşıb bu korrupsiya şəbəkəsinin elementinə, quluna çevrilmə... Ölməyəcəksən, bir az maddi çətinliklə yaşayacaqsan, amma insan kimi yaşayacaqsan, şərəfini, ləyaqətini, şəxsiyyətini, mənliyini, vicdanını itirməyəcəksən... Və ən əsası, Allahın qarşısına üzüağ çıxacaqsan...

Bütün bunları dərk etmirsiz. Ona görə də yazıqsınız... Amma nadan, cahil ağlınızla elə düşünüsüz ki, rüşvətdən, haramdan uzaq qaçan bizlər yazığıq... Darıxmayın, inşallah, bütün gerçəkləri görəcək və cəzanızı çəkəcəksiniz...

***

Hər hansı bir ölkədəki korrupsionerlər ofşorlardakı milyardlarını, İsveçrədəki, Londondakı hesablarını, Virciniyadakı, Çexiyadakı... mülklərini o qədər “halal”sayırlar ki, onlardan ötrü bütün xalqın qanını tökməyə hazırdırlar...

***

Düzdü, qazinin özünü yandırmasına, intiharına haqq qazandırmaq olmaz. Doğru seçim deyil, Allah qarşısında böyük günahdır. Keçmiş döyüşçüyə yaraşan yol deyil... Amma görün, onu nə dərəcədə bezdiriblərsə, cana-boğaza yığıblarsa, o, bu yolu seçməyə məcbur olub...

Burada günahkar, cinayətkar yalnız bir baş həkim, yaxud bir həkim, bir neçə həkim, tibb bacıları-filan deyil, on illərlə qoynumuzda yetişməsinə şərait yaratdığımız bir sistemdir. Son illər yüzlərlə insanın intiharına səbəb olmuş bu acgöz, rüşvətxorlar, korrupsionerlər şəbəkəsidir...

***

İnsan öz milli kimliyini, mənliyini, anasını belə unudub öz xalqına qənim kəsilirsə, buna manqurt, faşist deməyəsən, nə deyəsən?..

***

Sizi bilmirəm, şəxsən hesab edirəm ki, rüşvətxorluq sosial irqçiliyin, faşizmin və həm də manqurtluğun təzahürü olan bir xəstəlikdir. Özü də müalicəsi çox çətin olan, əksəriyyət üçün mümkün olmayan bir xəstəlikdir...

***

Bu mənfur xəstəliyin müalicəsi isə yalnız bir neçə xırda rüşvətxorun həbsi ilə bitmir. Bu, “müalicə kursu” hər bir Yer sakininin, o cümlədən hər bir Azərbaycan vətəndaşının nəfsindən keçir. Dəfələrlə deyirik: hər kəs haqq-ədalət uğrunda mübarizəyə özündən başlamalıdır. Hər kəs özünü dəyişməlidir, təmizləməlidir ki, bütövlükdə cəmiyyət dəyişsin, təmizlənsin....