“Muzey sənəti gələcək nəsillərin formalaşmasında böyük əhəmiyyətə malikdir”

Mayın 18-i Beynəlxalq Muzeylər Günüdür.

Ölkəmizdə muzey sənətinin mövcud durumu nə dərəcədə qənaətbəxşdir? Muzeylər xalqın mədəni həyatında nə kimi rol oynayır?

Moderator.az-a açıqlama verən Beynəlxalq Muzeylər Şurasının üzvü, görkəmli kinorejissor, professor Cəmil Quliyev ölkəmizdə muzey sənətinin inkişafı istiqamətində ciddi addımların atıldığına diqqət çəkdi:

“Muzey işi, muzey sənəti elə bir məfhumdur ki, o, daim inkişaf edir. Nə qədər bəşəriyyət var, bu müddət ərzində yeni muzeylər açılacaq, yeni muzeylərə ehtiyac duyulacaq.

Bu gün Azərbaycanda çox unikal muzeylər var. Mən Heydər Əliyev Mərkəzini xüsusilə qeyd etmək istəyirəm. Orada çox unikal Heydər Əliyev Muzeyi yaradılıb. Xalça Muzeyi də qiymtəli bir muzeydir. Bu muzey yüksək səviyyədə bərpa edilib. Eyni zamanda, Qobustan qoruğunu da qeyd etmək istəyirəm. Orada da unikal bir muzey var.

Atəşgahda, Qala abidə kompleksində də belə muzeylər var. Bizdə yüksək səviyyəli muzeylər çoxdur. Ümid edirəm ki, gələcək də  yeni muzeylər açılacaq.

Muzey bir mədəniyyət, bir tarixdir. Muzey keçmişə hörət və ehtirtamdır. Muzey işi, muzey sənəti gələcək nəsillərin formalaşmasında, inkişafında çox böyük əhəmiyyət kəsb edir. Mən Beynəlxalq Muzeylər Şurasının üzvü kimi çox sevinirəm ki, Azərbaycanda muzeylər inkişaf edir, fəaliyyətdədir. Bütün bunlar onu göstərir ki, ölkəmizdə muzey işinə çox böyük diqqət və məhəbbət var. Arzu edirəm ki, gənclərimiz muzeylərə getsinlər, bizim tariximiz, mədəniyyətimizlə yaxından ünsiyyətdə olsunlar”.

Seymur ƏLİYEV