Azərbaycanın sabiq müdafiə naziri, general-mayor Tacəddin Mehdiyev son günlər Moderator.az-ın oxucuların müzakirəsinə buraxdığı 1992-1993-cü illərdə Milli Məclisin iclasında müzakirə olunaraq qəbul edilmiş “Azərbaycan Respublikası Milli Məclisinin Dağlıq Qarabağda, o cümlədən Xocalıda törədilmiş soyqırımı hadisələrini aydınlaşdıran deputat- istintaq komissiyasının RƏYİ”ndə barəsində söylənilənlərə sərt münasibət bildirib. Əməkdaşımıza verdiyi açıqlamada general onun guya bir sıra bölgə və kəndlərimizin işğalı, eləcə də Xocalı faciəsi ərəfəsində Azərbaycana qarşı xəyanətkar mövqe tutması iddia edilən Şahin Musayevə özünün müavini olmasını təklif etməsi, onu 30 il öncədən tanıdığını gizlətməsi və s. ittihamları rədd edib.
“Deputat-istintaq komissiyasının rəyində bildirilir ki, guya mən Şahin Musayevi 30 il öncədən tanıdığımı söyləməmişəm. Bu, tamamilə yalandır. Əli Ömərov kimilərin rəhbərlik etdiyi komissiyadan bundan artıq nə gözləmək olar? Əvvəla, heç həmin komissiya üzvləri mənimlə nə görüşüb, nə də telefon əlaqəsi saxlayıb. Bunların hamısını özlərindən, ordan-burdan yazıblar. İkincisi, Şahin Musayevi ondan 30 il əvvəl tanısam da, Bakıda hərbi məktəbi bir oxusaq da, mən özüm Müdafiə naziri olanda onun “şəxsi işi” olmadan birinci müavin təyin olunmasına etiraz etmişəm. Bununla bağlı bir sıra rəhbər şəxslərlə, o cümlədən o vaxtkı dövlət müşaviri Sabir Hacıyevlə, hətta Prezident Ayaz Mütəllibovla mübahisə etmişəm. Demişəm ki, “şəxsi işi” olmayan, özü də sənədləri Moskvada qalan adamı Azərbaycanın Müdafiə nazirinin birinci müavini necə təyin etmək olar. Yəni, Şahin Musayevi mənim nazir kimi təqdimatım olmadan birinci müavin təyin ediblər. Bəli, o, Bakıya gələndə keçmiş məktəb yoldaşı kimi yanıma gəlib, oturub çörək də yemişik. Amma mən ona vəzifə təklif etməmişəm, əksinə, demişəm ki, “şəxsi işi”n olmadan səni vəzifəyə götürə bilmərəm. Amma Ş.Musayev özü gedib Prezident Aparatına orada ona mənim nazir kimi təqdimatım olmadan general rütbəsi verib nazir qoyublar. Rəhbərliyə etiraz edəndə cavab veriblər ki, axı sən onunla 4 il bir yerdə oxumusan, yaxşı tanıyırsan. Demişəm ki, nə olsun, bir yerdə oxumuşuq, hazırda Ş.Musayevin “şəxsi işi” yoxdur, onu müharibə gedən ölkənin Müdafiə Nazirliyində belə məsul vəzifəyə qoymaq doğru deyil. Bütün bunlara görə Prezident Mütəllibovla da münasibətim korlanıb, Ş.Musayevin özü ilə isə düşmən vəziyyətində olmuşam. Nəticədə Rəhim Qazıyev nazir olanda həmin vaxt Baş qərargah rəisi işləyən Şahin Musayevlə birgə mənim ordudan tərxis olunmağıma qol çəkiblər. Yəni o, çörəkitirənin biri olub. Mən hələ 1990-cı illərdə bəlkə də 10 qəzet müsahibəmdə bildirmişəm ki, Ş.Musayev mənimlə birgə oxuyub. Bundan əlavə, bizimlə birgə hərbi məktəbdə tanınmış hərbçilərdən MN-in keçmiş kəşfiyyat rəisinin müavini Sabir Cəfərov və s. də oxuyub. Mən necə dana bilərəm Ş.Musayevlə bir yerdə hərbi təhsil aldığımı? Amma mən nifrət edirdim o adama... Mən həmin Rəyin dərc olunduğu ilk vaxtlarda da o komissiyaının sədri Ramiz Fətəliyevə, Əli Ömərova zəng edib demişəm ki, ayıbdır, belə yalanlar yazmayın...”
Tacəddin Mehdiyev qəti şəkildə bildirdi ki, sözügedən komissiya üzvləri Rəy dərc olunmadan öncə onunla nə telefonla, nə də üzbəüz söhbət etməyib. O, özü Rəyi oxuduqdan sonra komissiya rəhbərliyinə zəng edib deyilən faktları təkzib edib. “Biz vətən uğrunda döyüşəndə həmin komissiya üzvlərinin bəziləri onu-bunu satmaqla məşğul olub...”- keçmiş nazir belə deyib.
T.Mehdiyev hesab edir ki, xəyanətkar əməllər törətmiş Şahin Musayevin irəli çəkilməyində əsas rolu o vaxtkı Dövlət müşaviri, hazırkı deputat Sabir Hacıyev oynayıb. Çünki Ş.Musayevi Prezident Ayaz Mütəllibova “şəxsi işi” olmadan “layiqli kadr” kimi məhz Sabir Hacıyev təqdim edib...
Qeyd: Açıqlamada adları çəkilən şəxsləri dinləməyə hazırıq.
Sultan Laçın