Tanınmış yazıçı, ssenariçi Orxan Fikrətoğlu Moderator.az-a açıqlamasında yeni çəkdiyi film haqqında maraqlı bilgilər verib:

"Tağıyev, Nağıyev Azərbaycanda çox tanınır. Amma başqa bir Bakı milyonçusu, onlarla eyni sırada dayanan Murtuza Muxtarovu da təbliğ etmək, onu publikaya çatdırmaq vacibdir. ona görə də mən Murtuza Muxatrova adi "Murtuza" filmini çəkdim.Film Aran Film studiyasında çəkilib, orada bir çox tarixi məsələlərə aydınlıq gətirilib. Məsələn, Rus çarı bir gün imperiya daxilindəki bütün iş adamlarını yığıb Türkiyəyə müharibə elan etmək və bundan ötrü də onlardan pul toplamaq istəyir. Azərbaycanlı milyonçulardan da üçü-Tağıyev, Muxtarov və Şəmsi Əsədullayev də orada iştirak edir. Muxtarov Tağıyev qədər varlı deyildi, amma necə olursa, o da dəvət edilir. Şəmsi Əsədullayev bilirsiz ki, Azərbaycanın ən zəngin milyonçusu olub. Çar milyonçulardan pul yığan zaman Şəmsi Əsədullayev pul çekini pul toplayanların əlindəki siniyə atıb. Daha sonra Tağıyev də eyni hərəkəti edib. Amma Murtuza Muxtarov Çara qarşı çıxaraq, salonu tərk edir. Çar köməkçisindən soruşur ki, salonu tərk edən kim idi? Köməkçisi Muxtarovun kim olduğunu öyrənir. Onu geri çağırtdırıb, bu hərəkətinin səbəbini soruşur. Murtuza Muxtarov deyir ki, imperator, siz Türkiyəyə savaş açmaq üçün pul toplayırsınız. Mənim sağ qolumla  sol qolumu kəsmək istəyirsiniz. Çar bu sözdən sonra onunla düşmən olur. Murtuza Bakıya qayıtdıqdan sonra bir çox təzyiq-tənələrlə üzləşir. Onun Bakıda xeyli neft quyuları və zavodu var idi. Bildiyimiz kimi, o, həm də ixtiraçı idi. Nefti asan üsulla çıxaran və emal edən qurğu istehsal etmişdi. Həmin qurğu ilə işləyən zavodu bağlatdırdı. Ermənilərdən də bu məqsədlə çox istifadə etdilər. Murtuza məcbur qalıb arvadı ilə Bakını tərk edib, İnquşetiyaya gedir. Orada da zavod açıb, işə başlayır. Onun həyatı haqqında çəkdiyimiz filmdə Azərbaycan tarixinin çox maraqlı səhifələri öz əksini tapıb.

Yazıçı Moderator.az-a açıqlamasında bu yaxınlarda Rusiyada rus dilinə çevrilərək, çap edilən və satışa çıxarılan yeni kitabı haqqında da danışıb:

"Bir rus tərcüməçi dostumuz var, "Tək" romanımı rus dilinə çevirib. Biz həm də bir eksperiment etmək istəyirik. Kitab kommersiya məqsədi ilə çapdan çıxıb. Görək, Rusiya bazarında özünü necə tutacaq.Şəxsən mənim də özümə maraqlıdır ki, görüm, romanım rus oxucusunun marağını cəlb edə biləcəkmi?
Əslində, mən "Yeddi" romanımın çapını istəyirdim. Amma onu rus dilinə çevirmək mümkün olmadı".

Elmin Nuri