Bəli, bizim dediklərimiz yavaş - yavaş öz yerini tutur. Bir qrup özünə siyasətçi deyənlər, ziyalılar, partiya sədrləri, başqa sözlə, hakimiyətin yağlı dilinə növbəti dəfə aldadılmış adamlar qollarını çırmalayıb atdandılar seçki meydanına, girmək istədilər deputatxanaya, xüsusi təyinatlıların yanına. Elə bildilər ki, sanki dərəbəylikdir, demokratiya o qədər çiçəklənib, artıq Milli Məclisin yiyəsi yoxdur, kimin kefi istəsə icazəsiz gedib orda otura bilər. Bu binəvalar elə təsəvvür etdilər  ki, nəhayət, ədalət bərpa olunub - YAP - ın ölkə üzrə vahid siyahısında onlara vəd verildiyi kimi boş yer ayrılıb. Biz dedik - Ay qardaşlar, ay başınıza dönüm, daşı tökün ətəyinizdən, əl çəkin bu boş deputat sevdasından, gəlin yalançı seçki - meçki oyununda özünüzü rüsvay eləməyin. Məgər sizə hələ də məlum deyilmi, seçki artıq bitib, deputatlar çoxdan təyin olunub, saxta mandatlarını da çoxdan alıb dürtüblər cibişdanlarına. İndi qurulan səhnə isə sadəcə bədbəxt millətin gözünə kül üfürməkdir, dekorasiyadır. Axı, hansı vicdanlı adam imanını yandırıb deyə bilər ki, bu keçən 22 il müddətində YAP hakimiyyəti bircə dəfə də olsun ədalətli, normal seçki keçirib?                                                                                                                                                                                                                           

Siz bu həngamələri lap əvvəldən, bineyi qədimdən bilə - bilə niyə özünüzə nahaqdan əziyyət verirsiniz, papağınızı boş yerə günə yandırırsınız? Axı, o da sizin və bizim yadımızdan çıxmayıb ki, bir yetim, saxta mandatın dərdindən hələ seçki başlamamış  müdrik poza verib deyirdiniz ki, ”İndidən seçkinin necə keçiriləcəyi barədə nəsə demək düzgün deyildir.” Rus demişkən, “Vot tebe na”, indi aldınız payınızı?                                                                                                                                   

Hələ o da sizin və bizim yadımızdadır ki, siz qaça - qaça gedib prezidentin köməkçisi ilə deputat seçkisini müzakirə etmək istəyirdiniz. O da sizə çox mədəni surətdə “poşel” dedi, sonra da  ” Biz seçkinin müzakirəsinə hələ hazır deyilik, gəlin Bakıda keçiriləcək Avropa Oyunlarını müzakirə edək” demədimi? Deputat mandatı eşqi ilə alışıb yandığınıza görə bu tələbi tərəddüd etmədən qəbul etdiniz. Millətin qanı bahasına başa gələn hakimiyyətin pula tələ oyunu - Avropa Oyunlarını keçirməyi ağızdolusu təriflədiniz, bəh - bəhlə alqışladınız. Sonra nə oldu. Özünü hakimiyyətə müxalifət hesab edən sizin  hərənizin cibinizə bir bilet dürtüb, avtobusa basıb apardılar avropalıların özlərinin gəlmədikləri stadiona.                                                                                                                                                                                 

Məgər bu qədər zırıltıdan sonra hələ də başa düşmürsünüz ki, bu hakimiyyət manevr etməyi, ələ salmağı, barmağa dolamağı çox yaxşı bacarır, bu işdə super pərgardır. Məgər keçən deputat seçkiləri yadınızdanmı çıxıb? Hərləyib, fırlayıb, dilə tutub, söz verib 16 siyasi partiyanı seçkilərə qatdılar. Bəs nəticəsi nə oldu? Nəticəsi əla oldu. YAP-ın orbitində fırlanan 5-6 partiyanı çıxmaq şərtilə, bütün qalanları hamısı getdi işinin dalınca, fışdırıq  çala - çala...                                                                                                                                           

İndi özünüz bir daha şahid oldunuz ki, bu seçki komediyasında da cürbəcür fırıldaqlara əl atırlar, hərəni bir adla yola saldılar. Birinə dedilər “İmza vərəqlərində bütün imzalar eynidir”, digər bir başqasına dedirlər ”Seçicilər şikayətçidir, deyirlər bizi aldadıb qol çəkdiriblər” və sair və ilaxir...                                                                                                 

Bütün bu məzələnmədən sonra  İstəyirsən, get saxtakar professor Məzahir Pənahovun dairələrdəki saxtakarlıqda püxtələnmiş nümayəndələrini yerindəcə güllələ, yaxud tapşırıq yerinə yetirən icra hakimiyyətinin qabağında öz başına bir 7 qramlıq güllə çax, xeyri yoxdur. İstəyirsən, lap get Koroğlu körpüsündən özünü kəlləmayallaq aşağı tulla, bu da faydasızdır. Çünki fatihə verilib, qurtarıb gedib.                                                                                                                                                       

Əlbəttə, bu saxtakarlıqların qarşısını alacaq, ona sipər çəkəcək yalnız və yalnız  bir qüvvə vardır, o da - Xalqdır. Amma nə yazıqlar ki, onun da mütləq əksəriyyəti dilənçi günündə yaşamasına baxmayaraq 2 addımlığındakı seçki məntəqəsinə gedib seçkiyə qatılmır, layiqli namizədləri müdafiə etmir, gələcəyini saxtakarlara etibar edir. Xalqın digər bir hissəsi, büdcə təşkilatlarında çalışanlar və məntəqələrdə, seçki dairələrində çörəklərinə haram qatıb 100-200 manat müqabilində vicdanını satır, seçkini saxtalaşdırır, özləri də sifarişlə səs verirlər.                                                                                                                                          

İndi bu gün Azərbaycanda “məmə” deyəndən “pəpə“ yeyənə qədər hamı yaxşı  bilir ki, öz cibişdanı naminə  millətini köləliyə sürükləyən indiki hakimiyyət heç kimdən, heç nədən çəkinmədən əbədi saxtakarlığını davam etdirərək uca səslə deyir ki , ”Ay bədbəxtlər! Siz nə deyirsiniz deyin, siz nə sayırsınız sayın, siz nə çalırsınız çalın, biz heyvagülü oynayacağıq.”                                                                                                                     

Bilənlər bilir, bilməyənlər də bilsin ki, rayonlarda, kənd yerlərində camaat mal - qarasını xəstəlikdən qorumaq üçün ildə bir neçə dəfə onları duzlağa aparır. Bir dəfə duzlaqda duz yemiş heyvan ikinci dəfə ora güllə kimi gedir, ayağının altını görmür, nə olsa basıb keçir.                                                                                                                                                    

İndi bizim bəzi siyasətbazlar - alçalmaqla ucalmaq istəyənlər də yalan vədlərə inanıb mandat eşqi ilə saxta seçkilərə qaçdılar, üzü üstə yerə sərilib kor - peşman əliboş qaldılar.                                                                                                                                                    

Bax, belə yerdə atalar deyib ki :  “ Getdilər kabab iyinə, gördülər eşşək dağlayırlar...”   

Mətləb Mütəllimli, istiqlalçı millət vəkili