Vüqar İskəndərov: “Bu qurumun keçirdiyi tədbirlərə qatılan hər bir gənc bundan nələrsə qazanır, nələrsə öyrənir”
“Nərimanov Rayon Gənclər və İdman İdarəsi tərəfindən keçirilən tədbirlər həm məzmunca, həm də keyfiyyətcə effektivdir”
Azərbaycan Respublikasının Gənclər və İdman Nazirliyinin Nərimanov Rayon Gənclər və İdman İdarəsi uzun müddətdir ki, vətənpərvərlik istiqamətində mütəmadi layihələr həyata keçirməkdə, şəhid ailələri, qazilər, Milli Qəhrəmanlarla bağlı maraqlı tədbirlər təşkil etməkdədir. Şəhidlərin xatirəsinə idman turnirlərinin keçirilməsi, şəhid ailələrinin gənclərin iştirakı ilə ziyarət edilməsi, Azərbaycanın görkəmli şəxsiyyyətləri, qəhrəmanları ilə bağlı müsabiqələrin keçirilməsi və s. buna nümunədir.
Moderator.az-a açıqlamasında Nərimanov Rayon Gənclər və İdman İdarəsinin fəaliyyətini şərh edən millət vəkili Vüqar İskəndərov, adıçəkilən qurumun fəaliyyətinin təqdirəlayiq olduğunu vurğulayıb:
“Azərbaycan Respublikasının Gənclər və İdman Nazirliyi gənclərin vətənpərvərlik ruhunda tərbiyə edilməsində, onların orduya, hərb sənətinə marağının artmasında, qəhrəmanlarımızı, şəhidlərimizi tanımasında, onların xatirəsinin əbədiləşdirilməsində mühüm rol oynayan qurumlardan biridir. Nazirliyin yerli idarələrində də bu yöndə mütəmadi tədbirlər həyata keçirilməkdə, layihələr reallaşaşdırılmaqdadır.
Bildiyiniz kimi, dünyada mövcud olan pandemiya səbəbindən bir çox tədbirlər təxirə salındı, bəzi tədbirlər onlayn şəkildə həyata keçirildi. Nərimanov Rayon Gənclər və İdman İdarəsi həm pandemiyadan öncə, həm də pandemiya dönəmində aktiv, faydalı və səmərəli fəaliyyət ortaya qoyub. Nərimanov Rayon Gənclər və İdman İdarəsinin vətənpərvərlik sahəsində həyata keçirdiyi layihələri xüsusi qeyd etmək lazımdır.
44 günlük Vətən müharibəsi dönəmində belə Nərimanov Rayon Gənclər və İdman İdarəsi bu səpgidə çox maraqlı tədbirlər təşkil etdi. Ümumiyyətlə, Nərimanov rayon gəncləri öz aktivlikləri ilə hər zaman diqqəti cəlb edib. Heç şübhəsiz ki, bu aktivliyin fomalaşmasında, aktiv gənclərin bir araya gətirilməsində, onların fəaliyyətinin əlaqələndirilməsində, bu fəaliyyətin istiqamətləndirilməsində Nəriman Rayon Gənclər və İdman İdarəsinin böyük əməyi var.
Nərimanov Rayon Gənclər və İdman İdarəsi öz işinin öhdəsindən layiqincə gəlir. Mən hər zaman Milli Məclisin Gənclər və İdman komitəsinin üzvü kimi, habelə Nərimanov Rayon Gənclər və İdman İdarəsinin rəhbəri Nəcəf müəllimi şəxsən tanıyan bir şəxs kimi sözügedən idarənin tədbirlərini maraqla izləşmişəm. Görmüşəm ki, Nərimanov Rayon Gənclər və İdman İdarəsi tərəfindən keçirilən tədbirlər həm məzmunca, həm keyfiyyətcə effektiv tədbirlərdir. Bu tədbirlərə qatılan hər bir gənc həmin tədbirdən müsbət, faydalı nələrsə qazanır, nələrsə öyrənir. Hər belə tədbir ora qatılan gənclərin inkişafı, dünyagörüşü baxımından faydalı olur. Bu baxımdan Nərimanov Rayon Gənclər və İdman İdarəsinin fəaliyyətini yüksək qiymətləndirir, onlara öz fəaliyyətlərində yeni-yeni uğurlar arzulayıram”.
Seymur ƏLİYEV