Müxalifət, partiyadaşları və britaniyalıların 66%-i onun istefasını tələb edir
Boris Consonun kreslosu getdikcə daha çox laxlayır: Böyük Britaniyanın Baş naziri ölkədə koronavirusla mübarizə ilə bağlı sərt tədbirlər görüldüyü bir vaxtda iqamətgahının bağındakı ziyafətdə iştirak etdiyini etiraf edib. Onun istefasını təkcə müxalifət tələb etmir - sorğulardan əldə olunan məlumatlar Consonun britaniyalıların böyük əksəriyyətinin dəstəyini itirdiyini göstərir. "Teflon Boris" sakitliyini qoruyur və daxili araşdırmanı gözləməyə çağırır.
Moderator.az bildirir ki, bu barədə Almaniyanın “Süddeutsche Zeitung” nəşri yazır. Artıq yeni il başlayıb, lakin Boris Conson üçün sanki köhnə il hələ bitməyib. “Omikron” hücum etməkdə davam edir, elektrik və qaz qiymətləri artmaqdadır, inflyasiya həyəcanverici səviyyələrə çatıb, Britaniya parlamentində isə ancaq ziyafətlərdən danışırlar. Bir neçə həftədir ki, Britaniya mediası, eləcə də bir çox millət vəkilləri qapanma zamanı “Downing Street”də ziyafətlərin keçirilib-keçrilmədiyini, orada neçə nəfərin və kimin iştirak etdiyini araşdırır. Detalların bolluğu heyrət doğurur: görüşlərin uzun siyahısına "Şərab və pendir" adlı tədbirlər, həmçinin viktorina gecəsi də daxildir. Şəkillər də var. Baş verənlər mühüm Qərb dövlətinin siyasətinə bənzəmir, komik vəziyyəti xatırladır, - deyə alman nəşri yazır.
Ancaq bütün bunlar, xüsusən də Boris Conson üçün, o qədər də gülməli deyil. Tez-tez "patigeyt" adlandırılan işin nəticəsi ən azı bir neçə gün əvvəl Consonun özünün iştirak etdiyi bir bayramla bağlı yayımlanan elektron məktubdan sonra onun baş nazir kimi gələcəyi ilə sıx bağlıdır.
Məktub 20 may 2020-ci ildə Consonun katibi Martin Reynolds tərəfindən göndərilib. “Hər kəsə salam”, - deyə məktub belə başlayır. Başlıq isə belədir: "İçkilər sosial məsafə şəraitində!" Müəllif yazır ki, gərgin iş həftələrindən sonra "yaxşı havadan faydalanmaq" və “Downing Street, 10” ünvanındakı evin bağçasında “sosial məsafə şəraitində bir qədər içki" içmək lazımdır. Məktub bu cümlə ilə bitir: “İçkilərinizi özünüzlə gətirin”.
20 may 2020-ci il tarixində Britaniyada sərt karantin rejimi qüvvədə idi. Ziyafətin başlamasına təxminən bir saat qalmış mətbuat konfransında mədəniyyət naziri Oliver Douden ölkədə koronavirusun sürətlə yayılması ilə əlaqədar ehtiyatlı olmağl bir daha xatırladıb. "Başqa biri ilə çıxıb küçədə görüşə bilərsiniz", - deyə Douden bildirmişdi. Ziyafətdə təxminən 40 nəfərin iştirak etdiyi deyilir.
Bir neçə mənbənin verdiyi məlumata görə, kiçik qruplardan ibarət adamlar qırmızı şərab və cin almaq üçün Vestminsterdəki “Tesco” supermarketinə tələsirmiş. Deputatlardan biri isə oradan keçdiyi vaxt səs-küydən təəccübləndiyini bildirib.
Mühafizəkar deputat Naycel Mills çərşənbə günü deyib: "Əgər o, şüurlu şəkildə ziyafətlərə qatılıbsa, salamat qurtarmayacaq". "Qoruya bilmədiyin şeyi necə qoruya bilərsən?" - deyə mühafizəkar Kristian Ueykford “Twitter”də soruşur. Consonu tənqid edən partiyadaşlarının sayı o qədər çoxdur ki, onların bəyanatlarını bir yerə toplamaq mümkün deyil. Bundan əlavə, son sorğular göstərir ki, britaniyalıların böyük əksəriyyəti Consonun istefasının tərəfdarıdır. Londonda yerləşən “Savanta ComRes” institutunun məlumatına görə, Böyük Britaniyada seçicilərin 66%-i və 2019-cu ildə ona səs verənlərin 42%-i baş nazirin dərhal istefasını tələb edir.
Son bir neçə gündə Boris Conson sükutu qoruyurdu. Yalnız çərşənbə günü günortadan sonra parlamentin həftəlik sual-cavab iclasında Conson bəyanatla çıxış edib. O, həmişə olduğu kimi "üzr istəyirəm" sözləri ilə canlı yayımda çıxışına başlayıb və bildirib ki, vətəndaşların hiddətini anlayır. Mayın 20-də axşam saatlarında isə hökumət binasının yaxınlığındakı bağçaya çıxaraq orada olan əməkdaşlara zəhmətlərinə görə təşəkkür edib və 25 dəqiqədən sonra kabinetinə qayıdıb. "Geriyə baxanda mən başa düşürəm ki, hamını binaya qaytarmalıydım", - deyə söyləyən Conson səhvinə görə "tam məsuliyyəti" öz üzərinə götürüb. O, sözügedən görüşü iş tədbiri kimi qəbul edib.
Leyboristlər Partiyasının rəhbəri və müxalifət lideri Kir Starmer Consonu istefaya çağırmaq üçün iki sualdan istifadə edib. Starmer əvvəllər heç bu qədər uzağa getməmişdi. Onun sözlərinə görə, Consonun üzr istəməsi “gülünc” və “dəyərsiz” olub. Palatanın bir çox digər üzvləri də Consonun istefasını tələb ediblər, bəziləri açıq şəkildə qəzəbləndiklərini bildiriblər. Conson həmişəkindən daha sakit bir tonda onların qəzəbini anladığını söyləsə də, daxili araşdırmanın cavabını gözləməyə çağırıb. "O zaman məndən nə istəsəniz soruşa bilərsiniz", - deyə Conson vurğulayıb.
Yüksək səviyyəli hökumət rəsmisi Syu Qreyin rəhbərlik etdiyi istintaq iddia edilən yeddi ziyafəti araşdırır. Nəticələrin nə vaxt məlum olacağı hələ ki, bəlli deyil. Hələlik söhbət gələn həftədən gedir. Bu arada, çərşənbə günü “The Independent” nəşrinin verdiyi xəbərə görə bir neçə işçidən telefon və noutbuklarından "hətta ziyafətərlə uzaqdan belə əlaqəli ola biləcək" hər şeyi silmək tələb olunub. Bu həftədən etibarən London polisi də xüsusi araşdırmaya başlayıb.
Bəzən "Teflon Boris" adlandırılan Conson vəziyyətin ciddiliyini anlayır. Çərşənbə günü sual-cavab sessiyasından sonra o, vaxtilə bir çox baş nazirlərin dəfələrlə xoş, mehriban şəraitdə söhbət etmək və müəyyən mənada “təşviqat” aparmaq üçün gəldiyi parlament binasındakı çayxanaya gedib. “Süddeutsche Zeitung” qeyd edir ki, deyilənə görə, Boris Conson orada çox nadir hallarda olardı.
Miraslan
