"Dövlətin elm üçün ayırmaları yaxın 3-4 ildə artmazsa, böyük ehtimalla Ermənistan Respublikası yaxın illərdə mövcud olmayacaqdır".

Moderator.az xəbər verir ki, bu fikirləri qəsbkar Ermənistanın hazırkı gerçək miskin durumunu təhlil edərək həyəcan təbili çalan erməni alim, “Qituj” təşəbbüsünün üzvü, fizika-riyaziyyat elmləri namizədi Jirayr Avetisyan sosial şəbəkədə paylaşıb.  

 

Bunu radikal və şişirdilmiş hesab edənlər üçün alim Ermənistanın görünməmiş sürətli inkişafı bu gün başlamazsa, sabah Ermənistanın müstəqil bir geosiyasi varlıq olaraq varlığını dayandıracağını və ya rəsmi bir qurum olaraq qalsa da, dünyada çox az rol alacaq, az inkişaf etmiş, az məskunlaşmış, geridə qalan bir əyalət olacağı  iddiasını əsaslandırır. 

 

“Son müharibə ətrafında baş verən hadisələr də daxil olmaqla son illərin prosesləri, ölkəmizdə baş verən bütün siyasi və demokratik olaylara rəğmən dünyada heç kimin bizə ehtiyacının olmadığını, heç kim üçün maraqlı olmadığımızı anlamağımıza kömək etməlidir. Təəssüf ki, bu, təbiidir. Ciddi bir geopolitik mövqe, ərazi tuturuq, ancaq dünyaya heç bir fayda vermirik və ya çox az təklif edirik. Təqdim etdiyimiz xidmətlərin isə keyfiyyəti aşağıdır, dünyaya təklif edə biləcəyimiz şey heç kimə lazım deyil. Bir oyunçuya ehtiyac yoxdursa, o, oyun sahəsindən çox tez çıxarılır. Son müharibənin dünya tərəfindən bizə verilən “sarı kart” olduğunu deyə bilərik ”-deyə J.Avetisyan vurğulayır.

 

Avetisyana görə, Ermənistan müstəqilliyinin ilk illərindən keçid dövrü olan bir ölkə kimi qəbul olunurdu və özünü dünyaya tanıtmağını gözləyirdilər, kim olmağı arzuladığını,  dünyanın inkişafında hansı rol oynamaq istədiyini, dövlətçiliyi ilə nə etmək istədiyini görmək istəyirdilər. 

 

“Gözlədik, gözlədik, 30 il keçdi. Amma, deyəsən, bu suallara cavab tapa bilmədik. Üstəlik, boş istehlakçı statusuna uyğunlaşdıq. Və xarici güclərdən ötrü bu bölgədə boş  istehlakçıların  qalması çox vacibdir. Yaxın müddətdə özümüzü dünyaya yeni bir mesajla çox kəskin şəkildə təqdim etməsək, sürətlə inkişaf etməyə başlamasaq, o zaman önümüzdəki illərdə “qırmızı kart” alacağıq” - deyə erməni alim təəssüf hissi ilə bildirib.