Son dəfə artırılan təqaüdlərdən sonra bəzi hərbçilər məni pensiyaların təqauddə olan hərbçilərə aid olmadığına fikir bildirməməkdə günahlandırır. Əslində mən bu barədə ehtiyatda olan zabitlərin onlarla şəxsi sorğularına, bəzilərinin isə dəfələrlə verdiyi suallara açıqlama vermişəm. Onlara dediklərim ilə aşağıda yazdıqlarım arasında nöqtə qədər fərq yoxdur. 

 

Prezident İlham Əliyev tərəfindən 23 dekabr 2021-ci il tarixdə “Azərbaycan Respublikası Müdafiə Nazirliyinin həqiqi hərbi xidmət hərbi qulluqçularının aylıq pul təminatının və dövlət qulluqçusu olmayan mülki işçilərinin aylıq vəzifə (tarif) maaşlarının artırılması haqqında” Fərman imzalayıb.

 

Fərmana əsasən, "İşğaldan azad olunmuş ərazilərdə Azərbaycan Respublikası Müdafiə Nazirliyinin həqiqi hərbi xidmət edən hərbi qulluqçularının aylıq vəzifə maaşlarına Azərbaycan Respublikası Prezidentinin əlavəsinin müəyyən edilməsi haqqında” Azərbaycan Respublikası Prezidentinin 2021-ci il 25 iyun tarixli 2727 nömrəli Sərəncamı ilə Azərbaycan Respublikası Müdafiə Nazirliyinin həqiqi hərbi xidmət hərbi qulluqçularının aylıq vəzifə maaşlarına Azərbaycan Respublikası Prezidentinin əlavəsinin müəyyən edildiyini nəzərə alaraq, Azərbaycan Respublikası Müdafiə Nazirliyinin həmin əlavənin şamil olunmadığı həqiqi hərbi xidmət hərbi qulluqçularının (müddətli həqiqi hərbi xidmət hərbi qulluqçuları və Azərbaycan Respublikası Müdafiə Nazirliyinin əməliyyat briqadalarının və əlahiddə ümumqoşun ordusunun tabeliyində olan xüsusi təyinatlı briqadaların hərbi qulluqçuları istisna olmaqla) aylıq vəzifə maaşlarına həmin maaşın 20 faizi məbləğində əlavə müəyyən edildi.

Bundan başqa dövlət baçşısı tərəfindən imzalanan digər Fərmanlar ilə digər güc strukturlarında xidmət edən hərbi qulluqçuların maaşlarına da əlavələr edildi. Digər artımlar isə əsasən şəhid ailələrini, əlilləri, az gəlirli kateqoriyadan olan kitabxana və təhsil işçilərini, tələbələri, valideyn himayəsindən məhrum olmuş uşaqların qəyyumlarını (himayəçilərini), əmək və yaşa görə təqaüdə çıxan mülki vətəndaşlarımızı əhatə etdi. Dövlət büdcəsindən maliyyələşən sahələrdə çalışan işçilərin maaşlarının minimum məbləği də 300 manata çatdırıldı. Son artımda əsasən minimum əmək haqqı alanlar, əlillər, az maaş və təqaüd alan kateqoriyanın nəzərə alındığını müşahidə etmək də çətin deyildi.  Xidmət edənlərin hərbçilərin xidmət şəraitini nəzərə almaqla vəzifə maaşlarına edilən əlavələr isə daha çox  təhlükəsizlik ilə bağlı olduğunu düşünürəm. Hərbçilərdən kim istəsə bu barədə 070 241 45 69 nomrəsi ilə əlaqə saxlaya bilər və ona mətbuat üçün nəzərdə tutlmayan qısa açıqlama da verə bilərəm. Halbuki hərbidən kənar mövzularda mənə müraciətlər olanda, açlqlama verməkdən imtina edirəm.

 

Erməni işğalı 30 il Qarabağda övladlarımızı uddu, bundan sonra da şəhidimizin olmayacağına və təxribatların bitəcəyinə də zəmanət yoxdur. İndi isə erməni vandalizminin nəticələri, onların aradan qaldırılması və Qarabağın bərpası milyardlarla vəsaitimizi udur. Belə bir vəziyyətdə mənim də maraqlarıma xidmət edəcək pensiya artımı barədə nəsə yazmağımın doğru olmadığına əminəm. İndiyə qədər olan artımlar kiminsə bu barədə müraciət etməsi, status və ya məqalə yazması nəticəsində baş vermədiyini, bunun bü gün də belə olduğunu hər kəs görür. 

 

Hesab edirəm ki, istənilən halda pensiya artımı ilə maliyyəçilər, məhkəmə iddiaları ilə peşəkar hüquqşünaslar məşğul olmalıdır. Əks halda hüquqi müstəvidə uğurlu nəticəyə nail olmaq mümkün deyil və buna da hamımız bir daha əmin olduq. Bu işlə məşğul olanlar, təqaüdün artırılmamasına görə icraçı qurum olan ƏƏSMN-i ittiham etmələri də ciddi təəccüb doğurdu. ƏƏSMN-nin yanlışları olub, indi də var,  məsələn saxta əlillik üçün qərar qəbul edən həkimlərin və bu qərarları təsdiq edən qurum rəhbərlərinin əksəriyyəti hələ də həbsdə deyil. 

 

ƏƏSMN ilə veteran və əlil problemlərinə görə əlaqə qururam, müəyyən problemlər hələ də mövcuddur. Nəticə əldə olunmayanda şikayətçiyə məhkəməyə müraciət hüququndan istifadə etməyi təklif edirəm. Amma ehtiyatda olan hərbçilərin icraçı qurum olan ƏƏSMN-dən hesabat tələb etməsi tam yalnışdır. Ehtiyatda olan hərbçilər ƏƏSMN-dən daha çox Müdaiə Nazirliyinə yaxın deyilmi? Şəbəkə təqaüdlə bağlı zabitlərin MN-ə deyil, ƏƏSMN-ə ünvanlaması da diqqəti cəlb edir. Hamıya gün kimi aydındır ki, ehtiyatda olan hərbçilər məhz Müdafiə nazirinin rəhbərliyi altında xidmət edib. Bəzi zabitlərin məlum səbəblərdən müraciətlərində Müdafiə Nazirliyinə deyil, ƏƏSMN-ə müraciət etməsi yalnış hesab edirəm. Bunun ƏƏSMN-nin asanlıqla işin altından çıxması da nümayiş etdirdi. Əslində maaşların artırılmasına dair büdcəyə düşəcək əlavə yük və gələcəkdə xərclənməsi nəzərdə tutulan vəsaitlərin maliyyə ekspertizasının Müdafiə Nazirliyinin Maliyyə İdarəsində aparıldığı, maaş artımının yalnız xidmət edənlərə aid edilməsi təklifi də bu qurumdan verildiyi və Maliyyə Nazirliyi ilə razılaşdırıldığı şübhəsizdir. Müdafiə Nazirliyinin təklifinin də qismən əsassız olmadığını bilirəm, amma bu ehtiyatda olanların diqqətdən kənarda qalmasına imkan vermir.  

 

Bu ilin ilk ayında dəfələrlə artıma nail olunması və pensiyanın yenidən hesablanması barədə əsassız xəbərlər medaiada geniş paylaşıldı, proseslərin əhatə dairəsinin kimə aid olduğunu araşdırmayan bəzi hərbçilər də bu xəbərləri “Nəticə əldə etdik” başlığı ilə müəyyən fasilələrlə bir neçə dəfə tirajladılar. Mən isə buna ciddi reaksiya vermədim, çünki artımın və ya pensiyanın yenidən hesablanmasının kimə aid olduğu rəsmi məlumatda konkret olaraq göstərilmişdi və bunun ehtiyatda olan hərbçilərə aid olmadığı aşkar idi. ƏƏSMN bu il ilk dəfə fəaliyyətlərində mövcud olan çatışmazlığı rəsmən etiraf eməsini də müşahidə etdik. Amma bunu elan etmədən də fəaliyyətinə davam edə bilərdi. 

 

Əgər 23 dekabr tarixli Fərmanla ehtiyatda olan hərbçilərin pensiyasının artırılması məqsədi olsaydı, “vəzifə maaşına əlavə” əvəzinə hər dəfə olduğu kimi bu dəfə də “vəzifə maaşın artırılması” yazılardı. “Əlavə”lərin pensiyada nəzərə alınması müvafiq qanunda yer alsa da, bu söz üzərində manipulyasiya, məhkəmə qərarının qəbul edilməsi ilə əhəmiyyətini itirdi. Xidmətdə olanların daha yüksək maaş almasında maraqlı olan dövlətin məqsədlərini peşəkar hərbçilər tərəfindən  anlaşılması elə də çətin məsələ olmalı deyildi.  

 

Vəzifə maaşlarına əlavə təqaüddə olan hərbçilərə aid edilməməsi Konstitutsiya məhkəməsinin qərarı ilə təsdiqlənibsə, bu qərardan üst məhkəmələrə, o cümlədən AİNM-yə şikayət üçün peşəkar hüquqşünasların bu işlə məşğul olması zərurəti yaranır. Əgər bu müraciətlə təqaüdün artırılmasına 1 faiz ümidim olsaydı, əvvəlcədən yenə də hansısa şəkildə bu məsələyə reaksiya verərdim. İndi bu barədə yazmağımda məqsəd, sadəcə hörmət bəslədiyim zabit yoldaşların xahişini yerinə yetirməkdən ibarətdir. Amma bu o demək deyil ki, mən bu istiqamətdə tamamilə fəaliyyətsiz qaldım. Aidiyyəti qurumlarla, deputatlarla müzakirələr apardım, sorğular göndərdim, canlı efirlərə qoşulub müvafiq vəzifəli şəxslərlə ehtiyatda olan hərbçiləri maraqlandıran suallara cavab almağa çalışdım. Son dəfə “Yeni Müsavat” Media Qrupunun təsisçisi və rəhbəri Rauf Arifoğlunun müəllifi və aparıcısı olduğu “Dərin Təhlil”-in 11-ci yayımında qonaq olan Milli Məclisin deputatı, Milli Məclisin Əmək və sosial siyasət komitəsinin sədri, Yeni Azərbaycan Partiyasının İdarə Heyətinin üzvü, Tibb üzrə fəlsəfə doktoru, şair-publisist Musa Quliyevə də ehtiyatda olan hərbçilərin təqaüdünün artılmaması, ərazaq əvəzinə ödənilən kompensasiyanın məbləği və müharibədə yaralandığınına görə xidmətdən tərxis olunan, lakin əlil olmayan hərbçilərin iş və təqaüd təminatı ilə bağlı suallarımı verdim. Ümumilikdə aldığım cavab bundan ibarət oldu ki, yaxın zamanda ehtiyatda olan hərbçilərin təqaüdünün artılması məsələsinə baxılacaq. Mən bu məsələlər ilə bağlı aidiyyəti qurum və şəxslər ilə görüşlərimi davam etdirirəm. 

 

Cavablar barədə səhifəmdə paylaşım etmişəm. Tanış olmaq istəyənlər aşağıdakı linkin 21.14-cü dəqiqəsindən sonrakı hissəsini izləyə bilərlər

 

 

 

Yeri gəmişkən bir haşiyə də çıxım: Mənim atam 40 illik staj ilə məndən 2.5 dəfə az, anam isə 5 uşaq böyütməklə atamdan da az, mən isə onların hər ikisinin aldlğından iki dəfə çox təqaüd alıramsa, mən öz təqüdüm barədə nəsə yazmağım və ya bu pensiya miqdarına üsyan etməyim şəxsim adına etikadan kənar hərəkət ola biləcəyinə də inanıram. Amma ehtiyatda olan hərbçilərin və ya digər təqaüdçülərin gəlirlərinin azalmalı olmadığını, ən azı illik inflyasiyaya uyğun indeksləşmə aparılmasının da tam tərəfdarıyam. 

 

Hərbçilər daim dövlətin təhlükəsizliyinin qarantı, vuran qolu, görən gözü, etibarlı dayağı olub. Azərbaycan dövlətinin ən həssas dönəmdən keçdiyini də nəzərə almalıyıq. Hesab edirəm ki, hər birimiz hərbçi belə bir dönəmdə əvvəllər olduğu kimi imkanlarımızı 7 cəbhədə üstümüzə gələn düşmən və rəqibləri neytrallaşdırmağa yönəltməliyik. Mən ağlım kəsən gündən bütün imkanlarım ilə daim dövlətimizin, Qarabağımızın və hərbçilərimizin yanında olmuşam. Mənim bu fəaliyyətimdə əsas rəqiblərim düşmən Ermənistanın hərbi-siyasi rəhbərliyi, işğalçı erməni ordusu, dövlətimizin və ordumuzun nüfuzuna ziyan vurmağa cəhd edənlərdir.   

 

Əsas fəaliyyət istiqmətim bundan sonra dəyişməz olaraq qalacaq: 

 

düşməni və onun silahlanmasını izləmək, onun mümkün fəaliyyət istiqamətlərini proqnozlaşdırmaq;

 

münaqişə və müharibələr, tətbiq edilən yeni silahlı mübarizə vasitə və üsulları ilə bərabər oxucuları Qarabağda baş verənlər haqqında dəqiq məlumatlarla vaxtında təmin etmək.  

Şəhid ailəsi, əlil və vetranlarımızın problemlərinin həllində isə əlimdən gələni daim etmişəm və bunu özümə vəzifə borcu hesab edirəm. Bundan sonra da bu vəzifə mənim üçün prioritet olaraq qalacaq. Adı çəkilən kateqoriyadan olan vətəndaşlarımızın problemlərini dinləmək və həlli istiqamətində addımlar atmaq üçün telefonum 24 saat açıqdır. Bu fəaliyyətimdə mənə yardım edənlər də az deyil, onların arasında ayırca vətəndaşlarımız, xaricdə yaşayan soydaşlarımız az deyil. YASAT fondu, REAl.TV-nin

QAZİ verilişi, Moderator.az İnformasiya Agentliyi, Azvizion.az saytı, Səngər TV və digərləri bu istiqamətdə mənim və maraqlarını təmsil etdiyim kateqoriya üçün xüsusi əhəmiyyət daşıyır. Onların hamısına dərin təşəkkür edirəm.  

 

Əbəttə ki, ölkədə vətəndaşların, o cümlədən hərbçilərin pensiyalarının artırılmasına zərurət yaranıb. Kommunal xidmətlər, ərzaq və ümumilikdə həyat bahalaşıb, bunu da ölkədə hər kəs bilir. Cənab Ali Baş Komandan İ.Əliyev hər bir zaman hərbçilərimizin hərtərəfli təminatını diqqət mərkəzində saxlayıb, bunun gələcəkdə də belə olacağına heç bir şübhəm yoxdur, cünki Prezidentimizin bir nəfər şərəfli Azərbaycan zabitindən ötrü bütün Avropanın hüquq sisteminin altına üstünə çevirdiyini heç zaman unuda bilmərik. Təkbaşına dünyanın nəhəng media qurumları ilə təkbaşına savaşan və hamımızın müqəddəs arzusu olan Qarabağ zəfərinin memarı olan Ali Baş Komandan, ölkəmizin təhlükəsizliyində mühüm rol oynayan ehtiyatda olan hərbçilərin təqaüdlərini də mütləq nəzərə alacaq. 

 

Diqqətə almalıyıq ki, bu artımların bütün ölkə vətəndaşlarını və güc strukturlarını paralel əhatə etməsi asan vəzifə deyil. Pandemiyanın yaratdlğl maliyyə yükünü, Qarabağın bərpasına xərclənən milyardları nəzərə almalıyıq. Azad edilən ərazilərin bərpasına keçən il Ermənistan ordusunun illik büdcəsinin 2 qatı qədər vəsait sərf olunub, bu il üçün bundan da çox vəsait nəzərdə tutulub. Getdikcə xərclərin artacağı da gözlənilir. Bütün bu ağır xərclərə baxmayaraq, ümid edirəm ki, ehtiyatda olan hərbçilərin təqaüdlərinin artırılması üçün dövlətimiz tərəfindən yaxın aylarda müsbət addımlar atılacaq. 

 

Hazırda hər bir vətəndaşımızın, xüsusilə də hərbçilərimiz əsas vəzifəsi son iki yüz ildə əlimizə düşən tarixi şansdan yararlanıb, bütün Qarabağda Azərbaycan hakimiyyətinin möhkəmlənməsinə, sərhədlərimizin düşmən tərəsindən rəsmi tanınmasına, Zəngəzurdan Naxçıvana ikitərəfli əlaqənin bərpasına, sülh müqaviləsinin imzalanmasına nail olmaqdan ibarət olmalıdır. Ətrafımda olan onlarla ehtiyatda olan hərbçilər, o cümlədən də müraciəti tərtib edənlər müxtəlif sahələrdə, məsələn güc strukturlarında, icra strukturlarında, dövlət qulluğunda, KİV-lərdə, tikintidə, əmlak bazarında, yol inşaatında, daşınmada, aqrar, ərzaq və ticarət sahəsində çalışırlar. Bəziləri azad olunan ərazilərin bərpa işlərində yaxından iştirak edirlər. Qanun hazırda təqaüdçülərə çalışmağı və əlavə qazanc əldə etməyi qadağan etmir. Halbuki əvvəllər təqaüdçü çalışmağa davam edəndə təqaüd ya azaldılırdı, ya da verilmirdi. 

 

Hamımız Azərbaycan üçün, gələcəyimiz olan övladlarımız üçün çalışmaqda davam etməliyik, hökümətimiz isə vətəndaşların, o cümlədən ehtiyatda olan hərbçilərimizin maliyyə imkanlarının yaxşılaşdırılması üçün əlindən gələni etməlidir. Vətən Müharibəsində 7 cəbhədə 7 düşmənlə savaşaraq qalib gələn Azərbaycan vətəndaşları üçün bir neçə ay sonra ödəniləcək 50-100 manat üçün bölünmək deyil, birləşmək və Qarabağ uğrunda ədalətli mübarizəmizi sona çatdırmaq zamanıdır. Tamamilə əminəm ki, bu gün şəhidlərimizin sayəsində əldə etdiyimiz nailiyyətlər üçün çoxlarımız nəinki yuxarıdakı ikirəqəmli məbləğdən, hətta canından belə keçməyə hazır idi. Sözümüz və əməlimiz bir olmalıdır. Problemlərimiz isə zamanla həll olunacaq.