Bunu Moderator.az-a açıqlamasında 1-ci qrup fiziki məhdudiyyətli şəxs Samirə Şirinova deyib. O daha sonra saytımız vasitəsilə şikayətini dilə gətirib.

“53 ildir ki, mənə anam xidmət edir. Anam gözəlliyini, gəncliyini mənə həsr edib, qəhrəman qadındır. Uşağlığımı da, gəncliyimi də çarpayıda keçirmişəm, saçım çarpayıda ağarıb, uşaqlıq, gənclik görməmişəm. Anamın 80 yaşı var, mənə baxmağa artıq gücü, taqəti yoxdur. Baxıcı da çox pul istəyir, aldığım pensiya da 280 manatdır. Bu bizə çatmır. Çox ağır vəziyyətdə yaşayıram, ağrılarım çoxdur, günü-gündən də səhhətim ağırlaşır. Müalicə oluna bilmirəm, Əlillərin Bərpa Mərkəzindən mənə deyirlər ki, növbəni gözlə. 1-ci qrup əlil necə növbə gözləsin? Sonuncu dəfə 2019-cu ilin may ayında müalicə olunmuşam. Tapılmayan iynə-dərmanım var ki, onları ala bilmirəm. May ayından bu yana diqqətdən kənarda qalmışam. 53 ildir ki, 1-ci qrup əliləm, mənə hələ də əlil arabası verilməyib. Cəbrayıl və Suraxanı rayon İcra Hakimiyyəti, rayonumuzun millət vəkilləri hər zaman gəlib mənimlə maraqlanırlar, onlara öz təşəkkürümü bildirirəm. Problemlərim, müalicəm Sosial Müdafiə Fonduna və Əlillərin Bərpa Mərkəzinə aiddir. Gedib sənədlərimi vermişəm, deyirlər ki, səhvdir, sistemdə yanlışlıq olub. Bir sözlə, get-gələ salırlar adamı. Mənim arabam da yoxdur ki, tez-tez gedib gəlim”, - deyə şikayətçi bildirib.

 

Qeyd edək ki, Moderator.az-ın əməkdaşı Əmək və Əhalinin Sosial Müdafiəsi Nazirliyinə müraciət edərək Samirə Şirionovanın şikayətinə aydınlıq gətirilməsini xahiş edib. Nazirlikdən bildiriblər ki, Samirə xanımla danışıblar və gələn həftə probleminin həllinə çalışacaqlar: