Xəbər verdiyimiz kimi ötən həftə ölkə başçısı Xalq artisti, tarzən Vamiq Məmmədəliyevin mənzillə təmin edilməsiylə bağlı sərəncam imzaladı.

 

Moderator.az-ın əməkdaşı Bakı şəhər Sabunçu rayonu Kürdəxanı qəsəbəsində Vamiq Məmmədəliyevin yaşadığı ünvana yollanaraq onunla həmsöhbət olub. 

 

Beləliklə, həmin yazını təqdim edirik:

 

Vamiq müəllim onunla telefonda söhbətimiz zamanı görüşümüzü çox xoş qarşıladı və evinə dəvət etdi. Biz də yaşadığı ünvana yollandıq. Məşhur tarzən ilk öncə həyətində yaratdığı miss qablar kolleksiyası ilə bizi tanış etdi. Deyir ki, gözümü açıb ancaq miss qablar görmüşəm, bu qabda yemək yemişik deyə onları yığıb saxlamışam, qalanlarını da başqa yerlərdən tapıb kolleksiyama əlavə etmişəm. 

 

Həyətdə oturub söhbət etmək istəsək də axşamüstünün küləyi bizi üşüdür və deyir ki, evə keçək. Vamiq müəllin yaradıcılıq otağında oturub söhbətimizə davam edirik. Professor uzaq olsa da hər gün Kürdəxanıdan Bakı şəhərinə Azərbaycan Dövlət Mədəniyyət və İncəsənət universitetinə dərsə getdiyini deyir. Maşını da yoxdur, deyir ki, şəhərə gedəndə uşaqlar aparır, qayıdanda isə bir manatlıq taksiyə minib qəsəbəyə qayıdır. Amma ölkə başçısının ona mənzil verməsindən sonra ümidlidir, bundan sonra şəhərdə yaşayacağını və ordan universitetə gedəcəyini deyir. 

 

Vamiq müəllim deyir ki, ataları Məmmədəli kişi dövrünün tanınmış həkimlərindən biri olub. Anası Səidə xanım isə mamaça olub. O vaxt qadınlar ancaq evdə azad olduğu üçün həkim kimi Səidə xanımı çağırırmışlar. Deyir ki, anam öləndə dedi ki, “oğul, o qədər ailə sirləri bilirəm ki, amma bu günə qədər heç kimə deməmişəm və elə bunu da özümlə o dünyaya aparacam”. 

 

 

“Ölkə başçımıza məni mənzillə təmin etdiyi üçün təşəkkür edirəm. Yetmiş beş yaşım var və mənim heç vaxt evim olmayıb. Yaşadığım bu ev mənim qayınatamın evidir. Çünki qayınım olmadığı üçün bu evdə ailəmlə mən qalmışam. Mehriban xanıma isə muğamımıza və biz muğam ifaçılarına göstərdiyi diqqət və qayğıya görə təşəkkür edirəm. Onun layihəsinin əsas mahiyyəti odur ki, sən muğamı sev, bu sənin ana musiqindir. Ərəblərdə də, farslarda da muğam var, amma Azərbaycan muğamı formalaşmış bir formadadır. Bu layihə müzakirə olunanda Heydər Əliyev Fonduna mən də dəvət edilmişdim. Orda yeddi layihə nəzərdə tutulurdu və qısa zamanda bütün bunlar həyata keçirildi. Muğam Mərkəzinin təməlini qoyanda da  iştirak etmişəm”.

 

 

“Mədəniyyət kanalında Səyyarə xanımın “Ovqat” verilişi çox gözəldir. Bir neçə dəfə qonaq olmuşam. Amma qaldı ki, bu gün ara musiqiçiləri efirləri zəbt edib. Kim evləndi, kimin uşağı var, ayrıldı, filankəs ana olacaq kimi mövzuları efirə çıxarırlar. Televiziya güzgüdür. Sovet vaxtında çıxış üçün mətn verirdilər və ordan kənar bir hərəkət edə bilməzdin. Adını şou qoyub bayağı verilişlər təqdim edirlər. Kiminsə ailəsində problem varsa, öz ailəsində həll etməlidir, efirdə yox. Azərbaycanda hər növ adam var və filankəsin necə adam olmasını ancaq qonşusu bilərdi. İndi televiziyada bunu yayımlayırlar. Hər ailənin bir sirri var axı, amma indi it yiyəsini tanımır. Amma dövlət kanallarımız bunları nəzərə alırlar, ciddi verilişlər hazırlayırlar. 

 

Bir müddət öncə İctimai Televiyanın “Sabahın xeyir, Azərbaycan!” verilişində qonaq oldum. Bir fincan da mənə hədiyyə etdilər. Dedim ki, bunu mənə bağışlayın, onsuz da sizdən bir şey görməmişəm. (Gülür) Orda rəhmətlik anamın sözünü misal çəkdim. Anam deyirdi ki, “toyuq da anasından süd görərmiş”. Bu misalı bilən yoxdur, anamın sözüdür. Anam mamaça olduğu üçün 1932-ci ildən 1962-ci ilə qədər uşaqları evdə tutub.  Sonradan qərar çıxdı ki, uşaq gərək xəstəxanada doğulsun. Onda anam öz tibb çantasıyla xəstənin yanında oturub aparıb onu Sabunçu xəstəxanasında təhvil verib qayıdırdı. Özü texnikum bitirmişdi”. 

 

 

“Ataların bir sözü var deyir ki, “bu xəmir çox su apardı”. Bu illər ərzində biz də maraqlanırdıq ki, niyə məsələ uzanır. Zaman keçdikcə yaddan çıxırdı, gənc nəsil bilmirdi Füzuli, Laçın haradır. Müharibə başlayanda dedim ki, Şuşanı işğaldan azad etmək lazımdır. Şuşa işğaldan azad ediləndə də Allaha şükür etdim. Ermənilərə arxayın olmaq olmaz. Dövlətimiz yenə də təlimlər keçir, ordumuzu gücləndirir. Mən sosial şəbəkələrdən uzağam deyə bir çox məsələlərdən xəbərsizəm”. 

 

 

“Bunu məclislərdə Vasim müəllimin özünə də demişəm. Əgər o tar ifa etsəydi, çox yaxşı ifa edərdi. Onun tar ifa etməməsi mənim üçün yol açdı. Vasim müəllim tar dərsinə gedirdi, yaxşı tar ifa edirdi. Muğamlarımızı da yaxşı bilirdi. Amma sonra öz sahəsini seçdi. 1966-cı ildə rəhmətlik Əli Fəhmi ilə Quranın bir neçə ayəsini tərcümə etmişdilər. Amma 1969-cu ildə Moskavadan göstəriş verdilər ki, bunu dayandırın. 1990-cı ildə isə Ziya Bünyadovla birlikdə Quranı tərcümə etdi”. 

 

 

“Hər bir azərbaycanlının hüququ var ki, harda istəsə yaşaya bilər. Bakılılar bir az şovinistdir. Filankəs rayondan gəlib, nə bilim və sair kimi sözlər işlədirdilər. İndi Kürdəxanıda adamlara deyirəm ki, nə oldu, bütün rayonlarla qohum oldunuz. Dedim ki, kim haralıdır sözlərini tərgidin. O vaxt bakılıların çoxu sürücülük sahəsinə maraq göstərirdi. Amma rayon camaatı Bakıya gəlib avqustun 1-dən 20-nə qədər bağlarda kitab oxuyub ali məktəb imtahanına hazırlaşırdı. Amma bakılılar alverə gedirdi. Bununla yanaşı, Bakıda da oxuyanlar olub.  Məsələn,Vasim müəllim, mən, bir çoxları”.