Bunu Moderator.az-a açıqlamasında bu gün doğum gününü qeyd edən sevilən aktrisa Ülviyyə Əliyeva bildirib. O daha sonra əlavə edib.

“Mənim üçün bir doğum günümdə, bir də yeni il gecəsi hesabat olur. Bu ilim necə keçdi? Bu il ərzində nələr etdim? Nələrə nail oldum? Şükür bugünkü günümə, ilimə. Hər dəfə şükür edirəm. 40 yaşım var, insan var ki, yaşını gizlədir. Mən hər yaşımla, alnımdakı qırışımla fəxr edirəm. Şükür Allahın verdiyi ömürə. Bu il doğum günümü şəhidlərə görə qeyd etməyəcəyəm. Düzdü, toyda olmuşam, kiminsə ad gününə getmişəm, çünki məcbur idim kimlərəsə görə iştirak etməyə. Amma doğum günümdə evdə yoldaşımla ikimiz olacağıq, sıradan bir gün kimi doğum günümü keçirəcəyəm”, - deyə tanınmış aktrisa bildirib.

 

“2 ildən çoxdur ki, səhnəsiz, teatrsız qalmışıq. Bu həqiqətən də dəhşətlidir. Şəxsən öz adıma deyirəm, mən səhnə ilə nəfəs alıram. İki ildir ki, elə bilirəm doğma evimə, ailəmə həsrətəm. Bütün tamaşalarımız üçün darıxmışam, çünki hər oynadığım tamaşa mənə doğmadır. Hər tamaşanın üzərində ən azı orta hesabla 6-8 ay, bir çox hallarda isə 1 il əziyyətimiz olur. Bütün sevilən obrazlarımız bizim əziyyətimizin bəhrəsidir, ona görə də bütün tamaşalarımız üçün darıxmışam. Bu gün mənə desələr ki, gəl filan tamaşanı oyna, o dəqiqə gedib oynayaram. Hər bir tamaşa yadımdadır, mahnıları, mizanları. Baxmayaraq ki, iki ildir səhnəyə çıxmıram. Yetər ki, bircə pərdəni açsınlar və biz oynayaq. Mən eyni zamanda həm də Dövlət Kukla Teatrında çalışıram. Karantin şərtləri nisbətən yüngülləşəndən sonra Milli Onkologiya Mərkəzində xərçəngdən əziyyət çəkən uşaqlar üçün “Şəngülüm, Məngülüm” mono kukla tamaşası oynadım. Bu günlərdə Lənkəranda və İçərişəhərdə Asan Könüllülərin birgə layihəsi olan şəhidlərin övladları üçün yenə də bu tamaşanı oynadım. İnanırsınız ki, bu tamaşaları məşqsiz oynamışam. İki gün əvvəl zəng etdilər ki, sabah yox birigün tamaşa oynayırsan, dedim ki, gözüm üstə. Çıxdım tamaşanı oynadım, xırda detalına qədər yadımda idi. Aktyor üçün səhnə havadır da. Bizim havamızı niyə bağlayıblar mən bilmirəm. Əgər bu gün kafe, restoranlar açıqdırsa, əgər toylara icazə varsa, böyük stadionlarda idman yarışları keçirirlərsə, niyə ara məsafəni saxlamaq şərtilə aktyorlara icazə vermirlər ki, doğma evlərinə, yurdlarına qayıtsınlar?! Axı biz sənətimizlə nəfəs alırıq. Bəlkə də bu sözlərim kimlərəsə gülməli gələ bilər, çünki biz sənətçilər tam başqa dünyanın insanlarıyıq. Hamı üçün bu dünyada dəyərli olan nələrsə var, mənim üçün də ən dəyərlisi doğmalarımdan sonra səhnədir. Heç bir televiziya layihəsi, heç bir film, serial teatrın yerini vermir. Əhd etmişəm ki, teatrların açılmasına icazə versinlər, səhnəni öpəcəyəm. Pərdə açılıb tamaşaçıları görməyənə qədər inanmaram ki, bizə icazə verdilər tamaşa oynamağa”, - deyə aktrisa bildirib.

 

“Mənim üçün hər bir yeni obraz arzuladığım obrazdır. Çünki hər bir yeni obraz mənim üçün yeni sınaqdır, yeni bir pillədir. Pandemiyaya baxmayaraq, fəaliyyətimi davam etdirirəm. Həm birinci Qarabağ, həm də ikinci Qarabağ müharibəsi haqda çəkiləcək bir filmə dəvət almışam, inşallah, sentyabr ayının sonunda çəkilişlərimiz başlayacaq. Filmin rejissoru Səidə Haqverdiyeva, ssenari müəllifi isə Sevda Sultanovadır. Müharibə ilə bağlı Azərbaycanda çox filmlər çəkilib, hələ bu səpkidə bir film olmayıb. Bu filmdə mən Xocalı faciəsini görən, o dəhşətli hadisələrə şahidlik edən bir xanımı oynayıram. İnşallah, teatrlar açılsın bu filmin tamaşasını da hazırlamağı planlaşdırırıq”, - deyə Ülviyyə Əliyeva bildirib.