Moderator.az xəbər verir ki, bunu millət vəkili Fazil Mustafa Şuşanı dünyaya tanıtmaq üçün görülən işlər barədə danışarkən deyib. Millət vəkili bundan sonrası üçün təkliflər də verib:

 

"Fikrimcə, festivallardan, məscidlərdən başqa Şuşanın fərqli bir tanıtımını da gerçəkləşdirməliyik. Burası daha çox səhiyyə turizmi üçün ən əlverişli məkan ola bilər. İndidən bu məkanın səviyyəli və inandırıcı reklamını işə salmalıyıq. Fizulidə tikiləcək hava limanı buraya olduqca rahat və çevik gəliş-gedişi təmin edəcək. Festival da, məscid də daxili auditoriyamız üçün cəlbedicidir. Biz həm də xarici aləm üçün Şuşanı cəbedici duruma gətirməliyik. Yaxşı olar ki, Bakıdakı Dövlət Mədəniyyət və İncəsənət Akademiyası Şuşaya köçürülsün. Bina və yataqxana infrastrukturunu da yaxın zamanlarda yaratmaq olar. Burada tələbə mühitinin yaranması həyatın qaynarlığı və yeniləşmə baxımından çox vacibdir. Şuşa radiosi və regional televiziyası açılmalıdır, buradan rusca, ingiliscə və ermənicə yayımlar gerçəkləşməlidir. Çünki buradan ermənilərə muğam və fişəng göndərməklə kifayətlənmək olmaz, informasiya da, vəd də, proqram da göndərmək vacibdir. "Şuşa" adı ilə müxtəlif idman növlərində komandaların yaradılması da düşünülməlidir. Bakıda il yarımdır qapalı meydançalara qadağa olduğuna görə açıq havada bir dənə də olsa basketbol meydançası tapa bilməmişik, heç olmazsa Şuşaya gələn insanlar üçün cəlbedici olsun deyə belə meydançaların yaradılması vacibdir. Anlayıram ki, yer problemi var, ancaq infrastruktur balansı yaratmadan bu şəhərin yetkin tablosunu təqdim etmək çətin olar. Ölkə Prezidentinin və Mehriban xanımın bilavasitə tövsiyələri ilə Şuşada qısa müddətdə görülən işlər həqiqətən ürəkaçıcıdır. Yeni fikirlər, ideyalar da səsləndirilməlidir ki, faydalı olanlardan yararlanmaq mümkün olsun."