“Pandemiya şəraitinin həm müsbət, həm mənfi təsir göstərdiyi sahələr də var. Ancaq bəzi sahələr var ki, onlara ancaq mənfi təsir göstərib. Onlardan biri və ən vacibi orta təhsildir”

 

Bu sözləri moderator.az-a açıqlamasında Şəmkir şəhər Morul tam orta məktəb coğrafiya, Şəmkir şəhər Cahangir Rüstəmov adına tam orta məktəbin STEAM müəllimi Aytac İsgəndərli söyləyib.

 

A.İsgəndərlinin sözlərinə görə, orta təhsil zaman uşaqlar təhsildən əlavə bir çox keyfiyyətlər də qazanırlar ki, pandemiya dövrü buna çox böyük maneə oldu: “Uşaqlar məktəbdə ünsiyyət, cəmiyyətə adaptasiya kimi özəllikləri də mənimsəyirlər. Pandemiya dövründə uşaqların ünsiyyət qurması, cəmiyyətə adaptasiya olunması üçün şərait sıfıra endirilib”.

 

Müəllim bildirdi ki, təhsil formasında gedən dəyişiklik nəticəsində uşaqların dərsə adaptasiyasında yaranan problemi aradan qaldırmaq heç də asan deyil: “Biz böyük yaşda insanlar bir müddət sərt karantin şəraitində qaldıq və sonra karantin qaydaları yumşaldıqda, müəyyən dərəcədə özümüzü sanki qəfəsdən çıxmış kimi hiss etdik. Bir mühitdən digərinə uyğunlaşmaq böyük adamlara çətin gəlirsə, indi uşaqları təsəvvür edək. Təhsil bir müddət distant oldu, təhsilin bu formasına alışmaq müəyyən vaxt aldı. Uşaqlar bir az distant üsula alışanda, yenidən həftənin müəyyən günləri əyani, müəyyən günləri distant təhsil metodu tətbiq olundu. Bu, bir növ uşaqların adaptasiyasını pozdu. Uşaqlar hansı rejimin daha yaxşı olduğunu bilmədilər. Məsələn, biz sinifdə uşaqlara deyirik ki, ay uşaqlar, bu gün nə oxumusuz? Deyirlər ki, ay müəllim, neçə vaxtdır evdəyik, sanki qəfəsdəyik, olar, bir az söhbət edək, ümumi danışaq? Təbii ki ilkin olaraq uşaqları dərslə yükləmək olmur. Biz uşaqlara motivasiya verməyə çalışırıq, ancaq uyğunlaşma problemi böyükdür”.

 

A.İsgəndərli deyir ki, məsafəni qorumaq şərtilə uşaqlara keçirilən əvvəlki dərs formasını davam etdirməyə çalışmaq lazımdır: “Məsələn, müəyyən dərslər var ki, orda kollektivlə, qruplarla işləməliyik. Əvvəllər hamı bir yerə toplaşırdı, qruplara bölünürdü, işləyirdik, məsafə yox idi. Amma indi bizim əsas fikrimiz məsafəni qorumağa yönəlir. Bu da artıq uşaqların bir növ adaptasiyasına təsir göstərir. Müəllim olaraq fərqli təlim forması seçib dərsi maraqlı qurmağa çalışsaq da, istədiyimiz keyfiyyətdə dərs sistemi alınmır. Ancaq yenə də biz müəllimlər verilmiş şəraitə uyğun şəkildə dərslərimizi qurmalıyıq. İlk olaraq uşaqları psixoloji cəhətdən bu mühitə tam alışsınlar. Müəllimin işi yalnız fənnini tədris etmək deyil. Pandemiya dövrüdürsə, həm də yeni qaydalara uyğun izah etməliyik. Pandemiyanın, bu qaydaların nə vaxta qədər davam edəcəyini hələ bilmirik. Qrup işləri də vacibdir. Təklif edərdim ki, müəllimlər məsafəni qoruyaraq qrup işlərini də uşaqlara etdirsinlər. Fikirləşməsinlər ki, o üsullar ancaq ənənəvi, məsafə saxlanılmayan dövrlər üçün idi, indi olmaz və s. Təbii ki sinif böyükdürsə, maddi texniki baza icazə verirsə, indi də nələrsə etmək mümkündür”.

 

A.İsgəndərlinin sözlərinə görə, müəllimlər çalışmalıdırlar ki, uşaqlar tam əyani tədrisə keçdiklərində, arada olan boşluq hiss edilməsin: “Uşaqların psixologiyası bizim psixologiyamız qədər güclü deyil. Sentyabrdan hər bir şey düzəlsə, bu gerilik yavaş-yavaş qismən aradan qaldırılacaq. Burda əsas öhdəlik müəllimlərin üzərinə düşəcək. Yəqin ki, nazirlik əlavə dərs saatları, məşğələlər, virtual məktəb, psixoloji təlimlər və s. formalarda müəyyən tədbirlər görəcək. Yenə də pandemiyanın təhsildə yaratdığı problemin aradan qaldırılması uzun müddət vaxt aparacaq. Biz müəllimlər elə işləməliyik ki, tam əyani tədrisə minimum problemlərlə keçək”.