Sosial şəbəkənin özbək ulduzundan etiraf: "Azərbaycan musiqisindən ən çox bir janrı sevirik" - VİDEO

Saidjon artıq bir neçə ildir, peşəkar şəkildə musiqi ilə məşğul olduğunu söyləyib.

O, hazırda konservatoriyaya hazırlaşdığını və karyerasını daha da inkişaf etdirməyi hədəflədiyini bildirib.

- Musiqiyə marağınız necə başladı?

- Uşaqlıq vaxtımdan. Ailəmizdə sənətə böyük sevgi var. Kənddə böyümüşəm və milli nəğmələr hər zaman qəlbimə çox yaxın olub.

- Hansı alətdə ifa edirsiniz?

- Əsasən, klarnetdə ifa edirəm. Klarnetin səsi çox təsirlidir və insan ruhunu dərindən ifadə edə bilir.

- Müxtəlif xalqların musiqilərini ifa etmək ideyası necə yarandı?

- Komandamızın əsas məqsədi musiqi vasitəsilə xalqları bir-birinə yaxınlaşdırmaqdır. Buna görə də fərqli millətlərin əsərlərini ifa etməyə başladıq.

- Mahnıları necə seçirsiniz?

- İlk növbədə, əsər qəlbimizə toxunmalıdır. Həmçinin dinləyicilərə duyğunu çatdıra bilən və milli ruhu əks etdirən parçaları seçirik.

- İndiyə qədər hansı ölkələrin musiqilərini ifa etmisiniz?

- İndiyə qədər Özbəkistan, Türkiyə, Azərbaycan və bir neçə başqa ölkənin musiqilərini ifa etmişik.

- Əsərləri öyrənmək çətin olurmu?

- Bəzən çətin olur, çünki hər xalqın musiqisinin özünəməxsus çalarları və üslubu var. Lakin bu proses olduqca maraqlı və zövqlüdür.

- Fərqli xalqların musiqilərində sizi ən çox təsirləndirən nədir?

- Hər xalqın musiqisində özünəməxsus tarix və duyğu var. Xüsusilə muğam quruluşları və milli nəğmələr məni çox təsirləndirir. Azərbaycanın da muğam üslubunda olan əsərlərini çox sevirik.

- Sizcə, musiqi xalqları birləşdirə bilərmi?

- Bəli. Musiqi dil tanımaz, qəlbdən danışar. Tək bir melodiya belə fərqli millətlərdən olan insanları eyni duyğuda birləşdirə bilər.

- Bu çıxışlar sizə nə qazandırdı?

- Mənə özünəinam, təcrübə və məsuliyyət qazandırdı. Ən önəmlisi isə tamaşaçı ilə canlı bağ qurmağı öyrətdi.

- Gələcəkdə hansı ölkənin musiqisini ifa etmək istərdiniz?

- Koreya, Avropa və ərəb ölkələrinin musiqilərini də ifa etmək istəyirəm.

- Bu sahədə arzularınız nələrdir?

- Beynəlxalq səhnələrdə çıxış etmək, özbək musiqisini dünyaya tanıtmaq və öz sənət məktəbimi qurmaq istəyirəm.

- Dinləyicilərinizə mesajınız var?

- Musiqini sevin və qəlbinizi hər zaman sənətlə qidalandırın.

- Yeni başlayanlara nə tövsiyə edərdiniz?

- Heç nə üçün gec deyil. Əgər qəlbinizdə musiqi varsa, bu gün başlayın. Zəhmət və səbir uğurun açarıdır.