"Öz-özümə dedim ki, lazım idi sənə bu?" - Alim Qasımovla MÜSAHİBƏ

 

Moderator.az xəbər verir ki, verilişin ilk buraxılışının qonağı Xalq artisti Alim Qasımov olub.

 

 

“Qayınanam Siyavuş Aslanla qohum olub. O da Vasif Adıgözəlova məni deyib. Qayınanam çox cəsarətli qadın olub e – ora nöyüt götürüb gətirib ki, özümü yandıracağam. Deyib ki, mənim kürəkənim Asəf Zeynallıda oxumalıdır”.

 

 

“Siyavuş da Vasifə bunu deyən də o da deyib – yandırmasın heç yeri, dursun gəlsin. O gördü ki, fəhlə işlədim, sürücü işlədim, nə işlədim – alınmadı. Ona görə gəldi bunu etdi”.

 

 

“Atam, anam, bir də bir Gülüzər xanım vardı – çağırdılar məni ki, öyüd versinlər, Tamillanı almayım. Dedilər ki, onlar Bakılıdılar, biz isə kəndçiyik. Mən də dedim ki, hə, yaxşı, bitdi. Heç evlənmək haqqında fikirləşmirdim, elə xəyalımda yaşadırdım. Nə pul var, nə iş var, nə ev var. Həmin gün gəldim oturdum poçtun qabağında, cibimdə 5 manat yox idi. Gördüm, Tamilla gedir. Getdim onun dalınca, amma onu saxlaya bilməzdim, o məndən güclüdür. Mənə bir sillə vursaydı, başım silkələnərdi. Elə gördüm ki, mənə qoşulub gedir, amma deyə də bilmirəm ki, heçnəyim yoxdur. Utandım deməyə ki, bu söhbəti saxlayaq sonraya, çünki ağzımdan söz çıxıb. Bir sözlə, çıxdılar bunu axtarmağa. Anası da çox mərd qadın idi. Bu da deyib ki, qorxdum deyə gəldim. Mən də dedim – əşi, evdə bir sillə yeyəcəkdin də, adam da istəmədiyi adamla gedər qorxudan? Uşaqlıqdan beləyəm, ağlıma nə gəldi eləyirdim. Amma it kimi qorxurdum ki, qardaşları gəlib döyər məni”.