Ayətullahdan İran hakimiyyətinə sərt tənqid - VİDEO

 

Bu barədə "Azad İran" "YouTube" kanalının dərc etdiyi videosüjetdə bəhs edilir.

 

Bildirilir ki, ayətullah Vaizzadə Behsudi əfqan mühacirlərin İranda məruz qaldığı ayrı-seçkilikdən danışıb.

 

"İranda siz müctəhid də olsanız, əllamə də olsanız, professor da olsanız, xeyri yoxdur, bir şeyə nail olmayacaqsınız. Mən səkkiz il İranda ayətullahül-üzma Kabulinin yanında oldum, bir iranlı belə onun arxasında namaz qılmadı, bir iranlı da onun dərslərində iştirak etmədi, ona şəri vergilər vermədi", - deyə o bildirib.

 

"Göründüyü kimi, söhbət İranda əfqanların üzləşdiyi etnik diskriminasiyadan yox, dini ayrı-seçkilikdən gedir. Əfqan mühacirlərə İranda təhqiramiz münasibət, onların ucuz işçi qüvvəsi kimi ən qara işlərə cəlb olunması, hər addımda aşağılanması məlum məsələdir və bununla bağlı çoxsaylı faktlar və hesabatlar mövcuddur. Son aylar ərzində əfqan mühacirlərin İrandan çıxarılması ilə bağlı İran parlamentində edilən çıxışlar, sosial şəbəkələrdə aparılan kampaniya bunun ən bariz göstəricisidir", - deyə materialda qeyd edilib.

 

"Ayətullah Vaizzadə isə İranda əfqanlara ikinci sort insan kimi baxılmasının indiyə qədər bilinməyən cəhətindən söz açıb və şiə məzhəbindən olan əfqanların özünü şiələrin hamisi kimi qələmə verən rejimdə qarşılaşdığı təzyiq və ayrı-seçkilikdən ürək ağrısı ilə bəhs edib. Özü də o bunu kimdənsə eşidərək dilə gətirmir, uzun illər İranda yaşamış bir ruhani kimi şahidi olduğu və gözləri ilə gördüyü gerçəklərdən danışır. Vaizzadənin adını çəkdiyi böyük ayətullah Qurbanəli Mühəqqiq Kabuli Əfqanıstan həzarələrinin mərcəi-təqlidi kimi məşhurdur və ölkədəki vəziyyətlə bağlı İrana gedərək uzun illər Qum Elmi Hövzəsində tədrislə məşğul olub, amma aydın olur ki, ona da yad münasibət bəslənilib", - deyə süjetdə vurğulanıb.