Amsterdamda israilli azarkeşlərə qarşı dəhşətli hücum: Onlarla saxlanılan var

Bizi sosial şəbəkələrdən izləyin:

Niderland polisi Amsterdam şəhərində yerli "Ayaks" və Təl-Əvivin "Makkabi" komandaları arasında keçirilən futbol oyunu zamanı baş verən iğtişaşlarla bağlı 57 nəfəri həbs edib.

Oxu.Az-ın xəbər verir ki, bu barədə qurumun saytında dərc edilən bəyanatda bildirilib.

Məlumata görə, həbslər hələ oyundan əvvəl, "Makkabi"nin bir neçə yüz azarkeşi Dam meydanı ətrafında toplaşanda başlayıb. O zaman hüquq-mühafizə orqanları "ictimai asayişin pozulması da daxil olmaqla müxtəlif hüquqpozmalar"a görə təxminən 10 nəfəri saxlayıb.

Qurum xatırladıb ki, "Makkabi" oyunçularının gəlişinə qarşı əvvəlcədən elan edilmiş etiraz aksiyası bu fonda başqa yerə - Anton de Kompleyn meydanına köçürülüb. Nümayişçilərin bir hissəsi oradan stadionda keçmək cəhdi göstərib, bundan sonra polislə toqquşmalar başlayıb.

Hadisə nəticəsində bir polis əməkdaşı xəsarət alıb. Krallıq polisinin məlumatına görə, ümumilikdə 57 nəfər həbs edilib, onların əksəriyyəti ictimai asayişi pozduğuna görə saxlanılıb.

Son məlumatlara görə, Amsterdamın müxtəlif rayonlarında "Makkabi" futbol klubunun İsrail azarkeşlərinə qarşı bir sıra hücumlar nəticəsində 10 nəfər xəsarət alıb. "The Times of Israel" qəzeti ölkənin Xarici İşlər Nazirliyinə istinadən yazır ki, xəsarət alanlar hazırda əlaqəyə çıxmadıqları üçün onların xəsarətlərinin xarakteri məlum deyil.

Bundan başqa, İsrail XİN öz vətəndaşlarına hotelləri tərk etməməyi tövsiyə edib. İsrailin Milli Təhlükəsizlik Şurası isə öz növbəsində ictimai yerlərdə İsrail və ya yəhudi simvollarını nümayiş etdirməməyə çağırıb.

10:24

Avropa Liqası çərçivəsində Amsterdamın "Ayaks" və Təl-Əvivin "Makkabi" komandaları arasında keçirilən futbol matçından sonra İsrail azarkeşləri hücuma məruz qalıblar.

Bu barədə İsrailin BMT-dəki daimi nümayəndəsi Danni Danon "X" sosial şəbəkəsində məlumat verib.

Onun sözlərinə görə, Niderlandın küçələrində israillilərə və yəhudilərə qarşı zorakılıq halları ilə bağlı çox narahatedici məlumatlar daxil olub. Danon qeyd edib ki, Avropa 2024-cü ildə poqromlarla üzləşir və bu, İsrailin mübarizə apardığı radikal terrorizm tərəfdarlarının həqiqi xarakterinin əksidir.

Danon BMT-ni fələstinlilərdən və onların tərəfdarlarından gələn zorakılığı dərhal və aydın şəkildə pisləməyə çağırıb. O, həmçinin vurğulayıb ki, Niderland hakimiyyəti terrorizmə qarşı qəti tədbirlər görməlidir. O, hücum edənlərin Fələstin dövlətinin simvolları olan geyimdə olduğunu göstərən video görüntüləri də paylaşıb.

İsrailin "Ynet" xəbər portalının məlumatına görə, hadisə stadionun çıxışında baş verib. Hücum nəticəsində ən azı beş azarkeş bıçaq xəsarəti alıb, bəziləri isə yoldan keçən avtomobillərin altında qalıb.

İsrailin Baş naziri Benyamin Netanyahu ölkə sakinlərinin Amsterdamdan təxliyə edilməsi barədə göstəriş verib. Onun ofisi bildirib ki, həmvətənlərə kömək üçün dərhal iki xilasetmə təyyarəsi göndəriləcək.

Oxu.az