"MTV Azərbaycan" kanalının aparıcısı Lamiyə Balacayeva Moderator.az-ın suallarını cavablandırıb.

 

 

- Elməddin Cəfərov dostumuz, sevimli aktyorumuzdur, onun rollarını çox bəyənirəm, özüm də dəfələrlə ondan müsahibə almışam. Həmçinin çox pozitiv, dost sözünü yerə salmayan adamdır. Onun bu fikirlərinə hörmətlə yanaşıram. Amma əminəm ki, səsləndirdiyi həmin fikirlər qeyri-peşəkarlara, yəni başqa insanlara ünvanlanıb. Çünki Elməddin Cəfərovun fikirlərində nə dərəcədə səmimi və dürüst olduğunu bilirəm. 

 

 

Qaldı ki, ifaçılara, bəli onların kaprizlərini başa düşürük, bəzən sənətçilər həmkarları ilə qonaq olmaq istəmirlər. Və yaxud istəyirlər ki, qonaqlar mütləq şəkildə onların dostları, tanıdıqları olsun və yaxud istədikləri suallar olsun. Onların bəzən bu kaprizlərini, istəklərini nəzərə almaq olur. Amma bəzən elə verilişlər olur ki, konseptindən kənara çıxılır. Düşünürəm ki, Elməddin Cəfərov bu zəmində bildirir ki, xoşagəlməz hallar baş verir. 

 

 

Beləliklə, Elməddin Cəfərovun fikirləri ilə haradasa razıyam ki, bəzən verilişlərdə mövzular öz konseptindən kənara çıxılır. Amma razı deyiləm ona görə ki, sənətçinin, məşhurun sənəti qədər şəxsi həyatı da önəm daşıyır. Bəzən sənətçinin yeni klipi, mahnısı sosial şəbəkədə yayılanda o qədər də maraq kəsb etmir, amma hansısa sənətçi bu ay ailə həyatı quracaq və yaxud hansısa məbləğdə pul yardımı etdi və yaxud övladı dünyaya gəldi, gizli nikahı ortaya çıxdı və sairə, bunlar daha vacibdir. Ona görə verilişlərdə sənətçiyə sənəti ilə də bağlı sual verilir, həmçinin şəxsi həyatı ilə bağlı. Mənim verilişimdə də əsas prioritet "sarı simdir". İstənilən halda publikanın, tamaşaçının fikri nəzərə alınır. 

 

 

 

- Doğrusu, saymamışam, amma hesab edirəm ki, "Üzə-düz" layihəsində 30-dan çox qonağım olub.  Bu proqram 2021-ci ilin yeni layihələrindən biridir, bu ilin may ayından etibarən yayımlanır. Bütün qonaqlarımız tanınmışlar olub. Onların arasında Xalq yazıçısı Çingiz Abdullayev, Baba Vəziroğlu, xalq artistləri Faiq Ağayev, Samir Cəfərov, Gülyaz Məmmədova, Nəzakət Teymurova, Məleykə Əsədova, Əməkdar artistlər Tahir İmanov, Elza Seyidcahan, Xəyyam Nisanov, Vasif Məhərrəmli, daha sonra Zamiq Hüseynov, Roza Zərgərli, Ayan Babakişiyeva, Murad Arif, Dilarə Kazımova, Eldar Qasımov, Ayaz Qasımovun və digərlərinin adını qeyd edə bilərəm. Hesab edirəm ki, mənim qonaqlarımın kriteriyaları bir-birinə uyğun olmalıdır və verilişimin müəyyən konsepti var, hər adamı dəvət edib, çəkə bilmərəm. Həm də düşünməliyəm ki, onun hansısa həyat hekayəsi var və o tamaşaçıya maraqlıdır. Elə qonaqlar var ki, ulduz ola bilərlər, amma bilirəm ki, o, səmimi olmayacaq, olanı danışmayacaq, etiraf etməyəcək. Təbii ki, istənilən qonağı danışdıra bilirəm, xüsusi sual vermə tərzim var ki, istənilən cavabı ala bilirəm. Mənim üçün ən ajiotajlı qonaq Fərda Xudaverdiyev olmuşdu. Onun "Üzə-düz"dəki açıqlamaları partlayış yaratmışdı. Bəzi məqamlar var idi ki, mən onu gecikdirmək istəyirdim, amma rəhbərlik bununla razılaşmırdı və mən o verilişi göz yaşlarımla hazırladım, veriliş böyük reytinq qazandı. Fərda Xudaverdiyev şəxsi həyatı ilə bağlı elə şeyləri açıqlamışdı, illərlə o haqda danışmırdı. Əslində heç danışmaq istəmirdi, amma elə bir məqam yarandı ki, o, hər şeyi açıqladı. Həmçinin Çingiz Abdullayevin də fikirləri ənənəvi olaraq ajiotajlı qarşılandı. Onu proqrama dəvət etməyim tələb olunan idi. Verilişin nüfuzu artdı! Çoxsaylı xoş təriflər aldıq! 

 

 

 

- Bəli, bir az öncə qeyd etdiyim kimi, sənət adamları kaprizli ola bilirlər. Amma onların nazı ilə oynamaq olur. 

 

Heç kim deyə bilməz ki, fikirləri efirdə təhrif olunub. Sadəcə bəzi məqamlar olur ki, qısaldılıb. Bəzən olub ki, 1-2 dəfə hansısa sual və yaxud fikirlər xahiş ilə çıxarılsın. Dostluğumuz xətrinə bir-iki dəfə nələrisə çıxartmışıq. Amma kiməsə əvvəlcədən hansısa suallar göndərilməyib və yaxud nələrsə çıxarılmayıb. 

 

Deyim ki, hansısaqonağım verilişi yarımçıq qoyub getməyib, hər hansı anlaşılmazlıq yaşanmayıb, əksinə bir çox hallarda dostluğumuz verilişdən sonra daha da möhkəmlənib. 

 

 

 

- Kəlbəcər işğal olunanda 3 yaşım olub. Demək olar ki, Kəlbəcərdə bir dəfə, o da anamın qucağında olmuşam. Buna görə də Kəlbəcəri xatırlaya bilmirəm. Şuşa işğaldan azad olunanda qonağım Faiq Ağayev idi. Həmin vaxt dedi ki, "Lamiyə, sən çox xoşbəxtsən ki, məhz bu dönəmdə canlı efirə çıxdın və qarabağlı olaraq bu xəbəri efirdən elan etdin". Mən bəlkə də həmin iki aylıq günlərin məsuliyyətini sanki Faiq Ağayevin dediklərindən sonra anladım. Çox sevinirdim ki, Kəlbəcərin işğal zamanını xatırlamasam da, onun azad olunmasını efirdən çatdırdım.

 

Əlbəttə ki, Kəlbəcərə gedib, orada yaşamaq fikrim var. 

 

 

 

- Hələ ki "Üzə-düz" layihəsi davam edir. Əlbəttə ki, layihə uzunmüddətli də ola bilər. Amma mən heç vaxt hansısa layihənin aylar, illərlə davam etməsinin tərəfdarı olmamışam. Və hesab edirəm ki, bir aparıcı kanalda 3-5 verilişi birdən aparmamalıdır. Bir şeyi də qeyd edim ki, verilişimin redaktoru, prodüseri, müxbiri və aparıcısı özüməm. Həmçinin piar işi ilə də özüm məşğul oluram. Təbii ki, bütün bunlar böyük məsuliyyətdir. Unutmaq olmaz ki, böyük texniki heyət peşəkar şəkildə əziyyətimi çəkir. Onların dəstəyini unuda bilmərəm. İşlərinə sevgi ilə yanaşmaları mən yorğun olarkən mənə güc verir. Sadə görünən proqramın güclü, əziyyətli tərəfi var. O qədər gərgin anlar yaşanıb ki, saysam bitməz. Proqram final edəndə hamısını tək-tək yazacam. Mənimçün böyük yol, maraqlı hekayə oldu. Yanımda təmənnasız olan hər kəsə sonsuz təşəkkür edirəm, xüsusən də mənə sonsuz olaraq güvənən MTV Azərbaycan kanalının rəhbərliyinə. Bütün təşkilatçılar var olsun. Çəkiliş üçün şərait yaradan məkanlar, məni efir zamanı gözəlləşdirən məsul şəxslər! Əlbəttə ki, gələcəkdə yeni layihələr də ola bilər. Mən özümü daha çox canlı proqramda görürəm. Canlı veriliş aparmaq çətin olsa da, mənim üçün çox uğurludur. Yəni, özümün layiq bildiyim layihələr var, amma hələ ki, "Üzə-düz" layihəsi ilə məşğulam. 

 

 

 

- Bir neçə gün sonra 2022-ci ili qarşılayacağıq. Başım işlərimə qarışıb. Bildiyiniz kimi həm də müğənni Zamiq Hüseynovun mətbuat katibiyəm, onun konsert işləri ilə məşğuluq. Yanvarın 7-də Heydər Əliyev adına Sarayda Zamiq Hüseynovun konserti keçiriləcək. Bu, 2022-ci ilin ilk solo konserti olacaq, hansı ki, şəhid və qazi ailələrinə həsr olunub, qonaq qismində daha çox onlar olacaq. Digər satışa çıxarılan biletlərdən əldə olunan vəsait isə şəhid və qazi ailələri üçün YAŞAT Fonduna ianə ediləcək. Beləliklə, qarşıda bizi nələr gözləyir, onu bilmək olmur, bununla bağlı yalnız arzularımız ola bilər".