Ötən gün prodüser Elməddin Cəfərov Moderator.az-a açıqlamasında əksər şou verilişlərində dəvət olunan sənətçiləri tərifləyərək onların sahəsi olmayan dindən, virusdan, idmandan suallar verildiyini müğənninin yalnız sənətindən və musiqidən danışa biləcəyini qeyd etdi.
İfaçı Afət Fərmanqızı da mövzu ilə bağlı Moderator.az-a danışaraq bu fikirlə heç də razılaşmadığını bildirib:
“Elmədin Cəfərovun fikri ilə qismən razı olsam da, qismən də razı deyiləm. Media nümayəndəsi damara baxıb qan almalıdır. Müğənni həm də başqa mövzulardan da məlumatlıdırsa nə olar ki, fikir bildirsə? Mən özümü kifayət qədər məlumatlı müğənni hesab edirəm. Misal üçün mənimlə qab-qacaqdan da danışa bilərsiniz. Mən demirəm ki, həyatda hər şeyi bilirəm. Hər şeyi bilən tək Allahdır. Amma beşikdən məzara qədər öyrənirik. Mən hələ də öyrənirəm.
Ən çox da maraq dairəmdə olan mövzuları araşdırrıam, məsələn yaxşı maşınların istehsalı ilə maraqlanıram. Yaxşı parfumeriya, kosmetika, geyimlər, brendləri araşdırıram. Ala bildiyimi, gücüm çatanı alıram, ala bilməsəm də virtual baxmaq kifayət edir.
Boş zamanlarımda tarixi abidələrlə, dünya mədəniyyəti ilə yeri gələndə siyasətlə maraqlanıram ki, görüm yaşadığım ölkədə qonşu ölkələrdə nələr baş verir. Hər sahədən məlumatlı olmağı sevirəm. Xoşlayıram ki, söz ehtiyatım, bilgim çox olsun. Uşaq vaxtı kitabxanada kitab qoymamışdım, bütün kitabları oxumuşdum. Ona görə də efirdə çıxış edəndə 5 dəfə “ı”, “u” eləmirəm. Az əvvəl efirlərin birində rəqqasə xanım o qədər “ı”, “u”, “yəni ki” dedi ki, əsəbimdən kanalı çevirdim. Bunun hamısı savadsızlıqdan qaynaqlanır. Vaxtında çoxlu kitab oxumaq lazımdır ki, söz bazanız zəngin olsun.
Müğənniyə baxıb sual vermək lazımdır. Universal müğənniyə hər sahədən sual vermək olar. Savadı olmayıb, sənəti olan müğənni var ki, ona ancaq sənətdən sual vermək lazımdır, elə o müğənni oxusun, danışmasın heç”.