Sahib Məmmədov: Yeni sistem dövlət qulluğunun gənc mütəxəssislər üçün cəlbediciliyini artıracaq

Dövlət sektorunda əməkhaqqı sisteminin islahatı çərçivəsində dövlət qulluqçularının pul təminatının strukturunun dəyişdirilməsi məsələsi üzərində iş aparılır.

Bu barədə “Vesti.az”a açıqlamasında “Vətəndaşların əmək hüquqlarının müdafiəsi liqası”nın icraçı komitəsinin sədri, Əmək və Əhalinin Sosial Müdafiəsi Nazirliyi yanında İctimai Şuranın üzvü Sahib Məmmədov bildirib.

Məlumata görə, təklif olunan yeniliyin əsas mahiyyəti bir sıra mövcud əlavələrin ləğv edilərək vəzifə maaşının əsas hissəsinə daxil edilməsindən ibarətdir.

Qeyd olunur ki, yeni sistem bir sıra ödənişləri əhatə edəcək. Belə ki, mükafat sistemi, iş stajına görə əlavələr və hakimiyyət səlahiyyətlərinin həyata keçirilməsinə görə verilən əlavələrin ləğvi nəzərdə tutulur. Həmçinin vəzifə maaşına nisbətdə hesablanan ödənişlər və dövlət qulluqçularına verilən müalicə pulu da ləğv edilərək əsas maaşa inteqrasiya olunacaq.

Bildirilib ki, bu addım hazırkı mürəkkəb və kifayət qədər şəffaf olmayan əməkhaqqı sisteminin sadələşdirilməsinə yönəlib. Kollektiv və fərdi mükafatlar əvəzinə nəticəyönümlü vahid sistemin tətbiqi təklif olunur. Əgər əvvəllər əməkhaqqının əsas hissəsi ümumi gəlirin təxminən 35–45 faizini təşkil edirdisə, dəyişikliklərdən sonra bu göstəricinin 95 faizdən çox olacağı gözlənilir.

Məmmədov qeyd edib ki, bu islahat beynəlxalq təcrübəyə uyğundur və əməkdaşların motivasiyasının artırılmasına, həmçinin ödənişlərin daha şəffaf olması hesabına korrupsiya risklərinin azaldılmasına xidmət edəcək.

Onun sözlərinə görə, yeni sistem dövlət qulluğunun gənc mütəxəssislər üçün cəlbediciliyini də artıracaq:

“Əvvəllər aşağı baza maaşı səbəbindən bir çox gənclər özəl sektora üstünlük verirdi. Yeni sistem isə daha aydın və rəqabətqabiliyyətli əməkhaqqı formalaşdıracaq”.

Ekspert bildirib ki, əvvəlki qaydalara əsasən dövlət qulluqçularının əməkhaqqı vəzifə maaşı, əlavələr və mükafatlardan ibarət idi:

“Əlavələr müxtəlif kateqoriyalara bölünürdü, o cümlədən iş stajına və dövlət səlahiyyətlərinin icrasına görə verilirdi. İndi isə qanuna edilən dəyişikliklərlə vahid əməkhaqqı sistemi formalaşdırılır”.

Onun sözlərinə görə, yeni model vahid və sabit ödəniş strukturuna keçidi nəzərdə tutur:

“Əvvəllər mükafatlar sabit deyildi – verilə də bilərdi, verilməyə də. Əlavələr də dəyişkən idi, bəziləri alırdı, bəziləri yox. İndi isə sistem daha sabit olacaq”.

Məmmədov vurğulayıb ki, bu sabitliyin bir sıra müsbət tərəfləri var. İlk növbədə, əvvəllər əlavələrdən yararlana bilməyən əməkdaşların maaşı artacaq:

“Yeni işə başlayan və iş stajı olmayan əməkdaşlar əvvəllər müvafiq əlavələri almırdı. İndi isə onların gəlirləri artacaq. Artımın konkret məbləği dövlət orqanının kateqoriyasından, ixtisas dərəcəsindən və tutulan vəzifədən asılı olacaq”.

Ekspert əlavə edib ki, əməkhaqqının artırılması və sabitləşdirilməsi korrupsiyaya qarşı mübarizədə də mühüm rol oynayır:

“Burada birbaşa əlaqə var. Əməkhaqqı artdıqca və sabitləşdikcə, korrupsiya göstəriciləri adətən azalır. Bu, mühüm preventiv tədbirdir”.

Onun sözlərinə görə, yeni sistem həm də proqnozlaşdırmanı asanlaşdıracaq:

“Fərdi əməkhaqqının müəyyənləşdirilməsi və dövlət qurumlarında ümumi əməkhaqqı fondunun hesablanması daha şəffaf və proqnozlaşdırılan olacaq. Bu isə idarəetmənin daha çevik təşkilinə imkan verəcək”.

Məmmədov qeyd edib ki, təklif olunan model beynəlxalq praktikada geniş yayılıb:

“Oxşar sistemlər Gürcüstanda, Şərqi Avropa və Baltik ölkələrində, eləcə də Qərb və Cənub-Şərqi Asiya dövlətlərində tətbiq olunur. Bu baxımdan yeni əməkhaqqı modeli müasir beynəlxalq yanaşmalara uyğun sistemli islahatdır”.