Ukrayna Azərbaycana təşəkkür edib

Ukrayna Xarici İşlər Nazirliyi Azərbaycana təşəkkür edib.

Moderator.az xəbər verir ki, bu barədə Ukrayna Xarici İşlər Nazirliyinin məlumatında qeyd edilib.

“Rusiya qış aylarında mülki enerji infrastrukturunu hədəf almağa davam etdiyindən, enerji dəstəyi Ukrayna vətəndaşları üçün olduqca vacib olaraq qalır. Ukrayna evlərinə istilik və işıq gətirməyə kömək edən yeni enerji yardımı elan edən ölkələrə təşəkkür edirik. Azərbaycan Rusiya hücumlarından təsirlənən bölgələrdə elektrik təchizatının bərpasına kömək etmək üçün enerji avadanlığı - 12 aşağı gərginlikli panel, 11 generator, 5 transformator və 27.000 metr kabel göndərib”, - məlumatda bildirilib.

Qeyd edilib ki, bundan əlavə, Niderland və Slovakiyadan da enerji və tibbi avadanlıqların Ukraynaya çatdırması gözlənilir.

“Həm hərfi, həm də məcazi mənada istilik verən dəstəyə görə tərəfdaşlarımıza minnətdarıq. Bu dəstək tək olmadığımızı sübut edir. Bu o deməkdir ki, biz Rusiyanın terrorunu məğlub edəcəyik”, - Ukraynanın Xarici İşlər Naziri Andrey Sibiqa vurğulayıb.

Qeyd edək ki, yanvarın 20-də Azərbaycan Ukraynaya elektrik avadanlıqlarından ibarət növbəti humanitar yardım göndərib.