Ceyhun Cəlilov: "Zəngəzur dəhlizi bölgənin gələcək iqtisadi mənzərəsini müəyyən edəcək"

"Prezident İlham Əliyevin təsdiq etdiyi "Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı" Naxçıvanın innovasiyaya əsaslanan, rəqabətqabiliyyətli və müasir infrastruktur üzərində qurulan iqtisadi modelə keçidini təmin edib. Sözügedən sənəddə sənaye parkları, logistika imkanları, gömrük-vergi mexanizmləri və bərpaolunan enerji layihələri prioritet istiqamətlərdir".

Moderator.az xəbər verir ki, bunu 2-ci Azərbaycan-Türkiyə Regional İqtisadi Forumunda çıxış edən Azərbaycan Prezidentinin Naxçıvandakı səlahiyyətli nümayəndəsi Ceyhun Cəlilov deyib.

C.Cəlilov bildirib ki, 2025-ci ilin yanvar-oktyabr ayları üzrə iqtisadi göstəricilər regionda inkişaf tempinin sürətləndiyini göstərir.

O qeyd edib ki, Zəngəzur dəhlizi bölgənin gələcək iqtisadi mənzərəsini müəyyən edən əsas layihələrdən biridir:

"Azərbaycan Prezidentinin siyasi iradəsi nəticəsində reallaşacaq dəhliz Türkiyə ilə Azərbaycan arasında birbaşa quru əlaqəsi yaradacaq, regional ticarət və logistikanı sürətləndirəcək. Zəngəzur dəhlizi türk dövlətləri arasında inteqrasiyanı yeni mərhələyə daşıyacaq".