Azərbaycan-İtaliya münasibətləri müzakirə olunub - FOTO

Xarici işlər naziri Ceyhun Bayramov İtaliyaya rəsmi səfəri çərçivəsində İtaliya Respublikasının Baş nazirinin müavini, xarici işlər və beynəlxalq əməkdaşlıq naziri ilə görüşüb.

Moderator.az xəbər verir ki, bu barədə Azərbaycan Xarici İşlər Nazirliyi “X” hesabında məlumat yayıb.

Bildirilib ki, nazirlər Azərbaycan və İtaliya arasında strateji tərəfdaşlığın inkişaf etdirilməsi və regional məsələləri müzakirə ediblər: “Məhsuldar mübadilələr siyasi dialoq, enerji təhlükəsizliyi, ticarət, əlaqə, təhsil, mədəniyyət və çoxtərəfli forumlarda birgə təşəbbüsləri əhatə edib”.

“Hər iki tərəfin bu yüksək səviyyəli səfərləri, o cümlədən Prezident Sercio Mattarellanın Azərbaycana son səfəri və İtaliya-Azərbaycan Universitetinin yeni kampusunun açılışı innovasiya və təhsil sahəsində əməkdaşlığımızın genişlənməsini sübut edir”,- məlumatda qeyd edilib.

Bildirilib ki, nazirlər həmçinin regional hadisələri də nəzərdən keçiriblər: “Ceyhun Bayramov həmkarına Azərbaycan-Ermənistan münasibətlərinin normallaşması prosesi və 8 avqust Vaşinqton Zirvə görüşündən sonra əldə olunan tərəqqi, habelə İtaliya şirkətlərinin işğaldan azad edilmiş ərazilərdə yenidənqurma işlərinə töhfə vermək imkanları barədə məlumat verib.

Azərbaycan və İtaliya strateji tərəfdaşlıqlarını dərinləşdirməyə və bütün sektorlar üzrə əməkdaşlıq üçün yeni imkanları kəşf etməyə sadiqdirlər”.