Akif Nağı: “Vətənpərvərlik sülh şəraitində də təbliğ olunmalıdır”

 

Bu fikirləri Azad Azərbaycan Partiyasının sədri Akif Nağı “Yeni Müsavat”a açıqlamasında bildirib.

 

Azərbaycandakı müxtəlif media resurslarında, televiziyalardan tutmuş saytlaradək vətənpərvərlik mövzusunun hələ də lazımi səviyyədə işıqlandırılmadığını qeyd edən partiya sədri vətənpərvərliyin formalaşmasında medianın rolunun çox vacib olduğunu vurğulayıb: “Bu gün Azərbaycan cəmiyyəti üçün vətənpərvərlik yalnız bir ideya və ya anlayış deyil, həm də tarixi təcrübə və milli yaddaşın təzahürüdür. Vətəni sevmək və bu sevgini yaşatmaq, onu gələcək nəsillərə ötürmək, müasir dünyada qarşıya çıxan ən mühüm məsələlərdən biridir. Vətənpərvərliklə bağlı yazılar və tədbirlər keçirilir, lakin bu sahədə görülən işlər hələ də kifayət qədər deyil. Vətənpərvərliyin dəyər kimi yalnız müharibə zamanında qorunub saxlanması deyil, həm də sülh dövründə inkişaf etdirilməsi önəmlidir. Milli mənlik şüurunun formalaşdırılması çox vacibdir. Sosial şəbəkələrdə vətənpərvərlik mövzusunda müzakirələr aparılır, amma çox vaxt bu müzakirələr səviyyəsiz olur. Bu işin məsuliyyətini üzərinə götürən qurumlar yoxdur. Ona görə də hesab edirəm ki, Azərbaycanda vətənpərvərlik məsələsi, xüsusilə milli mənlik şüurunun aşılanması üzrə medianın məqsədyönlü fəaliyyəti vacibdir. Əgər bu işlər davamlı şəkildə aparılmasa, vəziyyətin gələcəkdə yaxşılaşacağı şübhəlidir. Fikrimcə, iki əsas məsələyə xüsusi diqqət yetirilməlidir: Birincisi, milli özünüdərk prosesi, ikincisi isə əcdadlarımızın kimliyi və tariximizin düzgün təqdim olunmasıdır. Tarixə elə müdaxilələr edilib ki! Son yüzilliklər ərzində, Çar imperiyası və SSRİ dövründə Azərbaycan tarixinin bir çox hissəsi sanki silinib. Biz öz Vətənimizi tanıtmalıyıq. Böyük alimimiz Xudu Məmmədovun dediyi kimi, gənclərə "Vətəni sevin!" demək kifayət deyil. Onlara Vətəni tanıtmaq lazımdır, çünki yalnız tanıyan insan onu sevər. Mətbuat bu məsələdə müvafiq dəstəyi göstərməlidir. Müstəqilliyimiz və ərazi bütövlüyümüz uğrunda canını fəda etmiş qəhrəmanları tanıtmaq önəmlidir. Azərbaycan bütün xalqları ilə bir Vətəndir - türklər, talışlar, ləzgilər, tatlar və başqa azsaylı xalqlar da bu Vətənin bir parçasıdır. Bu ideya daha geniş təbliğ olunmalıdır. Mən belə düşünürəm ki, bu məsələdə xarici qüvvələrin təsiri böyükdür. Həm cənubdan, həm də şimaldan bizə təsirlər gəlir. Bu problemlərin aradan qaldırılması vacibdir".

 

A.Nağının fikrincə, dövlətin inkişafı üçün vətənpərvərlik hisslərinin aşılanması çox əhəmiyyətlidir. Bundan əlavə, partiya sədri deyib ki, xüsusilə sosial şəbəkələr vasitəsilə yayılan manipulyativ, yanlış və ya qeyri-obyektiv məlumatlar fonunda peşəkar və prinsipial media orqanlarının milli dəyərləri qoruyan, reallıqları düzgün əks etdirən və maarifləndirici rol oynaması zərurətə çevrilib: “Bu baxımdan medianın cəmiyyətin doğru məlumat almasını təmin etməsi, yalnız informasiya ötürmək deyil, həm də təhlil etmək və müzakirə etmək funksiyasını daşıması vacibdir. Bu, xüsusilə gənclər arasında milli şüurun gücləndirilməsi üçün mühüm əhəmiyyət kəsb edir. Media mühitində vətənpərvərliyi təşviq edən rubrikaların, müsabiqələrin, ictimai təşəbbüslərin və tematik verilişlərin təşkili, cəmiyyətin geniş təbəqələrində milli ideyaların möhkəmlənməsi və gənclərin vətənə bağlılıq hisslərinin artırılması üçün çox təsirli alətlərdir. Bu məqsədlə dövlət qurumları ilə media subyektləri arasında daha sıx əməkdaşlıq qurulmalı və bu istiqamətdə vahid bir strateji yanaşma hazırlanmalıdır. Vətənpərvərlik ideyasının təbliğində medianın imkanları çox genişdir, vətənpərvərlik yalnız müharibə dönəmində deyil, həm də sülh şəraitində gücləndirilməli və təbliğ olunmalıdır. Vətənpərvərlik məsələsi milli mədəniyyətin təbliği, yerli dəyərlərin qorunması və xalqın birliyinin gücləndirilməsi baxımından da əhəmiyyətlidir. Media milli kimliyin qorunmasına xidmət edən mühüm amillərdən biridir. Fikrimcə, Azərbaycanın müstəqillik əldə etdikdən sonra keçdiyi yol və əldə etdiyi nailiyyətlərə diqqət çəkilməsi gənclərin bu müstəqilliyi qorumaq üçün nə qədər məsuliyyət daşıdıqlarını anlamalarına kömək edəcək”.