Moderator.az xəbər verir ki, bunu sabiq deputat Cavanşir Feyziyev deyib.

 

Deputat qeyd edib ki, hər bir insan oğlu onu əhatə edən Xeyir və Şərin təsir dairəsində formalaşır. Mənliyin, kişiliyin, insanlığın formalaşması prosesində övlad ətrafındakı Xeyir və Şər daşıyıcılarının (ilk növbədə Ata və Ana) malik olduğu xeyir və ya şər üstünlüklərindən qidalanır. Bu prosesdə özünü dərk etməyə, Xeyiri və Şəri fərqləndirməyə və düzgün dəyərləndirməyə nail olan şəxs şüurlu şəkildə öz xislətindəki Şər başlanğıcının “klapanını” birdəfəlik bağlayır və həmişə Şər əməllərdən uzaq olur. Yəni onların cismi, beyni, qəlbi artıq şər yox, yalnız xeyirli düşüncələrlə və əməllərlə çalışır. Hansı övlad özünü Kainatın bir zərrəsi olan bəşər övladı kimi dərk edə bilmirsə, sadəcə ətrafındakıların ( yenə də ilk növbədə Atanın və Ananın) əməllərini təkrar edərək yaşayır. Bu əlamətlərinə görə hamının bir-bir Xeyir və ya Şər daşıyıcısı olduğunu müəyyən etmək o qədər də çətin deyil. Xeyir həmişə və hamıya xeyirlidir. Şər isə həmişə hamının başına bəladır. Belə bəlalardan biri haqqında danışmaq istəyirəm. Bu bəlanın adı Cəmil Həsənlidir.

 

C.Feyziyev bildirib ki, buqələmun kimi yerindən və zamanından asılı olaraq dəfələrlə rəngini dəyişən və yeniləşən Cəmil Həsənli bu dəfə özünün sosial şəbəkə səhifəsində hüquqşünas obrazında zühur edib. Növbədənkənar seçkilərin qanunauyğunluğunu təsdiq etmiş Konstitusiya Məhkəməsinin qərarı ilə razılaşmayan Şər Mələyi indi də öz “hüquq biliklərini” nümayiş etdirmək qərarına gəlib. Bununla kifayətlənməyən Cəmil Həsənli başqa bir hüquqi məsələdə istintaq orqanlarını da hədəfə alıb. Xarici xüsusi xidmət orqanları tərəfindən maliyyələşməklə ölkədə sabitliyi pozmaq istiqamətində fəaliyyət göstərdiyi ehtimal olunan bir şəxsin günahsız olduğunu iddia edən Cəmil Həsənli istintaqdan əvvəl artıq öz qərarını elan edib. “Ali savadlı” bir şəxs kimi belə verdiktlərin yalnız istintaq və məhkəmə orqanları tərəfindən verilməli olduğunu bilərək belə bir iddia ilə çıxış etməsi Cəmil Həsənlinin özünün sabitlikdən o qədər də xoşlanmadığını göstərir.

 

"Yeri gəldi, gəlmədi, mənim adımı hallandırmağa adət etmiş Cəmil Həsənli yenə də artistlik edərək iddia edib ki, guya London Yüksək Məhkəməsi mənim qaçaqmalçı olduğumu məhkəmə qərarı ilə təsdiq edib. İndi mən Cəmil Həsənliyə təklif edirəm ki, həmin qərarı ictimaiyyətə göstərsin. Londonda bütün məhkəmə qərarları açıq resurslarda yerləşdirilir, Cəmil Həsənli də bunu yaxşı bilir. Əgər belə bir qərar olubsa və varsa, göstərsin. Göstərə bilməsə, deməli onun bir adı var – Şər Mələyi.

 

Bu məsələ ilə bağlı 2 il əvvəl izah etdiyim mövqeyimi və verdiyim açıqlamanı bir daha təkrar edirəm: Mən heç vaxt heç bir ölkədə heç bir qanunu pozmamışam və dünyanın heç bir ölkəsində heç bir məhkəmə mənim əleyhimə korrusiya, qaçaqmalçılıq və s. bu kimi iddialar əsasında məhkəmə araşdırması aparmayıb və məni günahlandıran hər hansı bir qərar çıxarmayıb. Cəmil Həsənli və məsləkdaşlarının yazdıqları isə onların Azərbaycana düşmən olan xarici tərəfdaşları ilə birlikdə yazdırdığı sübutsuz-dəlilsiz şər və böhtanlardan başqa bir şey deyil. Cəmil Həsənli dövlətə, millətə, xalqa qarşı şər-böhtan üçün xarici xüsusi xidmət orqanlarına işləyən bir xaindir. Onun alimliyi də, guya xaricdə professorluğu da tamamilə saxtadır. Mən bunu əvvəllər də yazmışam və Cəmil Həsənli bunun üzərindən sükutla keçib. Amma mən onun yazdıqlarını sükutla qarşılaya bilmərəm, çünki onun saxtakarlığına yaxşı bələdəm. Əgər Cəmil Həsənli mənim haqqımda yazdıqlarının bircə elementi barədə qanuni sübut təqdim edə bilərsə, göstərsin, mən gözləyirəm", - deyə Cavanşir Feyziyev vurğulayıb.