İ.İbrahimlinin Azərbaycanın müstəqilliyinə səs verən 43 nəfər istiqlalçı deputatdan biri olmasını nəzərə alsaq, bu, olduqca utancverici haldır. İ.İbrahimli tutduğu mövqedən, təmsil olunduğu düşərgədən asılı olmayaraq Azərbaycanın istiqlalı üçün mücadilə vermiş şəxsdir. Müstəqilliyimizin 23-cü ilində ömrünün ixtiyar yaşını yaşayan istiqlalçı bu gün uğrunda fədakarlıqla mübarizə apardığı dövlətin verdiyi imtiyazlardan bəhrələnmək əvəzinə addımbaşı təhqir və təqiblərə məruz qalırsa, hətta repressiya illərində olduğu kimi qohumunun yas məclisinə getməsinə qadağa qoyulursa, bu situasiyanın heç bir normal izahı yoxdur. Belə görünür ki, istiqlal və müstəqillik Naxçıvan rəhbərliyinin, konkret halda Vasif Talıbovun istədiyini etməsi üçün qazanılıbmış. Bütün bunlar isə onsuz da Avropadan davamlı şəkildə sərt bəyanatların gəlməsi fonunda hakimiyyətə müsbət heç nə vəd etmir. Belə çıxır ki, kimlərsə məqsədli şəkildə ölkə rəhbərliyinə problem yaradır. Bəzi ekspertlər baş verənlərin arxasında V.Talıbovun özünə qarşı duran qüvvələrin də olduğunu iddia edir, ancaq İ.İbrahimli Moderator.az bütün bunları təkzib edir:  

- Mənim Naxçıvana buraxılıb-buraxılmamağım, yaxın qohumumun yas məclisində iştirak edib-etməməyim məsələnin mənəvi-əxlaqi tərəfidir. Amma bunun siyasi səbəbləri və motivi var. Artıq neçə ildir ki, Naxçıvan Ziyalılar Birliyi Naxçıvanda, o cümlədən ölkədə baş verən proseslərlə bağlı özünün ciddi siyasi mövqeyini bildirir. Yəni bu qurum istər Naxçıvan Muxtar Respublikasında, istərsə də Azərbaycanın digər bölgələrində baş verən hansı digər proseslərə ictimai birlik olmasına baxmayaraq, bir vətəndaş mövqeyi, ziyalı mövqeyi sərgiləyir. Zaman-zaman muxtar respublikada baş verən qanunsuzluqlar, ədalətsizliklər, insan haqlarına qarşı münasibəti, ordakı repressiv siyasəti Naxçıvanın qaranlıq bir adaya çevrilməsi kimi məsələləri Azərbaycanın gündəminə gətirir, ictimai müzakirə açır, eyni zamanda beynəlxalq aləmin gündəminə daxil edir və ictimailəşdirir. Təbii ki, bu, nə Azərbaycan rəhbərliyini, nə də Naxçıvan rəhbərliyini qane eləmir. Çünki bu, birbaşa Azərbaycan hakimiyyətinin regionçuluq siyasətinə zərbədir. Azərbaycan hakimiyyəti regionçuluq siyasəti ilə, “naxçıvanlılar, yaxud qərbi azərbaycanlılar bizim sosial elektorat bazamısdır” deməklə, onları istismar etməkdədir və əslində bu hakimiyyətin Türkiyənin bölgələrində çörəkpulu qazanmaq üçün günəmuzd işləyən, daha doğrusu, hamballıq eləyən, Rusiyanın bazarlarında bir tikə çörəkpulu qazanmaq üçün dilənən sıradan Naxçıvan sakinlərinə heç bir aidiyyəti yoxdur. Korrupsiyalaşmış insanların nə milli, nə sosial, nə regional mənsubiyyəti olur. Zaman-zaman Naxçıvan Ziyalıları Birliyinin yığışıb ictimai-siyasi proseslərlə bağlı ciddi mövqe sərgiləməsi, münasibət bildirməsi təbii ki, hakimiyyətin regionçuluq siyasətinə birbaşa sarsıdıcı və ağır zərbədir. Milləti regionlara bölmək, bir regionla digəri arasında ögey-doğmalıq siyasətini yürütmək, yaxud da qütbləşmənin dərinləşməsi ictimai münasibətlərin daha barışmaz xarakter almasına səbəb olur. Biz bunun qarşısını almaq, milli həmrəyliyə, milli birliyə nail olmaq üçün fəaliyyət göstəririk. Bir vaxtlar Bakı və Kəndlər Birliyinə qarşı Ayaz Mütəllibovun tutduğu mövqeni bu gün Naxçıvan və Azərbaycan hakimiyyəti Naxçıvan ziyalılarına qarşı sərgiləyir.  

- Bu, sistemdən, birbaşa Azərbaycan hakimiyyətindən qaynaqlanan məsələdir. Müxtəlif informasiyalar ötürürlər ki, guya ortada olan hər hansı qüvvələrin, ikinci, yaxud üçüncü qüvvələrin burda rolu var. Mən belə hesab etmirəm. Bunlar boş, mənasız arqumentlərdir. Bu hadisə bir yox, bir neçə dəfə təkrar olunub. Bir dəfə olsaydı demək mümkün idi ki, burada hansısa maraqlı qüvvələrin əli var. Dünən (srağagün-red.) məni açıq şəkildə təhdid edən telefon nömrələrini təqdim etmişəm. O zənglərdə açıq şəkildə təhdid və şantajlara, hədə-qorxulara məruz qalmışam. Birinci baş verən hadisə ilə də Azərbaycan hüquq-mühafizə orqanlarına müraciət etmişəm, sonuncu dəfə də baş prokurora, Daxili İşlər Nazirliyinə müraciət etdim. Mən hesab edirəm ki, prezident seçkiləri ərəfəsində təkcə Naxçıvanda deyil, Azərbaycanın bütün bölgələrində siyasilərin hərəkət eləməsinə, fəaliyyət göstərməsinə kəskin qadağa var. Bu aqressiv münasibət AXCP-nin rayonlarda keçirdiyi görüşlərə qarşı vəhşi münasibətdə, yaxud prezidentliyə namizəd olan İsa Qəmbərin bölgələrə sərbəst gedib-gəlməsinə maneçilik törədilməsində özünü göstərir. Demək olar ki, artıq Azərbaycanın bütün bölgələri Naxçıvan kimidir, yəni ora giriş-çıxış məhdudlaşdırılıb.  

- Bəli, bu, bir faktdır. 2011-ci ildə Naxçıvanda baş verən siyasi repressiyalara qarşı, insan haqlarının pozulması, insanların sərbəst toplaşmaq azadlığının qadağan edilməsi, KİV-lərin, xüsusilə də “Yeni Müsavat” və “Azadlıq” qəzetlərinin yayılmasına qadağa qoyulması və sairlə bağlı muxtar respublika ziyalıları əsaslandırılmış müraciət hazırlayıb beynəlxalq təşkilatlara göndərib. Həmin müraciətdə bu proseslərdə aktiv rol oynayan Naxçıvan Muxtar Respublikasının Ali Məclisinin sədri Vasif Talıbov, muxtar respublikanın daxili işlər naziri Məhərrəm Talıbova, təhlükəsizlik naziri Vəli Məmmədova qarşı sanksiyanın tətbiq olunması Avropa Birliyindən, beynəlxalq təşkilatlardan xahiş edilib. Avropa Birliyində isə bu məsələ müzakirə olunub, Naxçıvan ziyalılarının bu müraciəti qəbul edilib və Məhərrəm Talıbova, Məhərrəm Talıbova və Vəli Məmmədova qarşı sanksiyalar tətbiq ediblər. Ancaq Avropa Birliyi və digər təşkilatlar bu qərarı anonim saxlayır. Bundan dolayı Naxçıvan rəhbərliyi Naxçıvan ziyalılarına, xüsusilə də mən İbrahim İbrahimliyə qarşı belə qərəzli münasibət bəsləyirlər. Təbii ki, mən bununla bağlı rəsmi qurumlara müraciət etmişəm.  Sonda İ.İbrahmli ölümlə təhdid olunduğu telefon nömrələrini də açıqladı. Dediyinə görə, +79039360898 və +79039360904 nömrələrindən ona zənglər edilib və Naxçıvana gedəcəyi halda ölümlə hədələnib. İstiqlalçı deputat bildirdi ki, artıq Daxili İşlər Nazirliyinə və Baş Prokurorluğa bu telefon nömrələrini təqdim edib.