İyunun 7-də Tofiq Yaqublunun qızı Nərgiz Yaqublu ABŞ səfiri Riçard Morninqstarla görüşüb. Bu görüşün əsas məqsədi İsmayıllı hadisələrinə görə təqsirli bilinərək həbs edilən Müsavat Partiyası başqanının müavini, “Yeni Müsavat” qəzetinin köşə yazarı Tofiq Yaqublu ilə əlaqədar olub.

Nərgiz Yaqublun bununla bağlı “Yeni Müsavat”a məlumata verib: “Görüş gözlədiyimdən də artıq mənim üçün xoş oldu. Səfir cənab Morninqstar demək olar ki, Tofiq Yaqublunun həbsindən kifayət qədər məlumatlı idi və Tofiq Yaqublunun, eləcə də eyni ittihamla həbs olunan İlqar Məmmədovun  haqsız yerə həbs olunduğunu bilir.”

R.Morninqstar Tofiq Yaqublunun azadlığa çıxması üçün əllərindən gələni edəcəklərinə söz verib. Səfir N.Yaqubluya deyib ki, Azərbaycanda müxalifətçilərin siyasi sifarişlə həbsi hakimiyyətin imicinə çox ziyan vurur. O, Tofiq Yaqublunun və digər siyasi məhbusların azadlığa çıxması üçün İlham Əliyevlə görüşdüyünü, həmin insanlar azadlığa çıxmaları üçün maksimum çalışacağını deyib. Səfir həmçinin Azərbaycanda siyasi durumun nə vəziyyətdə olduğundan, müxalifətçilərə qarşı olan təqib və təzyiqlərdən xəbərdar olduğunu, bu halları qətiyyətlə pislədiyini də deyib.

Nərgiz Yaqublu atası Tofiq Yaqubluya və bu günə qədər ailəsinə olan təzyiqlərlə bağlı Riçard Morninqstara ətraflı məlumat verib: “Atam illərdir bu hərəkatdadır və bu rejimə qarşı mübarizə aparır. Bu illər ərzində dəfələrlə həbs olunub, təqib və təzyiqlərə, işgəncələrə məruz qalıb. Hal-hazırda da saxta ittihamlarla həbs edilərək hakimiyyətin girovuna çevrilib. Nəinki atam, bacım Nigar da ötən ilin sentyabrında məlum qəzadan sonra istintaqdan yayınmaq adı ilə saxta ittihamla həbs edilərək, altı ay 1 saylı Bakı Şəhər İstintaq Təcridxanasında saxlanılmışdır. Atam həbs edilən vaxt - fevralın 4-də eyni təcridxananın müxtəlif korpuslarında qanunsuz olaraq saxlanılırdılar. Hətta özümə və ailəmin digər üzvlərinə olan təzyiqlər barəsində də söhbət açdım. Cənab səfirə “Əsgər ölümlərinə son” aksiyasında iştirakımla əlaqədar barəmdə 500 manat cərimə tətbiq olunmasına dair də məlumat verdim. Bütün bu məlumatlardan sonra cənab səfir ailəmizə olan təzyiqlə bağlı təfərrüatlı məlumat verdiyim üçün mənə təşəkkür etdi və bu məlumatların ona lazım olacağını bildirdi.”

Qeyd edək ki, Müsavat Partiyası başqanının müavini Tofiq Yaqublu və REAL hərəkatının sədri İlqar Məmmədova qarşı Cinayət Məcəlləsinin 220.1-ci (zorakılıqların, talanların, yanğınların törədilməsi, əmlakın məhv edilməsi ilə müşayiət olunan kütləvi iğtişaşları təşkil etmə və ya belə iğtişaşlarda iştirak etmə) və 315.2-ci (hakimiyyət nümayəndəsinə zor tətbiq etmə və ya müqavimət göstərmə) maddəsi ilə ittiham irəli sürülüb. Onlar yanvarın 23 və 24-də İsmayıllıda baş vermiş aksiyalar zamanı ictimai qaydanı pozmaqda və vətəndaşları iğtişaşlara təhrik etməkdə təqsirləndirilirlər. T.Yaqublu və İ.Məmmədov artıq 4 aydır ki, həbsdədirlər.