"Sakitləşmək üçün dayanmaq kifayətdir: bədənin yaddaşındakı rahatlama pozası" - Alimlərdən açıqlama

"Balasana - ürək döyüntüsünü yavaşladan, nəfəsi dərinləşdirən və sinir sistemini sakitləşdirən ən sadə yoqa alətlərindən biridir..."

Alimlər və yoqa mütəxəssisləri getdikcə daha çox ona diqqət çəkir ki, ən sadə pozalardan biri sayılan uşaq pozası - balasana real fizioloji təsirə malikdir.

Moderator.az xəbər verir ki, bu barədə "dailymail.com" nəşri yazıb.

Bu pozanın ürək döyüntüsünü yavaşlatdığı, nəfəsi dərinləşdirdiyi və bədəni istirahət rejiminə keçirdiyi müşahidə olunur. Sadəliyinə baxmayaraq, balasana bədənin bərpa mexanizmlərini işə salan güclü vasitə kimi dəyərləndirilir.

Balasana nədir və niyə bu qədər təsirlidir?

Balasana (bala - körpə, asana - poza) diz üstə vəziyyətdən irəli əyilməklə icra olunur: alın yumşaq şəkildə yerə söykənir, qollar isə ya irəli uzadılır, ya da bədən boyunca rahat vəziyyətdə saxlanılır. Yoqa ənənəsində bu poza fəal hərəkətlər arasında onurğa üçün fasilə, bəzən isə müstəqil bərpaedici praktika kimi istifadə olunur.

Bədən bu vəziyyətdə yığıldıqda, daxili orqanlara yüngül təzyiq yaranır və bu, nəfəsin diafraqma ilə daha dərin alınmasına kömək edir. Nəticədə orqanizm parasimpatik rejimə, yəni "istirahət və bərpa" vəziyyətinə keçir. Bu rejim ürək ritminin azalması, təzyiqin düşməsi və sinir sisteminin sakitləşməsi ilə müşayiət olunur.

Mütəxəssislər qeyd edir ki, balasana bel, omba və çiyinlərdə yığılan gərginliyi azaldır, fiziki rahatlama ilə yanaşı emosional sakitlik də yaradır. Bu da narahatlıq səviyyəsinin aşağı düşməsinə və ümumi yorğunluğun azalmasına səbəb olur.

Təsirli olması üçün necə icra etmək lazımdır?

Balasanada əsas prinsip güc yox, komfort və düzgün nəfəsdir. Diz üstə oturun, ombanı dabanlara endirin və bədəni irəli əyin. Alın yerə və ya yumşaq dayağa toxunsun. Əgər məqsəd daha çox sakitləşməkdirsə, qolları bədən boyunca uzatmaq məsləhətdir.

Nəfəs yavaş və dərin olmalıdır: nəfəsalma sakit, nəfəsvermə isə bir qədər uzun. Cəmi 2-5 dəqiqə bu vəziyyətdə qalmaq belə ürək ritminin azalmasına kifayət edir. Dizlərdə və ya beldə narahatlıq varsa, altına yastıq və ya qatlanmış örtük qoymaq tövsiyə olunur.

"Cleveland Clinic"-in kardioloqu və psixosomatik tibb üzrə mütəxəssisi Bet Friston bildirir ki, balasana vagus sinirini aktivləşdirir - bu sinir stress reaksiyasını "söndürən" əsas mexanizmdir. Onun sözlərinə görə, bədən qoruyucu və sabit poza qəbul edib nəfəsi yavaşladıqda, orqanizm bunu təhlükəsizlik siqnalı kimi qəbul edir və bu, birbaşa ürəyin işinə təsir göstərir.

Bədən sakitliyi xatırlayır

Balasana idman hərəkəti deyil, bərpa pozasıdır. Onun gücü əzələlərdə yox, bədənin sinir sistemi ilə qurduğu sakit dialoqdadır. Məhz bu səbəbdən bu poza demək olar ki, hər kəs üçün əlçatandır və gündə bir neçə dəqiqə belə tətbiq edildikdə stressin azalmasına, həzm prosesinin yaxşılaşmasına və daxili tarazlığın bərpasına kömək edir. Balasana sadəcə yoqa fasiləsi deyil - bədənə sakitliyi yenidən öyrədən fizioloji açardır.