Qəhvə faydalıdır, yoxsa zərərli? - QİDA EKSPERTİNDƏN AÇIQLAMA

Günə bir fincan qəhvə ilə başlayanların sayı az deyil. Bəziləri üçün qəhvə sadəcə vərdiş, digərləri üçün isə enerji mənbəyidir. Son vaxtlar qəhvə istehlak edənlərin sayının artması da bu içkiyə marağın daha da gücləndiyini göstərir. Lakin uzun illərdir davam edən bir sual var: qəhvə sağlamlıq üçün faydalıdır, yoxsa zərərli? Elmi araşdırmalar qəhvənin tərkibində orqanizmə müsbət təsir göstərən maddələrin olduğunu göstərsə də, onun həddindən artıq istifadəsinin yaratdığı risklər də diqqətdən kənarda qalmır. Bu baxımdan qəhvənin insan sağlamlığına real təsiri hələ də müzakirə mövzusu olaraq qalır.

Mövzu ilə qida eksperti Amalya Rəhimova BİG.az-a açıqlamasında bildirdi ki, qəhvə dünyada ən çox istehlak edilən içkilərdən biridir və onun sağlamlığa təsiri ilə bağlı müzakirələr hələ də davam edir. Aparılan araşdırmalar göstərir ki, qəhvə düzgün və ölçülü istifadə edildikdə orqanizm üçün faydalı ola bilər, lakin normadan artıq qəbul edildikdə müəyyən risklər yaradır. Onun sözlərinə görə, qəhvənin tərkibində çoxlu miqdarda antioksidant və bioloji aktiv maddələr mövcuddur: "Bu maddələr orqanizmdə hüceyrələrin qorunmasına, iltihabi proseslərin azalmasına və maddələr mübadiləsinin sürətlənməsinə kömək edə bilər. Bəzi elmi müşahidələrə görə, gündə bir neçə fincan qəhvə içən insanlarda tip 2 diabet, ürək-damar və qaraciyər xəstəlikləri riski nisbətən daha aşağı olur.

Eyni zamanda kofein diqqəti artırır, yorğunluğu azaldır və zehni fəaliyyəti müvəqqəti olaraq gücləndirir. Bununla yanaşı, qəhvənin həddindən artıq qəbulu mənfi təsirlərə də səbəb ola bilər. Çox kofein əsəbilik, ürək döyüntüsünün artması, yuxusuzluq, mədə narahatlıqları və təzyiq problemləri yarada bilər. Xüsusilə axşam saatlarında içilən qəhvə yuxu rejimini pozur və orqanizmin istirahət prosesinə mane olur. Bundan əlavə, şəkər, şərbət və yağlı əlavələrlə hazırlanan qəhvələr yüksək kalorili içkiyə çevrilərək faydasını azaldır. Xüsusi sağlamlıq problemləri olan şəxslər üçün qəhvə istehlakı daha diqqətli yanaşma tələb edir.

Hamiləlik dövründə, ürək-damar və təzyiq problemi olan insanlarda kofein qəbulunun normadan artıq olması riskli hesab olunur. Nəticə etibarilə, qəhvə nə tam zərərli, nə də hər kəs üçün eyni dərəcədə faydalı içkidir. Onun sağlamlığa təsiri əsasən miqdardan, içilmə vaxtından və fərdi xüsusiyyətlərdən asılıdır. Ölçülü istifadə edildikdə qəhvə gündəlik qidalanmanın bir hissəsi ola bilər, lakin həddindən artıq qəbul edildikdə sağlamlıq üçün problem yarada bilər".