Çuğundurun bilinməyən faydaları

Çuğundur tərkibindəki zəngin vitamin və minerallar sayəsində sağlamlıq üçün olduqca faydalı tərəvəzlərdən biri hesab olunur.

Moderator.az xəbər verir ki, mütəxəssislər bildirirlər ki, müntəzəm şəkildə çuğundurdan istifadə orqanizmin bir çox funksiyalarını dəstəkləyir və müxtəlif xəstəliklərin qarşısının alınmasına kömək edir.

Çuğundur qan dövranını yaxşılaşdırmaq xüsusiyyəti ilə seçilir. Onun tərkibində olan nitratlar qan damarlarını genişləndirir, bu da qan təzyiqinin tənzimlənməsinə və ürək-damar sisteminin qorunmasına müsbət təsir göstərir. Bu səbəbdən çuğundur hipertoniya riski olan şəxslər üçün xüsusilə faydalı sayılır.

Tərəvəz həmçinin qan azlığına qarşı təsirlidir. Dəmir, fol turşusu və C vitamini ilə zəngin olması hemoglobin səviyyəsinin yüksəlməsinə kömək edir. Bu xüsusiyyəti çuğunduru anemiya zamanı tövsiyə edilən qidalar sırasına daxil edir.

Çuğundur qaraciyərin təmizlənməsində də mühüm rol oynayır. Onun tərkibindəki betain maddəsi qaraciyərin fəaliyyətini gücləndirir, toksinlərin orqanizmdən xaric olunmasını sürətləndirir və maddələr mübadiləsini yaxşılaşdırır.

Mütəxəssislərin sözlərinə görə, çuğundur immun sistemini gücləndirir, iltihab əleyhinə təsir göstərir və orqanizmi infeksiyalara qarşı daha davamlı edir. Eyni zamanda liflə zəngin olması həzm sisteminin fəaliyyətini normallaşdırır, qəbizliyin qarşısını alır.

Antioksidantlarla zəngin olan çuğundur xərçəng riskinin azaldılmasında da faydalı hesab olunur. Araşdırmalar göstərir ki, onun tərkibindəki maddələr hüceyrələrin zədələnməsinin qarşısını almağa kömək edir.