"Ürəyinizi xilas edin: 99 faiz hallarda infarkt və insultların qarşısı alına bilər" - Elmi araşdırma

"Ürək xəstəliklərinin əsas səbəbləri erkən aşkarlanarsa, həyat tərzi dəyişiklikləri ilə böyük risklərdən qorunmaq mümkündür..."

Yeni genişmiqyaslı araşdırma göstərib ki, infarkt, insult və ürək çatışmazlığının demək olar ki, 99% hallarda əvvəlcədən aşkar edilə bilən risk amilləri ilə bağlıdır. Maraqlısı odur ki, bu risklər rəsmi diaqnoz qoyulmasa da mövcud olur.

Moderator.az xəbər verir ki, bu barədə "Walla" nəşri yazıb.

Araşdırmanın gedişi

Tədqiqatda Koreyadan 9 milyon, ABŞ-dan isə 6800 iştirakçının 13-18 il ərzində sağlamlıq göstəriciləri izlənib. Araşdırmanın məqsədi ürək xəstəliklərinin öncədən aşkar edilməsi üçün suboptimal göstəriciləri müəyyən etmək olub. Buraya yalnız rəsmi diaqnozlar deyil, həm də norma həddinə yaxın, lakin optimal səviyyədən aşağı göstəricilər daxil edilib. Məsələn, təzyiq 130/85 mm civə hələ hipertoniya hesab olunmasa da, araşdırmada risk amili kimi qeyd olunub. Bu yanaşma klassik tibb metodundan fərqlənir, çünki o, yalnız klinik hədd aşılarsa problem tanıyır.

Aşkar olunan risklər və statistika

Nəticələr çox aydın olub: Koreyada ürək işemiyası xəstələrinin 99,7 faizində, ürək çatışmazlığı olanların isə 99,4 faizində ən azı bir anormal göstərici mövcud olub. Eyni zamanda, dörd əsas risk amili - təzyiq, qanda şəkər, xolesterin və siqaret 42,8 faiz hallarda birgə təsir göstərib. ABŞ-da oxşar vəziyyət müşahidə olunub.

Ürəyin dörd əsas düşməni

Araşdırma göstərib ki, ürək xəstəliklərinin yaranmasında dörd amil əsas rol oynayır:

- Yüksək təzyiq - xəstələrin 95 faizində əvvəlcədən mövcud olub.

- Yüksək xolesterin - 70-85 faiz hallarda.

- Yüksək qan şəkəri - 50-78% hallarda, hətta diabet diaqnozu yoxdursa belə.

- Siqaret çəkmək - 50-65% hallarda, həm aktiv, həm keçmiş istifadəçilərdə.

Hətta normadan aşağı, amma optimal səviyyədən yüksək göstəricilər də risk kimi qiymətləndirilir. Bu o deməkdir ki, hətta kiçik "sapmalar" da ciddi xəbərdarlıq ola bilər.

Qərb ölkələrində vəziyyət

Ürək-damar xəstəlikləri kişi və menopauza sonrası qadınlar arasında ölüm səbəblərinin başında gəlir. Hər dörd ölümdən biri bu xəstəliklərə bağlıdır. Yetkin əhalinin 30 faizi hipertoniya ilə qarşılaşır, diabetin yayılması isə müəyyən qruplar arasında yüksəkdir. Araşdırma vurğulayır ki, bir çox insanlar yalnız simptomlar ortaya çıxanda tibbi yardım axtarır. Halbuki ürək xəstəlikləri illərlə gizli şəkildə inkişaf edir.

Profilaktika və həyat tərzi tövsiyələri

Qısa məsafələrdə piyada gəzin, əkərli içkiləri azaldın, suya üstünlük verin, təzyiq və qan şəkərini altı ayda bir ölçün, yuxu rejimini normallaşdırın, qan lipid profilinizi yoxlayın, sağlam qidalanın, aktiv həyat tərzi sürün, siqareti tərgidin, zərurət olduqda dərman müalicəsindən də istifadə edə bilərsiniz.

Ürək xəstəlikləri "təsadüfən" baş vermir. Onlar illərlə yığılan pozuntular nəticəsində inkişaf edir. Erkən aşkarlama və profilaktika ilə bu risklər böyük ölçüdə azaldıla bilər. Əsas addım - həyat tərzində dəyişiklik etmək və sağlamlıq göstəricilərinə diqqət yetirməkdir.