Hersli şəhər sakini Yosi Koen yalnız yaşadığı binanın giriş qapısında evlər idarəsi tərəfindən quraşdırılan defibrillyatorun köməyilə sağ qala bilib...

 

Hersli şəhər sakini Yosi Koen qızıgilə kürəkəni və nəvəsinin ad gününü birlikdə qeyd etmək üçün qonaq gəlib. O, qəflətən huşunu itirib və onun ürəyi dayanıb. Onun sağ qalmasına nə kömək edib?

 

Bu barədə dekabrın 28-də mynet yerli xəbərlər saytı məlumat verib.

 

"Mənim bəxtim gətirdi,-Yosi sonradan danışıb. -Evlər komitəsi qızımın yaşadığı binanın giriş qapısında vaxtilə əlçatan yerdə defibrillyator yerləşdirib. Bundan başqa bu evdə 2 tibb işçisi və bir həkim, doktor Eytan Kaplan yaşayır.

 

Mən huşumu itirəndə, qohumlarım qaçaraq defibrillyatoru götürüb, doktor Kaplan və təcili yardımla gələn könüllülərlə birlikdə bu cihazın köməyilə məni reanimasiya ediblər. Defibrillyatordan aldığım yükdən sonra ürəyim işlədı, mən nəfəs almağa başladım və özümə gəldim".

 

Təcili yardım maşını Koeni "Meir" xəstəxanasına çatdırıb və həmin axşam kardiologiya şöbəsinin müdiri professor Abed Əsli xəstəyə tac damarlarının şuntlama əməliyyatı edərək stend qoyub.

 

Yosi Koenin qızı sosial şəbəkələrdə atasının ecazkar xilası barədə yazıb.

 

"Doktor Kaplan, həmçinin ərim və təcili yardımın könüllüləri defibrillyayordan istifadə edərək, atamı həyata qaytardılar,-o, öz postunda belə yazıb. -Nəbzi stabilləşdi, atam hələ evdəykən özünə gəldi. Təcili yardımın əməkdaşları onu "Meir" xəstəxanasına çatdırdılar.

 

Mən tibb işçilərinin peşəkarlığına və pasientlərə münasibətinə heyranam. Bir neçə dəqiqəyə atama diaqnoz qoydular, kompüter tomoqrafiyasından keçirdilər və kateterizasiya kabinetinə göndərdilər. O, hələ evdəykən özünə gəldi, xəstəxanaya gətiriləndə artıq özü müstəqil nəfəs alırdı. Kateterizasiyadan sonra isə özünü çox yaxşı hiss edirdi. Həkim qonşumuz, digər qonşu  və könüllülər, qəbul şöbəsinin və intensiv terapiyanın kardioloji şöbəsinin tibbi heyəti-hamısı bir nəfər kimi atamı defibrillyatorun xilas etdiyini deyirlər".

 

Yosi Koen sağlam həyat tərzi keçirir, idmanla məşğul olur. O, danışıb ki, həmin gün sol kürək nahiyəsində ağrı hiss edib, amma bunu aldığı köhnə travmanın əlaməti hesab edib.

"Məndə əvvəllər də belə hallar olub, amma tez keçib gedirdi. Bu dəfə ağrılar səngimək bilmirdi, yalnız sonradan öyrəndim ki, bu, ürək tutmasının erkən əlamətlərindən biridir, belə hallarda gərək müayinə olunasan.

 

Çoxmənzilli evlərdə defibrillyatorun olması çox vacibdir, sakinlər üçün bu, böyük məsrəf tələb etmir, amma cihaz insan həyatını xilas edir".

 

Kardiologiya şöbəsinin müdiri deyir:

 

"Xəstələrin taleyi ürək tutmasının ilk dəqiqələrində həll edilir və reanimasiya tədbirlərindən, habelə defibrillyatordan aldığı yükdən asılıdır. Vaxtında yük alan xəstələr tamamilə özünə gəlir, reabilitasiya tələb edən beyin zədələnməsi baş vermir. Son nəticədə reabilitasiya lazım gəlir, amma yüngül keçir. Ona görə də defibrillyatorun olması çox vacibdir. Biz Koenin qızının evində evlər komitəsinin təşəbbüsünü alqışlayırıq".