Dəbdə olan sui-qəsd nəzəriyyələri haradan qaynaqlanır və elm adamları bu barədə nə düşünür?
Başa çatmaqda olan ildə sui-qəsd nəzəriyyəçiləri boş oturmadılar! Pandemiya "aldanmayan insanları" yeni sui-qəsd nəzəriyyələri yaratmağa ruhlandırdı. İndi onların başı təkcə dünya dövlətlərinin yaratdığı intriqalarla deyil, sürünənlərin axtarışı və düz səthli digər Yer kürəsinin mövcudluğuna dair sübutlar haqqında ənənəvi fikirlərlə doludur.
Bu yazıda Moderator.az oxucularına sui-qəsd nəzəriyyələri sahəsində yeni nailiyyətləri, ən əsası isə alimlərin onların absurdluğunu necə sübut etdiklərini xatırladacağıq. Baxmayaraq ki, bu, sui-qəsd nəzəriyyəçilərinin qaranın isti, ağın isə yaş olduğuna çılğınlıqla inanmalarına mane olmur.
Mif №1: Peyvənddən sonra insanlar “maqnitləşməyə” başlayırlar, çünki ağır metallar bədənə daxil olur
Qısa xülasə: Bu nəzəriyyə kütləvi peyvəndlənmənin başlanmasından sonra yayılmağa başladı. Peyvəndin əleyhdarları bir-birinə videolar göndərməyə başladılar ki, insanlar peyvənddən sonra guya qaşıqları, qəpikləri, soyuducuya yapışdırılan maqnitləri və digər metal əşyaları özlərinə cəlb edirlər (bu cür fəndlər pandemiyadan əvvəl də dəbdə idi). Peyvənd əleyhinə olanlar həyəcan təbili çalır: bütün bunlar ona görədir ki, vaksinlə birlikdə ağır metallar bədənə daxil olur! Həkimlərin peyvəndin sadəcə olaraq koronavirusun antigenlərini ehtiva edən maye olması ilə bağlı arqumentləri (orada apriori metallar ola bilməz) təbii ki, sui-qəsd nəzəriyyəçiləri tərəfindən qəbul olunmur.
Necə yoxlamaq olar: Peyvənd edilmiş şəxsdə hansısa maqnit sahəsinin olmadığını yoxlamaq asandır, hətta fizikadan qiymətiniz “kafi” olubsa belə. Yəqin ki, Jül Vernin “On beş yaşlı kapitan” əsərini oxumusunuz, ya da ən azı filminə baxmısınız, elə deyilmi? Orada Neqoronun gəmi kompasının altına yerləşdirilmiş dəmir parçasının köməyi ilə gəminin istiqamətini dəyişməsi epizodunda maqnit mövzusu çox anlaşıqlı formada təsvir edilir. Buna görə də, maqnit sahəsinin olub-olmaması kompasdan istifadə edilərək müəyyənləşdirilə bilər. Əgər sui-qəsd nəzəriyyəsi düzgündürsə, peyvənd edilmiş şəxs əlinə kompas qoyanda maqnit sahəsi onun əqrəbini yayındırmalıdır. Ancaq bu baş vermədiyindən, nəticə sübut edir ki, peyvəndlərin insanları maqnitləşdirdiyi iddiası uydurmadır.
Mif №2: Koronavirus 5G qüllələri tərəfindən yayılır
Qısa xülasə: Texnologiya ilk dəfə ortaya çıxanda sui-qəsd nəzəriyyəçiləri 5G qüllələrinin xərçəng yaydığını iddia edirdilər. Lakin sonra koronavirus pandemiyası başladı və qaynar başlar 5G-ni tez bir zamanda Sars-Cov-2-nin yayılmasına yönləndirdilər. Bir sıra ölkələrdə buna inanan insanlar “şüalanma” qorxusuyla hətta 5G qüllələrini məhv etdilər. Bu nəzəriyyənin ideoloqları radiosiqnalların ötürülməsi ilə virusun yayılmasının bir-biri ilə necə bağlı olduğunu dəqiq izah edə bilmirlər. Axı məşğul insanlar qiymətli vaxtını belə əhəmiyyətsiz detallara sərf etməməlidirlər!
Necə yoxlamaq olar: Xırda bir detal nəzərə alınmalıdır: insanların kütləvi yoluxması hətta 5G rabitəsi üçün hələ də fiziki infrastrukturun olmadığı ölkələrdə də baş verir. Məsələn, Hindistan yalnız bu ilin sonunda 5G şəbəkələrini yaymağa başladı. Ancaq hələ keçən il Hindistanda COVID-19 xəstələrinin sayı milyonlarla idi və məşhur “Hindistan ştammı” və ya “Delta variantı” 5G-nin meydana çıxmasından çox əvvəl, 2020-ci ilin oktyabrında ortaya çıxdı. Bundan əlavə, 5G rabitəsi 6-100 GHz tezlik diapazonunda işləyir və Qeyri-İonlaşdırıcı Radiasiyadan Mühafizə üzrə Beynəlxalq Komissiyanın məlumatına görə, sərhəd 300 GHz-ə qədər təhlükəsiz hesab olunur. 5G radio dalğaları işıq və Günəş şüalarından daha zəifdir və orqanizmin hüceyrələrinə zərər verə bilmir. Bundan əlavə, alimlər 5G-nin dördüncü nəsil standartından daha təhlükəsiz olduğuna inanırlar. Fakt budur ki, 4G qüllələri radio dalğaları bütün istiqamətlərdə yayır, 5G siqnalı isə hazırda şəbəkədə işləyən abunəçiyə yönəlir.
Mif №3: Peyvəndlə birlikdə mikroçip yeridilir - bəşəriyyətin əsarət altına alınması üçün rəqəmsal boyunduruq
Qısa xülasə: Bu nəzəriyyənin tərəfdarları pandemiyanın Bill Qeyts tərəfindən planlaşdırıldığını iddia edirlər. Qorxmuş bəşəriyyət peyvənd olunmaq istəyəcək və sonra peyvəndlə birlikdə insan orqanizminə mikroçip daxil ediləcək (bəs bunun digər peyvəndlər zamanı, məsələn, vərəm, qızılca və ya poliomielitə qarşı məcburi peyvəndlər zamanı yeridilməsinə nə mane olur? - red.). Bu çipin köməyi ilə hansısa yolla insanın düşüncələrini və hərəkətlərini idarə edə bilərlər və çipləmənin son məqsədi təbii ki, insanlığın sayını azaltmaqdır.
Necə yoxlamaq olar: Bu fərziyyə “Reuters”in medianın bəzən çap etdiyi (çox vaxt saxta) bütün cəfəngiyyatları yoxlamaq üçün topladığı “Reuters Fact Check” mütəxəssislər qrupu tərəfindən ətraflı şəkildə araşdırılıb. İndi bunu az adam xatırlayır, amma hər şey ID-2020 layihəsi ilə başladı. Onun haqqında ilk xatırlatma 2017-ci ilə təsadüf edir, lakin sonradan o, ictimaiyyət arasında zərrə qədər də maraq doğurmadı. Söhbət blokçeyn və kriptoqrafiya texnologiyaları əsasında vətəndaşların rəqəmsal identifikasiyası sistemindən gedirdi. Layihə BMT tərəfindən dəstəkləndi, çünki o, qaçqınların, miqrantların, vətəndaşlığı olmayan şəxslərin – Yer kürəsində heç bir sənədi olmayan ümumilikdə 1 milyard insanın problemlərini həll edə bilərdi. Sənədlərinin olmaması onların təhsil, işləmək və tibbi xidmət hüququnun olmaması deməkdir. Bu rəqəmsal sertifikatda şəxsi məlumatlar, təhsil, iş ixtisasları, sürücülük vəsiqəsi, barmaq izləri, əvvəlki xəstəliklər, alınan peyvəndlər və s. toplanması nəzərdə tutulurdu. “Microsoft” şirkəti onun işlənib hazırlanmasında iştirak etdi, Bill və Melinda Qeyts Fondu isə layihəni qismən maliyyələşdirdi. Ən maraqlısı odur ki, ID-2020 rəqəmsal sertifikatlarının koronavirusla heç bir əlaqəsi yoxdur. Bunun sui-qəsd nəzəriyyəçilərinin şüurunda necə bir araya gəldiyi sirr olaraq qalır.
Miraslan
