Həkimlər ürək tutması riskini artıra biləcək məhsulu müəyyən ediblər – qadınlar üçün xəbərdarlıq

İsveç alimlərinin apardıqları araşdırma inək südünün yüksək miqdarda istehlakı ilə qadınlarda koronar ürək xəstəliyi riskinin artması arasında əlaqə ola biləcəyini göstərib.

Moderator.az xəbər verir ki, bu barədə "Cursorinfo" nəşri məlumat yayıb.

Araşdırmanın nəticələrinə əsasən, gündə təxminən 250-300 millilitr və ya daha çox süd qəbul edən qadınlarda ürək-damar xəstəlikləri riskinin artdığı müşahidə olunub. Tədqiqat müəllifləri bunun süd şəkərinin tərkib hissəsi olan qalaktozanın orqanizmdə iltihabi prosesləri gücləndirməsi ilə bağlı ola biləcəyini bildirirlər. Eyni təsir kişilərdə statistik baxımdan əhəmiyyətli səviyyədə qeydə alınmayıb.

Bununla yanaşı, mütəxəssislər südün tamamilə qida rasionundan çıxarılmasını tövsiyə etmirlər. Süd kalsium, zülal, kalium və digər vacib qida maddələrinin mühüm mənbəyi hesab olunur.

Həkimlər ürək-damar xəstəlikləri riski olan şəxslərə südü ölçülü miqdarda qəbul etməyi, qidalanmanı balanslaşdırmağı və zərurət yaranarsa laktozasız süd və ya bitki mənşəli alternativlərdən istifadə etməyi məsləhət görürlər.

Qeyd olunur ki, söhbət müşahidə xarakterli tədqiqatdan gedir və əldə olunan nəticələr südün birbaşa ürək tutmasına səbəb olduğunu sübut etmir. Bu sahədə aparılmış digər iri tədqiqatlarda fərqli nəticələr əldə edildiyindən alimlər əlavə araşdırmalara ehtiyac olduğunu bildirirlər.