Daha rahat yatmağın sirri səhər yeməyindən başlayır – Alimdən maraqlı açıqlamalar

Yaxşı və keyfiyyətli yuxunun sirri təkcə axşam saatlarında deyil, günün ilk yeməyində də gizlənə bilər. Mütəxəssislər bildirirlər ki, səhər yeməyində və gün ərzində qəbul etdiyimiz qidalar gecə yuxusunun keyfiyyətinə birbaşa təsir göstərir.

Moderator.az "The Washington Post" qəzetinə istinadən xəbər verir ki, Kolumbiya Universitetinin İrvinq Tibb Mərkəzinin qidalanma üzrə dosenti Mari-Pyer St-Onge uzun illərdir pəhriz və yuxu arasındakı əlaqəni araşdırır. Onun tədqiqatlarına görə, meyvə və tərəvəz, qoz-fındıq, toxumlar, paxlalılar, tam taxıllar, yağsız ət, quş əti və dəniz məhsulları ilə zəngin Aralıq dənizi tipli qidalanma gecə yuxusunu əhəmiyyətli dərəcədə yaxşılaşdıra bilər.

Alimin sözlərinə görə, bu qidalar orqanizmdə yuxunu tənzimləyən melatonin hormonunun sintezini dəstəkləyir, eyni zamanda gecə boyunca qan şəkərinin sabit qalmasına kömək edir. Bu isə tez-tez oyanmaların qarşısını alır.

Aparılan genişmiqyaslı araşdırmalar göstərib ki, Aralıq dənizi pəhrizinə riayət edən insanlar yuxusuzluqdan daha az əziyyət çəkir, daha uzun və keyfiyyətli yatırlar.

St-Onge və həmkarlarının 26 sağlam insan üzərində apardıqları araşdırmada da maraqlı nəticələr əldə olunub. Məlum olub ki, liflə zəngin qidalar daha dərin və bərpaedici yuxunu təmin edir, doymuş yağların çox qəbulu dərin yuxunun müddətini azaldır, ağ çörək, şirniyyat, xəmir məhsulları və şəkərli içkilər isə gecə oyanmalarını artırır.

Alim hesab edir ki, insanların əksəriyyəti sağlam qidalanmanın yuxuya müsbət təsirini lazımınca qiymətləndirmir. Onun fikrincə, yuxu ilə qidalanma arasında ikitərəfli əlaqə mövcuddur: pis yuxu insanı daha çox yağlı və şəkərli qidalara yönəldir, qeyri-sağlam qidalanma isə öz növbəsində yuxunun keyfiyyətini aşağı salır.