"Xameneinin Maduro kimi oğurlanması mümkündürmü?"

"Xameneinin hədəf seçilməsi ciddi risk daşıyır və bu addım rejim dəyişikliyini təmin etməyə bilər..."

ABŞ-İran münasibətləri getdikcə gərginləşir və vəziyyət real hərbi zərbə hazırlığına oxşayır.

Moderator.az xəbər verir ki, bu barərdə "nyt.com" nəşri yazıb.

ABŞ-ın mövqeyi və mümkün hərbi addımlar

Nəşr yazır ki, Donald Tramp İrana yönələn yeni hərbi qrupun olduğunu açıqlayıb və həm diplomatik həll üçün ümidini ifadə etsə də, hərbi variantın hələ də "gündəlikdə" olduğunu vurğulayıb. Məlumatda deyilir ki, hücum növbəti 48 saat ərzində baş verə bilər. ABŞ-ın Mərkəzi Komandanlığı "Abraham Lincoln" təyyarədaşıyan gəmisinin Hind Okeanına çatdığını təsdiqləyib.

Ekspertlər qeyd edir ki, Trampın əsas məqsədi İranın nüvə və ballistik raket proqramını nəzarətdə saxlamaqdır. Eyni zamanda onun strateji maraqları Hörmüz boğazındakı tanker gəmilərinin hərəkətinə nəzarət etməkdir.

Xameneinin hədəf alınması ehtimalları

Mütəxəssislər mümkün "sərt ssenari"ni də nəzərdən keçirirlər. Bu ssenaridə ABŞ İrana qarşı dəniz blokadası tətbiq edə və ya əsas siyasi fiqurların, o cümlədən Ali Rəhbər Xameneinin "Maduro nümunəsi" kimi oğurlanması və ya aradan götürülməsi cəhdinə
yönələ bilər.

Lakin belə addımın öz-özlüyündə rejim dəyişikliyini təmin etməyəcəyi, ciddi risklər doğuracağı vurğulanır. Xameneinin oğurlanması çətin olduğundan, ABŞ və İsrail daha çox aradan götürülmə ssenarisinə üstünlük verə bilər. Bununla belə, Xameneinin arxasında artıq etibarlı varislər olduğu üçün effekt qısamüddətli ola bilər.

İranın cavab hazırlığı və diplomatik addımlar

İran həm mümkün hərbi qarşıdurmaya hazırlaşır, həm də diplomatik çıxış yolu axtarır. Rəsmi Tehran ABŞ-ın niyyətlərinin ciddiliyini dərk edir və hər iki istiqamətdə - müdafiə və potensial hücum hazırlığı görür.

Ekspertlər xəbərdarlıq edir ki, Hörmüz boğazının bağlanması kimi təhdidlərin təkrar edilməsi artıq gözlənilən effekt vermir və ABŞ və müttəfiqləri tərəfindən cavab hərəkətlərini sürətləndirə bilər. Eyni zamanda, daxili etiraz potensialı hələ də kifayət qədər məhduddur və genişmiqyaslı xalq üsyanı olmadan rejim dəyişimi baş verməyəcək.