Hələb Beynəlxalq Aeroportu fəaliyyətini dayandırdı

Bizi sosial şəbəkələrdən izləyin:

Kürdlərin separatçı Suriya Demokratik Qüvvələri (SDF) ilə Dəməşq hökumətinin qüvvələri arasında atışmaların baş verdiyi Hələb şəhərində Beynəlxalq Aeroport fəaliyyətini dayandırıb.

Moderator.az xəbər verir ki, məlumatı Mülki Aviasiya və Hava Nəqliyyatı Baş İdarəsinin sədri Ömər əl-Husari X hesabında açıqlayıb: "Hələbin bəzi ərazilərindəki mövcud vəziyyət, eləcə də sərnişinlərin və heyət üzvlərinin təhlükəsizliyi nəzərə alınmaqla, Mülki Aviasiya və Hava Nəqliyyatı Baş İdarəsi bu gündən etibarən Hələb Beynəlxalq Aeroportuna və oradan uçuşları 24 saat müddətinə dayandırmaq qərarına gəlib".

Rəsmi şəxs planlaşdırılan uçuşların Dəməşq Beynəlxalq Aeroportuna yönləndiriləcəyini vurğulayıb.

Əl-İxbariyyə TV-nin son xəbərlərinə görə, Hələbin yaşayış məntəqələrində kürd döyüşçülərinin atəşi nəticəsində ən azı dörd mülki şəxs həlak olub, qadınlar və uşaqlar da daxil olmaqla 10 nəfər yaralanıb. Suriya TV öz növbəsində SDF qüvvələri ilə hökumət qüvvələri arasında bir neçə saat davam edən gərgin atışmadan sonra atəşkəsin əldə edildiyini bildirir.

6 yanvar səhəri SDF Şeyx Maqsud məhəlləsi yaxınlığındakı hökumət mövqelərinə hücum etmək üçün dronlardan istifadə edib. Zərbələr nəticəsində bir əsgər həlak olub, bir neçə nəfər yaralanıb. Kürd qüvvələrinin atəşkəsi pozmasına cavab olaraq, Suriya Ordusu Şeyx Maqsud ərazisində SDF-nin sursat anbarını məhv edib. Bundan sonra kürd qüvvələri ilə hökumət qüvvələri arasında intensiv atışma başlayıb. Əşrəfiyyə, Şeyx Maqsud və Əl-Midan rayonları və digər rayonlar atəşə tutulub.