"Ölüm cəzasına məhkum edilənlər adətən ənsə nahiyəsinə atəşlə edam edilir, cəsədləri ailələrinə qaytarılmır, dəfn yerləri barədə məlumat verilmir..."

 

Müstəqillik illərində Belarusda təxminən 350 nəfər edam edilib

 

Avropanın hələ də ölüm cəzası tətbiq edilən yeganə ölkəsi olan Belarusda Minsk vilayət məhkəməsi iyunun 24-də Almaniya vətəndaşı Riko Krigeri ölüm cəzasına məhkum edib.

 

Moderator.az xəbər verir ki, bu barədə "Vyasna" hüquq-müdafiə mərkəzi və "Alman dalğası" nəşri AFR Xarici İşlər Nazirliyinə istinadən məlumat yayıb.

 

Kriger "qanunsuz odlu silah gəzdirilməsi", "nəqliyyat və yolların yararsız hala salınması", "ekstremist birliyin yaradılması və belə birlikdə iştirak", "agentura fəaliyyəti", "muzdluluq" və "terror aktında" təqsirli bilinib.

 

Belə ittihamlara nələrin əsas verdiyini hakimiyyət rəsmiləri dəqiqləşdirməyib. "Vyasna"nın məlumatına görə, Krigerin işi Ukrayna tərəfində döyüşən könüllü birlik olan Kastus Kalinovski adına alayla bağlıdır. Kalinovski alayı Krigerlə əlaqəsini inkar edir.

 

"Riko Krigerin həqiqətən alaya heç bir aidiyyəti yoxdur və heç vaxt olmayıb. Bu, tamamilə feyk məlumatdır. Onların sevimli məşğuliyyəti bizim haqqımızda feyklər yaratmaqdır.

 

Budur, anlaşılmaz terrorçuluq işi ilə bağlı hansısa alman vətəndaşının cinayət işini bizimlə əlaqələndirməyə cəhd edilir", - bunu birliyin nümayəndəsi "Novaya qazeta"ya bəyan edib.

 

Almaniya XİN və ölkənin Miskdəki səfirliyi zərərçəkənə konsulluq xidməti göstərir və fəal surətdə Belarus hakimiyyəti qarşısında onun maraqlarını təmsil edir.

 

Nəşrin sualına cavabında AFR XİN vurğulayıb ki, "ölüm cəzası Almaniyada istənilən şəraitdə rədd edilən cəzanın qəddar və qeyri-insani növüdür".

 

"Biz bütün dünyada onun ləğv edilməsinə və bütün zərərçəkənlərlə münasibətdə onun icra edilməsindən imtinaya çalışırıq", - nazirlik bəyan edib.

 

Riko Krigerin 30 yaşı var. Orta məktəni bitirdikdən sonra mexanik peşə təhsili alıb. Üç il müddətində Berlində ABŞ Dövlət Departamentinin təhlükəsizlik xidməti şöbəsinin əməkdaşı olub, daha sonra sosial yardım sahəsinə keçib.

 

Sosial şəbəkələrdəki məlumatlara əsasən, 2021-ci ildə o, alman "Qırmızı Xaç"  komitəsində təcili tibbi yardım üzrə mütəxəssis olub.

 

Belarusda ölüm cəzası dövlət əleyhinə terrorçuluq və ya dövlətə xəyanət kimi "fövqəladə cinayətlərə" görə tətbiq edilir. Məhkum edilənlər adətən ənsə nahiyəsinə atəşlə edam edilir.

 

Bu, kədərli adı ilə tanınan 1 saylı istintaq təcridxanasında baş verir. Edam tarixləri dərc olunmur. Edam edilənlərin cəsədləri ailələrinə qaytarılmır. Dəfn yerləri barədə də onlara heç bir məlumat verilmir.

 

Çıxarılan ölüm hökmlərinin dəqiq sayı bəlli deyil, lakin "Belarus Helsinki Komitəsi"nin hesablamalarına görə, ölkənin müstəqillik illərində təxminən 350 nəfər edam edilib.