"Əsl qələbə girovların azad edilməsini hakimiyyətdən üstün tutmaqdır..."

 

İsrail hərbi kabinetində nazir Qants müxalifətə keçərək seçkilər tələb edib və "əsl qələbə"nin nə demək olduğunu izah edib

 

"Kaxol-lavan" ("Dövlətçilər düşərgəsi") partiyasının sədri, kiçik hərbi kabinetin iştirakçısı Binyamin Qants hökumətin tərkibindən çıxması barədə elan edib.

 

Moderator.az xəbər verir ki, bu barədə "regnum.ru" agentliyi məlumat yayıb.

 

Xatırladaq ki, "dövlətçilər" oktyabrın 11-də şərti olaraq hökumətə birləşib və bəyan edib ki, bunu "təxirəsalınmaz vəziyyətlə" bağlı hərbi əməliyyatlar zamanı üçün edir.

 

Mayın 13-də Qideon Saarın "Yeni ümid" partiyası bu blokdan ayrılıb, "Sağçı dövlətçilər" adını götürərək müxalifətə keçib. Bu, baş nazirin Saarı "hərbi kabinetin" tamhüquqlu üzvü təyin etməkdən imtinasından sonra baş verib.

 

Beləliklə, Qants 12 mandat əvəzinə 8 mandatla qalıb. Həm də son zamanlar o, rəy sorğularında kəskin surətdə geri qalıb.

 

Bütün bunlar ona gətirib çıxarıb ki, müharibənin davam etməsinə rəğmən, "dövlətçilər" hökuməti tərk etmək və növbədənkənar seçkilərə nail olmaq qərarına gəlib.

 

Hətta onların gedişindən sonra da bu, o qədər də asan olmayacaq, koalisiyanın 64 mandatı var.

 

Onun "Likud"da sola meylli Yuli Edelşteyn və Yoav Qalant kimi ayrı-ayrı zümrələrinin zəifliyini nəzərə alsaq belə, yaxın gələcəkdə koalisiyanın dağılması az ehtimal edilir.

 

Qants koalisiyadan çıxdığını elan edərkən ənənəvi olaraq pafoslu və anlaşılmaz çıxış edib: "O dəhşətdən keçən bir neçə  aydan sonra ölkədə və qərarlar qəbul edilən kabinetdə vəziyyət dəyişib.

 

Netanyahu və koalisiya üzrə tərəfdarları yekdilliyi emosional çağırışa çevirib. Taleyüklü strateji qərarlar siyasi mülahizələr səbəbindən qətiyyətsizlik və maneələrlə üzləşir. 

 

Netanyahu bizi əsl qələbəyə doğru irəliləməyə imkan vermir. Ona görə də biz bu gün milli birlik hökumətini tərk edirik, bunu ürək ağrısı, amma bu addımın düzgünlüyünə əmin olaraq edirik".

 

"Dövlətçilər"in rəhbəri bütün siyasi normalara rəğmən, elan edib ki, ölkədə artıq bu payız növbədənkənar seçkilər keçirilməlidir, lakin bunu hansı məqsədlə etməyi və hazırkı hökumətin onu nədə qane etmədiyini izah etməyib.

 

Həmişə olduğu kimi siyasətçi dumanlı çıxış edib, güman etmək olar ki, "taleyüklü və strateji qərarlar" deyəndə o, HƏMAS qarşısında təslimçiliyi və terrorçuların tələblərinin icra edilməsini nəzərdə tutub.

 

"Qətiyyətsizlik və maneələr" düyəndə,hər şeydən göründüyü kimi, Binyamin Netanyahunun HƏMAS-ın tələblərinə boyun əyməyə və müharibədən sonra Qəzzanı Fələstin Administrasiyasının hakimiyyəti altına verməyə hazır olduğunu nəzərdə tutub.

 

Bununla yanaşı, Qants Netanyahunun imkan vermədiyi "əsl qələbə"nin nə olduğunu izah edib.

 

"Əsl qələbə girovların azad edilməsini hakimiyyətdən üstün tutmaqdır. Əsl qələbə hərbi uğurun siyasi və mülki təşəbbüslə uzlaşdırılmasıdır.

 

Əsl qələbə HƏMAS-ın məhvinə və onun əvəzlənməsinə gətirib çıxaracaq. Əsl qələbə şimal sakinlərinin evlərinə dönməsi və onların təhlükəsizliyinin təmin edilməsidir.

 

Əsl qələbə ABŞ və bütün Qərb dünyasının rəhbərliyi altında İrana qarşı regional koalisiya yaratmaqdır", - Qants deyib, lakin hansı "siyasi və mülki təşəbbüsləri" nəzərdə tutduğunu izah etməyib.

 

Xatırladaq ki, bir neçə il öncə Qants İsrail müdafiə naziri vəzifəsini tutarkən Fələstin Muxtariyyətinin sədri Mahmud Abbası evinə dəvət edib və jurnalistlərə deyib ki, "Rabinin işini davam etdirmək" niyyətindədir.