"Bu məsələ ilə bağlı Fransa və digər ölkələrlə diskusiyalar hələlik davam edir..."

 

"Bu, sırf formal yanaşmadır və fransız təlimatçılarının Ukraynada olmasını leqallaşdırır..."

 

Fransa müdafiə naziri Sebastyan Lekornü Ukrayna Silahlı Qüvvələri Baş Komandanı Aleksandr Sırski və müdafiə naziri Rüstəm Ömərovla söhbətində Ukraynaya hərbi təlimatçılar göndərilməsi ilə bağlı fərman imzaladığı barədə məlumat verib.

 

Moderator.az xəbər verir ki, bu barədə Sırski Telegram-kanalında yazıb. Məlumatı "ozodi.org" nəşri yayıb.

 

Sırskinin məlumatını şərh edən Ukrayna Müdafiə Nazirliyi bəyan edib ki, hazırda Fransa və digər ölkələrlə bu məsələ ilə bağlı diskusiyalar davam edir.

 

"2024-cü ilin fevralından başlayaraq Ukrayna rəsmiləri perspektivdə ölkənin xarici təlimatçıların qəbul edilməsində maraqlı olduğunu ifadə edib. 

 

Müdafiə Nazirliyi Baş Qərargahla birgə müvafiq qərarın qəbul edilməsinədək bürokratik əngəllərə zaman ayırmamaq üçün bu məsələ ilə bağlı müvafiq sənədlər üzərində daxili işə başlayıb", - mətbuat xidmətinin məlumatında deyilir.

 

Fransa Silahlı Qüvvələr Nazirliyi bəyan edib ki, "fransız hərbi təlimatçıların Ukraynaya hərbi qulluqçuların təlimi üçün göndərilməsi məsələsi hələlik işlənib hazırlanır".

 

"Dəfələrlə deyildiyi kimi, Ukrayna torpağında təlim Fransa prezidentinin fevralın 26-da çağırdığı Ukraynaya dəstək üzrə konfransdan sonra müzakirə edilən layihələrdən biridir. Bu məsələ ukraynalılarla müzakirə predmeti olaraq qala bilər", - nazirlik qeyd edib.

 

Bu konfransdan sonra Fransa prezidenti Emmanuel Makron bəyan edib ki, Ukraynanın Qərb müttəfiqləri USQ-yə uzaqvuran silahların verilməsi üzrə koalisiya yaradacaq, gələcəkdə isə "Qərb hərbçilərinin Ukraynaya göndərilməsini istisna etmək olmaz".

 

Bundan sonra Makron bu təşəbbüsün gerçəkləşməsinin şərtlərini açıqlayıb. O cümlədən qoşunların göndərilməsi Rusiyanın Odessa və ya Kiyevə tərəf yeni hücumu zamanı baş verə bilər.

 

Rusiyalı hərbi ekspert Aleksandr Şarkovski "İzvestiya" qəzetinə müsahibəsində bəyan edib ki, Fransa hərbi təlimatçılarına Ukraynanın təlim mərkəzlərini ziyarət etməklə bağlı rəsmi icazə yalnız formal xarakter daşıyır, onların ölkədə faktiki olmasını leqallaşdırır.

 

"Bu, sırf formal yanaşmadır, sırf formal sənəddir, çünki fransız təlimatçıları NATO-nun digər təlimatçıları kimi artıq Ukrayna ərazisində, həm də böyük sayda var", - Şarkovski əmin edib, lakin öz iddialarının sübutlarını təqdim etməyib.