“Mən 2021-ci ilin iyun ayında Bakı şəhəri, Həsən Əliyev 3 C ünvanında yerləşən “AzEstetik Group” MMC-dən lazer cihazı aldım. İlkin ödəniş üçün əlimdə məbləğ az olduğuna görə tam başqa cihaz seçmişdim, amma orada mənə qiyməti istədiyimdən ikiqat baha olan, vitrində kənarda bir ədəd ayrıca qoyulan bir cihazı məsləhət gördülər. Mənim əlimdə 3 min manat pul var idi, təklif etdikləri cihazın ilkin ödənişi isə 10-15 min manat arası dəyişirdi. Mən instaqramda Samirə adlı bir xanımla danışıb ora getmişdim. Həmin xanım özünü mənə şirkət rəhbərinin həyat yoldaşı kimi tanıtmışdı. Mən orada olanda zəng etdi ki, narahat olma, cihazın ən yaxşısıdır, mən həyat yoldaşıma deyirəm indi işçilərə tapşıracaq onu sənə 3 min manat ödənişlə versinlər. Mən cihazı aldım, 3 gün tədris günümüz oldu, birinci günü boş keçirdik, ikinci günü bizə gəldilər. Məndən başqa bir neçə nəfər alıcılara da üstündə şirkətin loqosu, adı yazılan köynəkləri geyindirib çəkilişlər etdilər ki, guya tədris zamanı olan çəkilişlərdir. 3-cü günü də qısa bir tədris edib, sonra sertifikatları verib bizi yola saldılar. Müqaviləni istəyəndə dedilər ki, rəhbərlik işdə deyil, cihazla birlikdə rayona göndərəcəklər. Bir neçə gündən sonra cihazı gətirdilər, müqaviləni də imzaladım getdilər”

 

Bunu Moderator.az-a açıqlamasında Xalima Ustayeva deyib. Müsahibimiz daha sonra iddia edib ki, həmin şirkət tərəfindən aldadılıb. 

“Cihazı aldığım ilk ayda 3-4 dəfə servisə getdi, özləri gəlmirdi baxmaq üçün. Hər dəfə mən Bakıya göndərirdim. Bir aydan sonra artıq rayonda açdığım salonu da utandığımdan bağladım. Çünki bir gün işləyirdi, beş gün bağlı olurdu. Başqa rayonda (Zaqatalada) işləməyə başladım. Cihaz o qədər xarab olurdu ki, sayını belə bilmirəm. İki il bu qaydada həmin cihazı işlətmişəm. Cihazın kredit ödənişini, həmin kreditə görə düşdüyüm borc-xərcdən hələ danışmıram. Aparatın artıq tez-tez sıradan çıxması mənə müştəri gəlməməsinə səbəb olmuşdu. Özüm yataqxanada yaşayıram, ailədə maddi vəziyyət də ürəkaçan deyil. “AzEstetik Group” MMC şirkəti psixologiyamı o qədər pozmuşdu ki, mən evdə tək qalanda özümə zərər verərəm, nəsə edərəm deyə atam qorxusundan işini gecə növbəsinə yazdırıb, anam işdən gələnə qədər yanımdan ayrılmırdı. Şirkət mənə ən son 2500 azn manata cihazın ekranını satdı. Guya xarab olub adıyla. Ondan sonra yenə cihazım xarab oldu, artıq zənglərimə cavab verməməyə başladılar. Məcbur olub başqa servis axtarmalı oldum. Həmin servis xidməti cihazı mənim yanımda açanda çip aşkarladı. Onu cihazdan ayırdıqdan sonra cihazım  normal işləməyə başladı. Mənə cip haqqında şifahi də olsa məlumat verməmişdilər. Nə də müqavilədə elə bir maddə yox idi. Mənə həmin cihazı İtaliya&Almaniya istehsalı “Wertex” 900 watt gücündə adı ilə satıblar, amma cipi aşkarlayanda bilmişəm ki, əslində 600 watt gücündə Çin istehsalı FG-2000D modeli imiş. Sonra cipə aid yutubda video yayımladım. Zəng edib dedilər ki, həmin videonu sil, sənə yeni cihaz verəcəyik. Mən isə onların bu təklifindən imtina etdim. Sonra başladım paylaşımlara. Onlar da məndən Balakən rayon polis idarəsinə şikayət etdilər. Belə iddia qaldırdılar ki, cihazı başqa servis xidmətinə aparmışam. Məndən 15 min manat təzminat tələb etdilər. Həmin ərəfədə mən atamı iş qəzasında ağır bir şəkildə itirdim. Bunu bilə-bilə tam da o ərəfədə məni ekranın qalığ borcuna görə yenə məhkəməyə verdilər. Məhkəmənin də bildirişi gəlmədiyi üçün iştirak edə bilmədim. Borcun ödənməsi üçün qətnamə çıxdı. Apelyasiya şikayəti də verə bilmədim. Şirkət rəhbərlərindən olan Rəşad Qasımov atamın o cür faciəli şəkildə ölməyini üzürsüz səbəb olaraq izah edib, məhkəməyə etiraz məktubu yazdı. Həmin məhkəməyə olan müraciətlərimdən başqa bir çox yerlərə-Baş prokurorluğa, Daxili İşlər Nazirliyinə, Banditizm, İqtisadiyyat Nazirliyinə müraciət etmişəm. Hələ də müraciətlərim cavabsız qalıb. “AzEstetik” Group 15 min manat təzminat iddiasını qazana bilmədi. Qazandıqları qalib borca görə olan məhkəməyə də təqdim etdikləri müqavilə saxtadır.  Mənim yerimə özləri imza atıb saxta müqavilə tərtib ediblər. Həmin müqavilədə göstəriblər ki, guya cihaza cip yerləşdirilməsi hüququ verilib. Mən saxta imzaya görə də Nəsimi rayon prokurorluğuna və polis idarəsinə müraciətlər etmişəm. “Azad İstehlakçılar” birliyinin sədri Eyyub Hüseynovdan başqa heç kim mənə dəstək olmadı. Biz alıcılar onlara ödənişləri şirkət rəhbərinin şəxsi debit kartına yollayırdıq. Onlar isə bizə kassa çeki vermirdilər. Özləri əslində görün nə qədər vergidən yayınıblar. Amma mən işləməyə-işləməyə məni vergiyə şikayət etmişdilər. Hətta məhkəmədə mənə dedilər ki, dəymiş ziyanı ödəyək, ekran üçün ödədiyin məbləği qaytaraq, 15 min manat təzminat iddiasını da ləğv edək və daha yeni və güclü cihaz verək. Bütün bunların qarşılığında da məndən cihazımda cipi aşkarlayan şirkət rəhbəri haqda paylaşımlar etməyimi istədilər.. Dedilər ki, guya sən belə videolar paylaş ki, həmin şirkət sahibi səni aldadıb və səni səhv yola yönəldib. O insan mənə qardaşlıq edib. Onlara bildirdim ki, sizin təklif etdiyiniz nəyəsə görə kiməsə şər atıb, satqınlıq etmərəm. Bu sözü deyən kimi düz getdilər” deyə şikayətçi iddia edib.