"Rusiya Müdafiə Nazirliyində həbslər dalğası xüsusi xidmət orqanlarının ordu ilə qarşıdurmada qələbəsindən xəbər verir..."

 

"Hərbi müdaxilənin iflasa uğramasında kimsə bir nəfər günahkar olmalıdır..."

 

Rusiyanın yüksək vəzifəli generallarının həbsi üzrə kampaniya başlanğıc mərhələsindədir və Kremlin razılığı ilə baş verir.

 

Moderator.az xəbər verir ki, bu barədə Rusiyanın "The Moscow Times" nəşri beş anonim mənbəyə istinadən məlumat verib.

 

Jurnalistlər Rusiya hökumətinin iki məmuru, Kremlə yaxın olan iki mənbə, habelə Müdafiə Nazirliyində baş verənlərdən məlumatlı olan mənbə ilə söhbət edib.

 

Beş mənbənin hamısı bu həbslər dalğasının səbəbinin xüsusi xidmət orqanlarının Ukraynada uğursuzluqları ordunun üzərinə qoymaq, habelə müdafiə xərclərinə nəzarəti əldə etmək olduğu fikrində həmrəydir.

 

"Sərt təmizləmə aparılır. FTX Şoyqunun komandasını təmizləyir. Bu, gözlənilən prosesdir. Güc strukturları ən yüksək səviyyədə buna icazə əldə edib. Təmizləmənin başa çatmasına hələ çox var. Yeni həbslər olacaq", - bunu Kremlə yaxın olan həmsöhbət jurnalistlərə bəyan edib.

 

Rusiya Müdafiə Nazirliyinə yaxın mənbə deyib ki, xüsusi xidmət orqanlarının əməkdaşları Müdafiə Nazirliyinin binalar kompleksində aprel ayında, nazir müavini Tumur İvanovun həbsindən öncə peyda olub.

 

"Mənə elə gəlir ki, hazırda orada hərbçilərdən çox çekist var", - həmsöhbət deyib.

 

Potensial olaraq hazırda müasir Rusiya tarixində yenicə vüsət alan "ən geniş miqyaslı təmizləmə" baş verir. Bu barədə jurnalistlərə Rusiya hökumətinin məmuru deyib.

 

"Düşünürəm ki, ilin sonunadək Müdafiə Nazirliyinin bütün bölmələri üzrə yüzlərlə insan həbs ediləcək", - o, əlavə edib.

 

Digər hökumət məmurunun sözlərinə görə, müstəntiqlərdə həmişə Müdafiə Nazirliyi əməkdaşlarına qarşı "bir yığın material" olub, bu materiallar üzrə hətta cinayət işləri də açılıb.

 

"Lakin nə qədər ki, Şoyqu nazir kimi böyük təsirə malik olub, müstəntiqlərə buna icazə verilməyib", - mənbə deyib.

 

Kremlə yaxın olan daha bir mənbə hesab edir ki, Müdafiə Nazirliyində həbslər dalğası xüsusi xidmət orqanlarının ordu ilə qarşıdurmada qələbəsindən xəbər verir.

 

"Hərbi müdaxilənin iflasa uğramasında kimsə bir nəfər günahkar olmalıdır. Bu, ya kəşfiyyatla və müharibəyə analitik hazırlıqla məşğul olan və Putinə zəfər əməliyyatı və tez bir zamanda qələbəni vəd edən və iflasa uğrayan xüsusi xidmət orqanları olmalıdır.

 

Ya da Şoyqunun rəhbərliyi altında "dünyanın ikinci ordusu" bu qələbəni Putinə təmin etməli idi. Lakin bu ordu kağız üzərində pələngə bənzəyib və fəlakətə uğrayıb", - o, izah edib.

 

İndi xüsusi xidmət orqanları qaliblər kimi qənimət olaraq Müdafiə Nazirliyinin büdcəsi üzərində nəzarəti əldə edəcək.

 

"Maksimum vəzifə öz adamlarını təyin etmək və ən "dadlısına", böyük büdcəsi olan istiqamətlərə nəzarət etməkdir, - hökumət məmuru izah edib. - Yoxsa siz həqiqətən ciddi olaraq düşünürsünüz ki, onlardan kimsə bu məqamda xüsusi əməliyyat barədə düşünür?".

 

Bu kampaniya Rusiya müdafiə nazirinin müavini  Timur İvanovun aprelin 23-də həbsi ilə başlayıb. Bundan sonra güc strukturları Rusiyanın daha beş generalını saxlayıb. 

 

Cənub Hərbi Dairəsinin 58-ci ordusunun sabiq komandanı general İvan Popovdan başqa, onların hamısı Rusiya Müdafiə Nazirliyində xidmət keçib.