"Zəngəzur dəhlizi 2028-ci ildə yaradılacaq" - Türkiyənin Nəqliyyat Nazirliyi

Bizi sosial şəbəkələrdən izləyin:

"Dəhlizin Türkiyə hissəsinin uzunluğu 224 km təşkil edir, bütövlükdə bu dəhlizin yaradılması prosesi beş il çəkəcək..."

"Bununla da Türkiyə türk dünyası ölkələrinə və Mərkəzi Asiyaya birbaşa çıxış əldə edəcək..."

Türkiyə Zəngəzur dəhlizinin yaradılması layihəsinin 2029-cu ilədək tamamilə gerçəkləşəcəyinə bel bağlayır.

Moderator.az xəbər verir ki, bu barədə Türkiyənin nəqliyyat və infrastruktur naziri Əbdülqədir Uraloğlu ölkənin "tvnet" kanalına müsahibəsində bəyan edib.

"Zəngəzur dəhlizinin Bakıdan Horadizədək uzanan hissəsi başa çatmaq üzrədir. Dəhlizin Türkiyə hissəsinin uzunluğu 224 km təşkil edir. Bütövlükdə bu dəhlizin yaradılması prosesi beş il çəkəcək. Yəni düşünürəm ki, 2028-ci ildə biz bütün işləri tamamilə başa çatdıracağıq", - Uraloğlu deyib.

Nazir əlavə edib ki, inşaat işləri Horadizdən Ordubada qədər olan hissəsində, Ermənistan ərazisindən keçən hissəsi istisna olmaqla, davam edir.

"Naxçıvan Muxtar Respublikasını Türkiyə ilə birləşdirən uzunluğu təxminən 100 km olan mövcud yolun rekonstruksiyası tələb ediləcək. İqdır-Qars dəmir yolu onun davamı olacaq, bu yol üzrə artıq tender prosedurları keçirilib, bu il çəkilişinə başlayırıq", - Uraloğlu deyib.

İrəvanın Zəngəzur dəhlizinə münasibətinə gəldikdə, nazir vurğulayıb ki, bu təşəbbüs ilk dəfə irəli sürüləndə erməni tərəfi buna neqativ münasibət göstərib, hərçənd, bu layihənin Ermənistan üçün də mənfəətindən danışılıb.

"Lakin son zamanlar Ermənistan baş naziri Nikol Paşinyan tərəfindən bu dəhlizlə bağlı müsbət mesajlar səsləndirilib. Zəngəzur dəhlizinin Ermənistandan keçən hissəsinin uzunluğu 43 km təşkil edir. Onlar bu dəhlizin tam başa çatdırılması üçün planlaşdırılma və tender keçirməlidir. Beləliklə, Türkiyə türk dünyası ölkələrinə, Mərkəzi Asiyaya birbaşa çıxış əldə edəcək", - o, deyib.

O, həmçinin qeyd edib ki, İran öz tərəfindən Azərbaycanı Türkiyə ilə birləşdirəcək yolun Ermənistandan yan keçməklə öz ərazisindən inşa edilməsi təşəbbüsünü irəli sürüb.

"Biz Zəngəzur dəhlizi layihəsini gerçəkləşdirəcəyik, lakin İranın da Türkiyə ilə Azərbaycan arasında bu əlaqənin öz ərazisindən keçən bir hissəsi olmasına etiraz etmirik, - o, deyib. - İran tərəfilə görüş və danışıqlar davam edir. Biz bu layihənin də vaxtında gerçəkləşəcəyinə ümid edirik".